Благовещенскай көбүөрүгэр 5 уолбут бастаата!

Бүгүн Благовещенскай куоракка ССРС спордун маастара Алексей Ковалёв кэриэһигэр көҥүл тустууга Бүтүн Россиятааҕы турнир ыытыллан түмүктэннэ.

Турнирга Дальнай Восток уонна Сибиир федеральнай уокуруктарыттан барыта 11 хамаанда (Амурскай, Еврейскэй автономнай, Иркутскай, Новосибирскай, Сахалинскай уобаластар, Приморскай, Хабаровскай, Забайкальскай, Красноярскай кыраайдар, Саха сирэ, Бурятия) 103 бөҕөһө кыттыыны ылла.

Бу күрэхтэһиигэ тренердэр Александр Оконешников, Станислав Захаров салалталаах Саха сирин хамаандата ситиһиилээхтик кытынна. Ол курдук, Александр Иванов — 61 кг, Вальтер Владимиров — 70 кг, Одун Сергеев — 79 кг, Алексей Ефимов — 86 кг уонна Максим Толмачев — 97 кг кыайыы көтөллөннүлэр.

Оттон Святослав Семенов (57 кг), Владислав Ефимов (65 кг), Револий Самсонов (79 кг), Сергей Николаев (86 кг) иккис, Харысхал Григорьев (57 кг), Василий Яковлев (65 кг), Эдуард Максимов (125 кг) үһүс миэстэлэри ыллылар.

Манна даҕатан эттэххэ, аҕыйах хонуктааҕыта Александр Иванов (тренердэрэ С.Захаров, И.Дмитриев), Вальтер Владимиров (тренерэ Г.Игнатьев), Одун Сергеев (тренерэ О.Михайлов), Алексей Ефимов (тренерэ Б.Яковлев), Эдуард Максимов (тренерэ В.Уваров) – Хабаровскайга, биллиилээх айанньыт Ерофей Хабаров аатынан Бүтүн Россиятааҕы турнирга бастакы миэстэни ылан, Россия спордун маастарын нуорматын толордулар диэххэ сөп.

Эҕэрдэлиибит!

«Дьулурҕан».

Добавить комментарий

Ваш адрес email не будет опубликован. Обязательные поля помечены *