Биэс мэтээл баар!


Улуу тренер Д.П. Коркин кэриэһигэр турнир түмүктэннэ. Биһиги бөҕөстөрбүт икки кыһыл көмүс, үс боруонса мэтээли ылары ситистилэр. Ити, күүстээх састааптаах түһүлгэҕэ үчүгэй көрдөрүү.

Күрэхтэһии үһүс күнүгэр сарсыарда – 61, 70, 79, 92, 125 кг ыйааһыннаахтар үһүс бириистээх миэстэни былдьаһааччылар бөлөхтөрүн быһаарсыылаах хапсыһыылара ыытылыннылар. 61 киилэҕэ эрдэ иһитиннэрбиппит курдук, наар бэйэбит уолаттарбыт күөн көрүстүлэр. Онон эрдэттэн икки боруонса мэтээли, этэргэ дылы, сиэппитигэр уктубуппут. Онуоха Россия эдэрдэргэ күрэхтэһиитин призера, Дьааҥы ыччата Айсен Потапов уонна норуоттар икки ардыларынааҕы кылаастаах маастар Ньургун Александров пьедестал үһүс үктэлигэр тахсар кыахтаннылар.

Манна сыһыары тутан эттэххэ, бу түһүлгэҕэ кыайыылаахтарга — 7, иккистээбиттэргэ — 5, үһүс буолбуттарга — 3 тыһ. доллар бириистэр туттарылыннылар. Бүтэһик күн биһигини ордук, Роман Дмитриев турнирын кыайыылааҕа Максим Толмачев (тренерэ Никита Никифоров) улаханнык үөртэ. Кини, боруонса мэтээли ким ыларын быһаарсыыга Россия эдэрдэргэ хамаандатын чилиэнэ Гурам Черткоевы кылбардык кыайан, биир дойдулаахтарын астыннарда.

Маны тэҥэ, бу иннинэ наар 86 киилэҕэ кыттар Европа быйылгы чемпиона Артур Найфонов аны 92 кг ыйааһыҥҥа ситиһиилэммитин бэлиэтиир тоҕоостоох. Бүтэһик быһаарыылаах хапсыһыыга кини уопуттаах бөҕөс Анзор Уришевы кыайыыта сыаналаныан сөп. Оттон бэҕэһээ олимпийскай чемпион Сослан Рамоновы эрэллээхтик хоппут Евгений Жербаев (70 кг) сэрэйиллибитин курдук, кыахтаахтык бастаата. Кини финалга монгол Бат-Эрдэнэни 8:2 ахсаанынан баһыйа тутта.

Түмүктээн эттэххэ, бу түһүлгэҕэ Саха сирэ, Хотугу Осетия, Иран, Азербайджан 2-лии чемпионнаахтар, оттон Бурятия уонна Красноярскай хамаандаларыттан 1-дии киһи кыайда. Турнир бастыҥ бөҕөһүнэн кими ааттыахха сөбүй? Мин санаабар, Арыйаан Тютрин уонна Евгений Жербаев чаҕылхай тустууну көрдөрдүлэр. Оттон эһиги санааҕытыгар?

ССРС, РСФСР, Саха АССР үтүөлээх тренерэ Дмитрий Коркин аатынан көҥүл тустууга норуоттар икки ардыларынааҕы Гран-при турнир иккис күнүн түмүгэ

61 кг (28 кыттааччы): 1. Ахмеднаби Гварзатилов (Азербайджан), 2. Тувшинтулга Туменбилег (Монголия), 3. Айсен Потапов, 3. Ньургун Александров, 5. Семен Владимиров, 5. Николай Иванов (төрдүөн – Россия, Саха сирэ).
70 кг (25): 1. Евгений Жербаев (Россия, Бурятия), 2. Бат-Эрдэнэ Бямбадорж (Монголия), 3. Ихтиор Новрузов (Узбекистан), 3. Сослан Рамонов (Россия, Хотугу Осетия), 5. Айдын Тажигали (Казахстан), 5. Надирбег Хизриев (Россия, Красноярскай).
79 кг (10 кыттааччы): 1. Кахабер Хубежты (Россия, Хотугу Осетия), 2. Джумбер Квелашвили (Грузия), 3. Ибрагим Юсубов (Азербайджан), 3. Пуревжав Өнөрбат (Монголия), 5. Ислам Килич (Турция), 5. Алексей Ефимов (Россия, Саха сирэ).
92 кг (8 кыттааччы): 1. Артур Найфонов (Россия, Хотугу Осетия), 2. Анзор Уришев (Россия, КБР), 3. Максим Толмчаев (Россия, Саха сирэ), 3. Лувсандорж Туртогтох (Монголия), 5. Гурам Черткоев (Россия, Хотугу Осетия), 5. Виллагомес Паредес (Эквадор).
125 кг (13 кыттааччы): 1. Комейл Гасеми (Иран), 2. Золбоо Нацагсурен (Монголия), 3. Балдан Цыжипов (Россия, Бурятия), 3. Ибрагим Саидов (Беларусь), 5. Олег Болтин, 5. Ермухамбет Инкар (иккиэн – Казахстантан).

Петр ПАВЛОВ.

PS: Күрэхтэһии үһүс күнүн түгэннэрин “Хаартыскалар” рубрикаҕа киирэн көрөргүтүгэр.

Добавить комментарий

Ваш адрес email не будет опубликован. Обязательные поля помечены *