Биир финалист баар!

Бүгүн Красноярскай куоракка саҕаламмыт Иван Ярыгин аатынан көҥүл тустууга норуоттар икки ардыларынааҕы Гран-при турнирга үс ыйааһыҥҥа финал аҥаарыгар кимнээх киирсэллэрэ билиннэ.

Эрдэ иһитиннэрбиппит курдук, түһүлгэ саҕаланыан иннинэ, сүүмэрдиир хапсыһыылар ыытылыннылар. Онуоха, 57 киилэҕэ Арыйан Тютрин кабардинец Амирхан Гуважоковка 2:7 ахсаанынан хотторон кэбиһэн, барыбытын хомотто. Биһиги киниэхэ сүрдээҕин эрэммиппит, ол баҕа санаабыт туолбата.

61 кг ыйааһыҥҥа икки уолбут кытынна. Семен Владимиров – Россия чемпиона Магомедрасул Идрисовка 1:5 ахсаанынан хоттордо. Оттон Эдуард Григорьев син эмиэ Миндиашвили турнирын финалыгар курдук, тувинец Майдыр Донгагы баһыйа тутта. Бу сырыыга өссө эрэллээхтик, 11:0 ахсаанынан хотон, Ярыгин турнирын сүрүн сеткатыгар киирдэ.

Атын прикидкалар түмүктэрин билиһиннэрдэххэ: 57 киилэҕэ Муслим Садулаев (Чечня) – Хуреш Дондук Оолу (Тыва) “промакашка” диэн албаска түбэһиннэрэн ыраастык кыайбыта соһуччу буолла.

Итинэн, быйыл Иван Ярыгин сүрүн күрэхтэһиитигэр икки кыттааччыланныбыт: Румынияттан Николай Охлопков уонна Россияттан Эдуард Григорьев. Иккиэн 61 кг бөҕөстөрө.

Дьэ, сүрүн сеткаҕа киирэн Эдуард Григорьев маҥнай кубинец Эрнандеһы очукуонан ыраастык (10:0), оттон аан дойду чемпионатын боруонса призера Джо Колону (АХШ) 10:1 ахсаанынан эрэллээхтик кыайталаата. Американеһы биир түгэҥҥэ кууһан ылан халбарыйан быраҕан, 4 (!) бааллы сүүйбүтэ аһара астык этэ.

Бу кэмҥэ иккис бөҕөспүт – Николай Охлопков туркмен Мурат Ходжанепесовы 10:0, монгол Чинзориг Цэрмээни 12:2 ахсааннарынан бэрт эрэллээхтик кыайталаата.

Онон, 61 киилэҕэ финалга тахсар иһин киирсиигэ Эдуард Григорьев уонна Николай Охлопков бэйэ-бэйэлэрин кытта көрсөр буоллулар. Ол иһин, биир финалистаахпыт диэн эрэллээхтик этэр кыахтанныбыт. Бөҕөстөртөн хайалара үчүгэй бэлэмнээҕэ – бастакы миэстэ иһин туста тахсыаҕа. Оттон хотторбута – боруонса мэтээл иһин киирсэр кыахтанар. Онон ээр сэмээр мэтээл кэтэһэбит…

Санатан эттэххэ, финалга тахсар иһин хапсыһыылар бүгүн киэһэ 19:00 чаастан саҕаланаллар.

Онон, турнир балаһыанньатын быһыытынан, бүгүн, тохсунньу 24 күнүгэр киэһэ финалистар биллиэхтэрэ. Оттон быһаарыылаах хапсыһыылар сарсын киэһэ ыытыллыахтара.

Турнир бастакы күнүн киэһэтигэр финалга тахсар иһин хапсыһыыларга киирсиэхтэрэ:

57 кг: Муслим Садулаев (Россия) – Нармандах Насанбуя (Монголия), Эрдэнэбат Бехбаяр (Монголия) – Абасгаджи Магомедов (Россия).

61 кг: Магомедрасул Идрисов (Россия) – Лю Мингуи (Кытай), Николай Охлопков (Румыния) – Эдуард Григорьев (Россия).

70 кг: Асхат Слямханов (Казахстан) — Мандахнаран Ганзориг (Монголия), Магомедрасул Газимагомедов (Россия) — Давид Баев (Россия).

Петр ПАВЛОВ.

  

Добавить комментарий

Ваш адрес email не будет опубликован. Обязательные поля помечены *