Белград-2020: Конкурс кыайыылааҕа – Айсен Молуков!

Сербия киин куоратыгар Белградка ыытыллыбыт көҥүл тустууга Аан дойду Кубогар анаммыт инстаграмҥа (sakhasport_news) ыыппыт конкурспутугар кыайыылааҕынан Айсен Молуков буолла.

Манна даҕатан эттэххэ, Айсен Молуков биһиги тэрийбит конкурспутугар үһүс төгүлүн субуруччу бастаата. Ол курдук, былырыын Нур-Султаҥҥа буолбут көҥүл тустууга Аан дойду чемпионатыгар уонна быйыл Нарофоминскайга ыытыллыбыт Россия чемпионатыгар анаан ыыппыт конкурстарбытыгар кыайыылааҕынан буолбута.

Хаһан баҕарар буоларын курдук, конкурс икки ыйытыыттан турбута. Ыйааһыннарынан кыайыылаахтары ааттааһын уонна бэйэбит бөҕөстөрбүтүттэн кимнээх хаһыс миэстэни ылыахтарай диэн этэ.

Онуоха Айсен Молуков: 57 кг – Завур Угуев, 61 кг – Абасгаджи Магомедов, 79 кг – Ахмед Усманов, 86 кг – Даурен Куруглиев, 92 кг – Алихан Жабраилов, 97 кг – Абдулрашид Садулаев, 125 кг – Шамиль Шарипов (бары – россиялар) чемпионнуохтара диэн сылыктаабыта – туолла. Итиэннэ саха бөҕөстөрүттэн саамай ыарахан ыйааһыҥҥа Айаал Лазарев боруонса мэтээли ылыа диэн сөпкө билгэлээбит. Итинэн кини барыта 8 очкону ылан бастаата.

Оттон урукку өттүгэр эмиэ биһиги тустууга сыһыаннаах конкурстарбытыгар кыайыылааҕынан тахса сылдьыбыт Валерий Гаврильев, Иван Рожин уонна Егор КлепандинЕвгений Намскай – кыайыылаахтан 2 эрэ очконан хааллылар.

Кыайыылаах Айсен Молуковка өйдөбүнньүк бириис быһыытынан биллиилээх спортивнай суруналыыс Иван Кычкин хомуйан оҥорбут «Саха сирин тустууктара» диэн, саҥардыллан уонна эбиллэн бэчээттэммит кинигэнэн наҕараадаланна.

Айсен биһиги эрэ конкурстарбытыгар бастыыр буолбатах, соторутааҕыта “Спорт Якутии” сайт тэрийбит ыйытыгар эмиэ кыайан, харчынан наҕараадаламмыта. Кини кыайыытын кистэлэҥэ – спорт туһунан элбэҕи хасыһан ааҕа, билэ-көрө сатыыра буолар. Онон “Саха сирин тустууктара” – Айсеҥҥа биһиги республикабыт бастакы көлүөнэ тустууктарын туһунан ааҕан билэригэр көмө буолуоҕа диэн эрэниэҕиҥ.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *