Белград-2020: Россия хамаандата хас мэтээли ылыан сөбүй?

Дьэ, сарсыҥҥыттан Сербия – Белград куоратыгар көҥүл тустууга Аан дойду Кубогар биирдиилээн бастыыр иһин күрэхтэһии саҕаланар. Бу иннинэ аҕай Россия гректии-римнии тустууга сүүмэрдэммит хамаандата – 7 кыһыл көмүс уонна 2 үрүҥ көмүс мэтээли ылла. Көҥүл тустууктар бу көрдөрүүнү хатылыахтара дуо? Билэрбит чугаһаата.

Билэргит курдук, бу түһүлгэҕэ АХШ, Япония, Казахстан, Куба, Грузия, Монголия о.д.а. дойдулар хамаандалара коронавирус дьаҥынан сибээстээн кыттыбаттар. Онон күрэхтэһиибит аан дойду чемпионатын оннугар – Аан дойду Кубогар биирдиилээн бастыыр иһин күрэхтэһии диэн ааттанан ыытыллар.

Билигин, Россия хамаандатын бөҕөстөрүн биирдиилээн ыйааһыннарынан кылгастык ырытан, хайдах кыттыахтарын сөбүн сылыктаан көрүөххэ.

57 кг Заур Угуев (Дагестан) — аан дойду икки төгүллээх чемпиона. Кини чемпионнуур кыахтаах. Былырыыҥҥы аан дойду чемпионатын призёрдарыттан индус Рави Кумар баар. Итиэннэ састааптан көрдөххө, номнуо олимпийскай путёвкалаах көбүөр хаһаайына серб Стеван Мичич баар. Киниттэн тугу баҕарар кэтэһиэххэ сөп. Өссө Европа чемпиона Арсен Арутюнян (Армения), биһиги улахан үөрүйэхтээх бөҕөспүт – Владислав Андреев (Беларусь) мэтээлгэ киирсиэхтэрин сөп.

61 кг Абасгаджи Магомедов (Дагестан) – хамаанда дебютана. Эдэр, элбэх албастаах, түргэн тэтимнээх тустуук. Кини мэтээлгэ тиксиэн сөп. Ол эрээри, ханнык өҥнөөххө?

Аан дойду былырыыҥҥы призердарыттан индус Рахул Аваре баар. Ону тэҥэ азербайджанец Гварзатилов, болгарин Вангелов, кыргыз Жолдозбеков, турок Топал курдук балачча биллэр тустууктар кыттыыны ылаллар. Мин санаабар, мэтээл иһин сүрүннээн бу бөҕөстөр тусталлара буолуо.

65 кг Гаджимурад Рашидов (Дагестан) — аан дойду чемпиона. Былырыыҥҥы ситиһиитин хатылыыр кыахтаах.

Бу ыйааһыҥҥа атын ханнык күүстээх бөҕөстөр баалларый диэтэххэ, былырыыҥҥы аан дойду чемпионатын боруонса призёра Исмаил Мусукаев (Венгрия) баар. Итиэннэ былырыын Рашидовка мөккүөрдээх хапсыһыыга хотторуулааҕынан ааҕыллыбыт ааттаах-суоллаах азербайджанец Хаджи Алиевы бэлиэтиэххэ сөп.

Манна өссө биһиги Ньургун Скрябиммыт (Беларусь) – Европа быйылгы чемпионатын үрүҥ көмүс призёра ситиһиилээхтик тустарыгар баҕарабыт. Эдэрдэртэн молдован Грахмез, кыргыз Ахматалиев, украинец Оганесян аһыллан, тустан кэбиһиэхтэрин эмиэ сөп дии саныыбын.

70 кг Чермен Валиев (Хотугу Осетия). Хамаанда дебютана диэххэ сөп. Урукку сылларга Россия сүүмэрдэммит хамаандатын аатыттан Аан дойду Кубогар тустан турар. Онон норуоттар икки ардыларынааҕы таһымҥа син сиппит-хоппут бөҕөс быһыытынан сыаналанар. Мэтээл иһин киирсэр кыахтаах.

Киниэхэ кимнээх мэһэй буолуохтарын сөбүй? Турок Хайдар Явуз, Азербайджантан Гитинмагомед Гаджиев, Польшаттан Магомедмурад Гаджиев… Тус санаабар, мэтээлгэ сүрүннээн бу бөҕөстөр олорсуохтарын сөп.

74 кг Разамбек Жамалов (Дагестан). Айылҕаттан айдарыылаах тустуук. Маннык улахан таһымнаах түһүлгэҕэ аан бастаан бэйэтин күүһүн холонор. Онон хайдах тустара биллибэт. Бу ыйааһыҥҥа фаворитынан улахан уопуттаах Франк Чамизоны (Италия) ааттыахха сөп. Өссө Таймураз Салказанов (Словакия), Хаджимурад Гаджиев (Азербайджан), Азамат Нуриков (Беларусь), Нарсинг Ядав (Индия), Али-паша Умарпашаев (Болгария) курдук биллэр-көстөр тустууктар бааллар.

Сэрэйдэххэ, мэтээл иһин киирсии сүрүннээн бу ааттаммыт бөҕөстөр икки ардыларыгар буолара буолуо.

79 кг Ахмед Усманов (Дагестан). Россия быйылгы чемпиона, хамаанда дебютана. Миэстэлэһиэн сөп. Европа чемпиона Магомед-Хабиб Кадимагомедов (Беларусь), Азия чемпиона Арсалан Будожапов (Кыргызстан), турок Нури Котаноглу, Узбекистантан Рашид Курбанов уо.д.а. биллэр бөҕөстөр сайаапкаҕа киирбиттэр.

Уопсайынан даҕаны, бу түһүлгэҕэ кимнээх миэстэлэһиэхтэрин сөбүн арыый чопчу соҕустук, сэрэбиэй кэнниттэн эрэ этиэххэ сөп этэ. Ханныгын да иһин, сэрэбиэй элбэҕи быһаарар.

86 кг Даурен Куруглиев (Дагестан) — Европа чемпиона. Маннык састаапка, иранец Х.Яздани, американец Д.Тейлор суохтарына, чемпионнуон сөп.

Кини сүрүн утарсааччыларынан – аан дойду чемпионатын призердара Борис Макоев (Словакия), Дипак Пуниа (Индия), ону тэҥэ улахан таһымнаах күрэхтэһиилэргэ өрүү эриэ-дэхси көрдөрүүлэнэр Збигнев Барановскай (Польша), Петр Янулов (Молдова) мэтээлгэ тиксиэхтэрин сөбүн санатабын.

92 кг Алихан Жабраилов (Дагестан) — аан дойду чемпионатын призера. Маннык састаапка бастыан сөп. Былырыыҥҥы кыайыылаахтар: Д.Кокс (АХШ), А.Карими (Иран), И.Мцитури (Грузия) суохтар.

97 кг Абдулрашид Садулаев (Дагестан) — олимпийскай чемпион, аан дойду 4, Европа 5 төгүллээх чемпиона. Хамаанда хапытаана. Чемпион буолуохтаах диэн бүк эрэнэбин.

Ылан көрдөххө, утарсааччылара опыттаахтар, бары тэҥ баайыылаахтар. Холобур, Андрейцев (Украина), Нуров (Македония), Баран (Польша), Карадениз (Турция), Чебан (Молдова), Хуштын (Беларусь), Зубаиров (Азербайбаджан)… Онон сэрэбиэйтэн саҕалаан, хас биирдии хапсыһыы быһаарар оруоллаах буолуоҕа.

125 кг Шамиль Шарипов (Дагестан). Хамаанда дебютана. Мэтээлгэ тиксиэн сөп диэн ааҕабын. Бу ыйааһыҥҥа сайаапкаттан көрдөххө, былырыын аан дойду чемпионатыгар мэтээлгэ тиксибиттэртэн украинец Александр Хоцяновскай эрэ баар. Онон баһылыыр оруолу кини ылар.

Салгыы, опыттаах Д.Магомедовы (Азербайджан), Д.Лигетины (Венгрия), А.Лазаревы (Кыргызстан), Р.Бараны (Польша) ааттыахха сөп. Өссө манна тус санаабар, сэмээр Канада бөҕөһө “ытан кэбиһиэн сөп” курдук көрөбүн.

Онон түмүкээн эттэххэ, Россия хамаандата сүрүннээн Белград көбүөрүттэн – алта кыһыл көмүс мэтээли ылыан сөп диэн билгэлиибин. Хаалбыт түөрт бөҕөс – иккис, үһүс миэстэлэргэ олорсор кыахтаах. Ол төһө табатын-сыыһатын көбүөр көрдөрүө. Атын ырытааччылар эмиэ маннык билгэлээһиннэрин билэр киһи…

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *