Биэс уолбут салгыы тустар

Көҥүл тустууга Россия чемпионатын бастакы күнүн түмүгүнэн 57, 86, 92 кг ыйааһыннарга финалистар быһаарыллыбыттарын кэннэ, кимнээх салгыы тусталлара билиннэ. Ол курдук, биһиги биэс бөҕөспүт «уоскутар» бөлөххө киирэн, чемпионат боруонса мэтээлин ылар иһин киирсиилэргэ кыттар буоллулар.

57 киилэҕэ бастаан Михаил Иванов – Айаал Белолюбскай бэйэ-бэйэлэрин кытта көрсөллөр. Онно ким кыайбыт Уйгулаан Ивановка тахсыаҕа. Бу хапсыһыы кыайыылааҕа боруонса мэтээл иһин Азамат Тускаевтыын киирсиэҕэ.

86 кг ыйааһыҥҥа Никита Софронов – Камиль Далгатовы (Дагестан) кытта киирсэр буолла. Бу хапсыһыы кыайыылааҕа Хажби Хашпаковка (КБР) тахсыаҕа. Онно хоппут киһини Магомед Рамазанов (Дагестан) кэтэһэн олорор.

Оттон 92 киилэҕэ Ньургун Сергин – Зелимхан Минкаилов (Чечня) киирсиитин кыайыылааҕа – Азамат Закуевы (КБР) кытта чемпионат боруонса мэтээлин былдьаһыаҕа.

Онон уолаттарбыт мэтээл иһин  салгыы туста сылдьаллар. Кинилэргэ ситиһиини баҕарыахха!

Финалга көрсүөхтэрэ:

57 кг Начын Монгуш (Тыва) – Завур Угуев (Дагестан)

86 кг Артур Найфонов (Хотугу Осетия) – Даурен Куруглиев (Дагестан)

92 кг Анзор Уришев (Красноярскай/КБР) – Магомед Курбанов (Дагестан).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *