Бокс. Александр Федотов турнирын кыайыылаахтарынан кимнээх буоллулар?

Дьокуускай. “Кыайыы 50 сыла” аатынан Спорт дыбарыаһыгар түөрт күн устата Александр Федотов кэриэһигэр боксаҕа А категориялаах Бүтүн Россиятааҕы турнир ыытыллан түмүктэннэ. Санатан эттэххэ, турнирга дойду 24 регионуттан барыта 90-ча боксер кыттыыны ылла. Ити иһиттэн, Саха сириттэн отут боксер кииристэ. Турнир кылаабынай судьуйатынан – норуоттар икки ардыларынааҕы категориялаах судьуйа А.Саморцев (Ленскэй), кылаабынай секретарынан бастакы категориялаах судьуйа Г.Стручков үлэлээтилэр.

Хаһан баҕарар буоларыныы, күүстээхтэр этэргэ дылы, сиидэлэнэн-сиидэлэнэн бүтэһик күн бэйэ-бэйэлэрин кытта көрүстүлэр. Быһаарыылаах киирсиилэр көһүтүллүбүттэрин курдук, бэрт сытыытык, тыҥааһыннаахтык бардылар. Холобур, 52 киилэҕэ биһиги биир дойдулаахпыт, билигин Москваҕа, Армия киин спортивнай кулуубугар эрчиллэр Борис Сидоров уонна бурят Баир Батлаев киирсиилэрэ көрөөччүлэри бүргэс үрдүгэр олорто. Сүрдээх сытыытык, тэтимнээхтик барбыт көрсүһүүгэ, судьуйалар быһаарыыларынан 3:2 ахсаанынан кыайыыны Сидоров ситистэ. Бу киирсиини, финалларга саамай бастыҥ киирсиинэн ааттыахха сөп. Спортсменнар иккиэн үчүгэй боксаны көрдөрөн, көрөөччүлэри астыннардылар.

Оттон 64 киилэҕэ Илья Казаченко (Владимир) – финалистартан саамай саастаахтара (30), спорт маастара Доржо Дахаевы (Бурятия) кытта киирсиитигэр, Дахаев секунданнара иккис рауҥҥа аккаастаатылар. Онон кыайыыны болдьоҕун иннинэ Илья Казаченко ситистэ. Уоннааҕы финалларга, кыайыылаахтар 5:0 ахсаанынан кыайыыны ситистилэр.

Бу турнирга биһиги биир дойдулаахтарбытыттан ордук ситиһиилээхтик 19 саастаах, спорт маастарыгар кандидат Виталий Стручков кытынна. Кини рингэҕэ үстэ тахсан – үһүөннэригэр итэҕэтиилээх кыайыыны ситиһэн, Россия спордун маастарын нуорматын толордо диэххэ сөп. Түгэнинэн туһанан кини тренердэрэ Илья Иванову уонна Владимир Павловы эҕэрдэлээн кэбиһиэҕиҥ!

Саха сирин хамаандата бу турнирга 1 кыһыл көмүс, 3 үрүҥ көмүс уонна 6 боруонса мэтээллэри ылары ситистэ. Атын регионнартан кыттыбыт уолаттарбытыттан Михаил Прокопьев, Борис Сидоров бастаатылар, Жонибек Икромов, Айкар Олесов үһүстээтилэр.

Турнир бастыҥ боксерунан Борис Сидоров ааттанна. Оттон Никита Мирошниченко «Бастыҥ техникатын» иһин бириис хаһаайынынан буолла. Турнир түмүгүнэн сэттэ боксер Россия спордун маастардарын нуорматын толордулар. Кинилэр ортолоругар Горнайтан төрүттээх Борис Сидоров уонна Уус Алдан ыччата Виталий Стручков бааллар.

Турнир түмүк көрдөрүүтэ:

49 кг 1. Михаил Прокопьев (Краснодар), 2. Николай Усов, 3. Руслан Галдин (иккиэн – Саха сирэ).

52 кг 1. Борис Сидоров (Москва), 2. Баир Батлаев (Бурятия), 3. Эльдар Хараев (Калмыкия), Батор Гомбоев (Бурятия).

56 кг 1. Алан Борсов (КБР), 2. Богдан Ильзитинов (Калмыкия), 3. Айаал Степанов (Саха сирэ), Жонибек Икромов (Новосибирскай).

60 кг 1. Виталий Стручков, 2. Ян Алексеев (иккиэн – Саха сирэ), 3. Расул Яксубаев (Астрахань), Ланзы Чаян (Новосибирскай).

64 кг 1. Илья Казаченко (Владимир), 2. Доржо Дахаев (Бурятия), 3. Евгений Лелеков (Хабаровскай), Прокопий Яковлев (Саха сирэ).

69 кг 1. Алексей Скомороха (Красноярскай), 2. Илья Мелешин (Магадан), 3. Айкар Олесов (Новосибирскай), Арчын Пустоляков (Саха сирэ).

75 кг 1. Никита Мирошниченко (Новосибирскай), 2. Уткирбек Эргашев (Приморскай), 3. Данияр Омурбек (Саха сирэ), Муртуз Загирбеков (Дагестан).

81 кг 1. Денис Мешков (Москва), 2. Роман Сидоров (Хабаровскай), 3. Артем Наролин (Новосибирскай), Сергей Укоев (Саха сирэ).

+91 кг 1. Магомед Мусаев (Дагестан), 2. Сергей Татаринов (Саха сирэ).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *