Боксаҕа Россия Кубога: Назар Андреев үөртэ!

Ижевскэйгэ ыытылла турар Россия боксаҕа хамаанданан Кубогар Москва куораттан икки спортсмеммыт кытынна. Борис Сидоров уонна эдэр уол Назар Андреев. Кини 75 кг ыйааһыҥҥа кииристэ. Соторутааҕыта Москва куорат чемпионатыгар иккис миэстэни ылан, үчүгэй өйдөбүлү үөскэппитэ.

Бастаан, 19 саастаах уолбут – опыттаах, норуоттар икки ардыларынааҕы кылаастаах спорт маастара Владислав Федюриҥҥа (Приволжскай федеральнай уокурук) түбэспититтэн, салла санаабыппыт. Ол эрээри, Назар бэйэтин номнуо буспут-хаппыт байыас быһыытынан көрдөрдө. Кини сыыһа-халты туттуута суох наар кимэн таҕыста. Утары охсуулары оҥортоото. Уонна көрдөххө, илиитин уларыта сылдьан, уҥатынан да, хаҥаһынан даҕаны күүстээх охсуулары оҥортоото. Быһата, ааттаах-суоллаах утарсааччытыттан куттаммакка, эрэллээхтик кииристэ. Киниэхэ тренер Василий Лисица секунданнаата, тохтобулга наадалаах сүбэлэри-амалары биэрдэ. Икки бастакы рауннарга баһыйда, оттон үһүскэ кыратык кимиитин намтата сырытта. Ол да буоллар, судьуйалар сиэрдээх быһаарыыларынан кыайыыны Назар Андреев ситистэ.

Онон, икки эргиир түмүгүнэн биир дойдулаахтарбытыттан Борис Сидоров, Михаил Варламов, Василий Егоров уонна Назар Андреев бэйэлэрин киирсиилэригэр кыайыыны ситистилэр. Итинэн үчүгэй бэлэмнээхтэрин көрдөрдүлэр. Күрэхтэһии билигин даҕаны салҕанан барар. Уолаттарбытыгар ситиһиини баҕарыахха.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *