Белград-2020: Бүгүн үс уолбут күрэхтэһиини саҕалыаҕа

Көҥүл тустууга Аан дойду Кубогар биирдиилээн бастыыр иһин түһүлгэтин иккис күнүгэр күрэхтэһиини үс уолбут саҕалыаҕа. Ол курдук, 61 киилэҕэ Польша чемпиона Эдуард Григорьев, 65 киилэҕэ Европа быйылгы чемпионатын үрүҥ көмүс призера Ньургун Скрябин уонна Румыния чемпиона Николай Охлопков.

Эрдэ, өссө иллэрээ күн оҥоһуллубут сэрэбиэй быһыытынан, Эдуард Григорьев финал 8/1-гэр армянин Размик Папикяны кытта тустар. Утарсааччыта маннык улахан таһымнаах түһүлгэҕэ аан маҥнай күүһүн холонор эдэр бөҕөс. Быйыл Ираҥҥа, Тахти кубогар 61 киилэҕэ бэһис буолбут. Оҕо сылдьан, 2016 сыллаахха Европа күрэхтэһиитигэр 46 кг ыйааһыҥҥа иккис миэстэлэнэ сылдьыбыт. Эдуард бу киһини ааһыахтаах. Оччоҕо сэрэйдэххэ, Россия чемпиона А.Магомедовка тахсыаҕа.

65 киилэҕэ Николай Охлопков квалификацияҕа перуанец Ауккапина Педрагас Сиксто Мигуэли кытты тустуунан күрэхтэһиини саҕалыыр. Перуанец киһи мээнэ сэнээбэт киһитэ. Хотугу Америка икки төгүллээх чемпиона, аан дойду чемпионатын кыттыылааҕа, быйыл Панамерика чемпионатыгар үһүс миэстэлээх. Ол да буоллар, биһиги уолбутугар эрэнэбит. Кини бөлөҕөр ханнык биллэр бөҕөстөр баалларый диир буоллахха, Гор Оганесян (Украина), Николай Грахмез (Молдова), Хаджи Мохамад Али (Бахрейн) бааллар.

Оттон Ньургун Скрябин күрэхтэһиини финал 8/1-тэн, поляк Кшиштоф Бьенковскайдыын тустуунан саҕалыыр. Бьенковскай – опыттаах бөҕөс. Сааһа 30-та. Тренерэ – Юсуп Абдусаламов. Кини Польшаҕа ыытыллыбыт Циолковскай мемориалын кыайыылааҕа. Норуоттар икки ардыларынааҕы турнирдар кыайыылаахтара уонна призердара, аан дойду уонна Европа чемпионаттарын кыттыылаахтара. Туох да диэ, манна эмиэ биһиги санаабытыгар, Ньургун кыайыахтаах.

Салгыы эргииргэ кини, финал чиэппэригэр И.Мухтаров (Франция) — И.Мукусаев (Венгрия) пааратын кыайылааҕын кытта тустарын күүтэбит. Өссө бу бөлөххө азербайджанец Хаджи Алиев, россиянин Гаджимурад Рашидов, кыргыз Эрназар Ахматалиев курдук биллэр-көстөр бөҕөстөр бааллар. Чэ, көбүөр көрдөрүө. Биһиги да көрүөхпүт, сыаналыахпыт.

Хапсыһыылар Саха сирин бириэмэтинэн киэһэ 19:00 чаастан саҕаланаллар. Ону Тустуу аан дойдутааҕы түмсүүтүн (UWW) Ютуб-каналыгар көрүөххэ сөп.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *