Белград-2020: Биһиги күммүт буолбатах эбит. Кыайыы антах хайыста

Көҥүл тустууга Аан дойду Кубогын бүтэһик күнүгэр 65 киилэҕэ кыттар икки уолбут тустар буолбуттарыттан, ханныктык эмэ эрэнэ санаабыппыт. Баҕар биирдэрэ эмэ боруонса мэтээли кытаахтаан ылыа диэн…

Көбүөргэ бастаан Ньургун Скрябин таҕыста. Утарсааччыта Францияттан кыттар чеченец Мухтаров. Бу бөҕөстөр урукку өртүгэр иккитэ көрсөн тураллар. Иккиэн биирдии кыайыылаахтар. Онон киһи мээнэ сэнээбэт киһитэ этэ.

Бастакы түһүмэххэ Ньургун киһитин атаҕыттан ылан охторон, салгыы накатка эргитэн 4:0 ахсаанынан баһыйан испитэ. Салгыы тустууга, иккис түһүмэх аҥаарыгар диэри кимэ сатаабакка, наар көмүскэнэ сырытта. Өр өтөр буолбата, киниэхэ сэрэтии биэрдилэр. Онтон анараа киһи атахха түспүтүн, мин көрдөхпүнэ, биһиги киһибит утары албастаабыта (обратнайдаабыта). Ону төттөрүтүн Мухтаровка икки баалы аахтылар. Итинтэн Ньургун ыһыллан хаалла быһыылаах. Хапсыһыы бүтүүтэ бэлэмэ суох атахха киирбитин, утарсааччыта эрийэ тардыытыгар – икки баалы аахтылар.

Онон ахсаан 5:4, француз туһатыгар буолла. Беларустар онно сөпсөспөккө кубик бырахтылар. Ону судьуйалар көрөн баран, бэйэлэрин санааларын уларыппатылар. Онон түмүккэ 6:4 ахсаанынан кыһыылаахтык хотторон кэбистибит.

Иккис бөҕөспүт Николай Охлопков – эдэрдэргэ Европа уонна аан дойду призера Николай Грахмезка эмиэ наһаа кыһыылаахтык хотторон кэбистэ. Хапсыһыы бүтэрэ биэс сөкүүндэ хаалыар диэри 2:1 ахсаанынан кыайан испитэ эбээт. Ону, төбөтүн куустара сылдьан «лампочка» диэн албаска эргиттэрэн, гонгу кытта тэҥҥэ 2 баалы сүүйтэрэн кэбистэ.

Онон бу күн табыллыбатыбыт. Скрябин уонна Охлопков оннуларыгар Мухтаров (Франция) уонна Грахмез (Молдова) күрэхтэһии боруонса мэтээлин иһин киирсэр буоллулар.

Петр ПАВЛОВ.                                                 

Добавить комментарий

Ваш адрес email не будет опубликован. Обязательные поля помечены *