Биирдэ маннык буолбуттаах…

1993 сыллаахха этэ. Москваҕа, Россия көҥүл тустууга чемпионатын сырдата бараары оччотооҕу республика спорка салалтатыттан эрдэттэн көрдөһүү сурук киллэрбитим. Уонна чугаһаабытыгар, бараары оҥостон куоракка киирбитим.
Өйдүүрбүнэн, онно инструкторынан билиҥҥи спорт миниистирэ Иннокентий Григорьев үлэлиирэ. Тустууктар билиэттэрин атыылаһыынан, тэрээһин дьыалаларынан кини дьарыктанара. Арай, билсэ тиийбитим, кыаллыбат буолла диэтэ.
Хайыахпыный, дойдубар төннөөрү сырыттахпына, сарсыныгар арай булан ылан, эмискэ ыҥыран ыллылар. Ол саҕана ШВСМ билиҥҥи Олимпийскай эрэл училищетын дьиэтигэр баара. Онно билэр дьоммуттан В.П. Карпов, М.Е. Друзьянов, Ю.П. Баишев уо.д.а. үлэлииллэрэ. Тиийбитим, хамаанда саамай опыттаах тустууга Василий Гоголев чемпионакка барбат буолбут, онон кини оннугар бараҕын дуо, билиэт баар диэтилэр.
Хайдах гыныахпыный? Эрдэттэн былааннаммыт киһи быһыытынан, төһө да кутталлааҕын, түбэстэхпинэ кыбыстыылааҕын үрдүнэн – улахан күрэхтэһиини көрөр баҕаттан сөбүлэстим. Василий Николаевич паспорын уонна билиэтин туттаран кэбистилэр. Онон «Василий Гоголев» буоламмын, аэропорка Дьокуускайга да, Москваҕа даҕаны араас бэрэбиэркэлэри этэҥҥэ ааһан, чемпионаты илэ харахпынан көрөн, үлэлээн кэлбиттээхпин.
Онно Владимир Торговкин иккис, Петр Юмшанов, Герман Контоев, Николай Яковлев үһүс буолбуттара.
Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *