Боксаҕа Россия Кубога: Сидоровтаах Варламов кыайыынан саҕалаатылар

Ижевскэй куоракка Россия боксаҕа хамаанданан Кубога саҕаланна. Рингэҕэ, сэрэбиэй быһыытынан бастаан Дальнай Восток федеральнай уокуругун уонна Москва хамаандалара таҕыстылар. Санатан эттэххэ, бу уон ыйааһыҥҥа хамаанданан сирэй көрсөн күрэхтэһии.

Бастакы ыйааһыҥҥа (49 кг) Москва хамаандатыттан саха боксаҕа оскуолатын иитиллээччитэ Борис Сидоров таҕыста. Кини Николай Харанахоевы кытта кииристэ. Күрэхтэһиини “МатчБоец” канаалга быһа көрдөрдүлэр. Тэҥ хаабааннаах киирсиигэ үс раунд устата наар кимэн киирсибит биһиги биир дойдулаахпыт Борис Сидоров комментатор эппитинэн уонна биһиги көрбүппүтүнэн, кыайыыга дьулуурунан кыайыыны ситистэ. Онон, Кубокка кыттыытын кыайыынан саҕалаата.

Бу көрсүһүүгэ сахалартан өссө биир боксер – 57 кг ыйааһыҥҥа Дальнай Восток хамаандатыттан Михаил Варламов рингэҕэ таҕыста. Киниэхэ секундант быһыытынан Россия, Саха сирин үтүөлээх тренерэ Артур Пахомов уонна Саха сирин үтүөлээх тренерэ Владимир Павлов тахсан, сүбэлэрин-амаларын биэрдилэр. Бу, хардары-таары охсуулаах тэҥ киирсиигэ биһиги боксербут эдэр утарсааччытын Роман Белоусовы баһыйа тутта.

Онон, Кубок бастакы күнүгэр Борис Сидоров уонна Михаил Варламов бэйэлэрин хамаандаларыгар кыайыыны аҕаллылар.

Кубок салҕанан барар, аны атын боксердарбыт рингэҕэ тахсалларын кэтэһэбит.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *