Бастыҥ тренер – Николай Яковлев


“Кыайыы 50 сыла” Спорт дыбарыаһыгар сахалартан оҕолорго аан дойду маҥнайгы чемпиона Илларион Федосеев кэриэһигэр көҥүл тустууга республикатааҕы аһаҕас “Боотурдар оонньуулара” бэстибээл үһүс күнүгэр 2005-2006 сс. төрөөбүт оҕолорго күрэхтэһии түмүктэннэ.

Бэйэлэрин ыйааһыннарыгар кыайыылаахтарынан буоллулар: 26 кг – Айхал Васильев (Мэҥэ Хаҥалас), 28 кг – Артем Яковлев, 30 кг – Дима Федоров (иккиэн — Сунтаар), 32 кг – Тимур Портнягин (Уус Алдан), 35 кг – Дьулус Петров (Хаҥалас), 38 кг – Степа Охлопков (Чурапчы), 42 кг – Алеша Архипов (Сунтаар), 46 кг – Вася Григорьев (Бүлүү), 50 кг – Игорь Матвеев (Нам), 55 кг – Максим Кононов (Амма), 60 кг – Артем Петров, 65 кг – Сандал Пермяков, 70 кг – Роман Цыпденов (үһүөн — Дьокуускай), 70-тэн үөһэ кг – Анатолий Тимофеев (Нам).

Син эмиэ бэҕэһээҥҥитин курдук “Бастыҥ тренер” номинацияны Дьокуускай куорат 3 №-дээх спортивнай оскуолатын тренерэ, норуоттар икки ардыларынааҕы кылаастаах спорт маастара Николай Яковлев ылла уонна 30 тыһ. солк. сертификатынан наҕараадаланна. Вячеслав Стрекаловскай (Нам) иккис көрдөрүүлэнэн 20, Виталий Яковлев (Сунтаар) үһүс буолан 10 тыһ. солк. бириэмийэлэннилэр.

Оттон күрэхтэһии кылаабынай судьуйата, норуоттар икки ардыларынааҕы категориялаах судьуйа Аркадий Николаевич Тастыгин – бу түһүлгэҕэ судьуйалар үлэлэрин туһунан маннык билиһиннэрдэ:

”Боотурдар оонньууларыгар” гректии-римнии, кыргыттар уонна уолаттар тустууларыгар барыта 40 судьуйаны үлэлэтэ сылдьабыт. Норуоттар икки ардыларынааҕы категориялаах судьуйалар Петр Соловьев, Николай Николаев уонна мин итиэннэ Бүтүн Россиятааҕы категориялаах судьуйа Владислав Кривошапкин баарбыт. Бу, урукку судьуйалар, эрэллээх кадрдар үлэлэлээннэр, онон тэрийэн ыыта сылдьабыт. Итиэннэ саҥа күүстэр эмиэ кэлэн эрэллэр. Холобур, соторутааҕыта ыытыллан түмүктэммит улуу тренер Д.П. Коркин турнирыгар икки киһибит норуоттар икки ардыларынааҕы категориялаах судьуйа таһымыгар тахсан үлэлэстилэр: Дмитрий Лигер (Нерюнгри) уонна Александр Кузьмин (Чурапчы). Кинилэргэ аны категорияларын туттарыахтаахтар. Судьуйалары үүннэрэн таһаарыыга СР спортивнай тустуга федерацията үлэни оҥоро турар. Билигин аны Пермь куоракка буолуохтаах, судьуйалар семинардара, үс категорияҕа туттарыы. Онно эмиэ биһиги эдэр судьуйаларбыт бараары бэлэмнэнэ сылдьаллар. Билиҥҥи бириэмэҕэ категорияны туттарыы ирдэбилэ харчыга тахсар, долларга. Онон үбү-харчыны хантан эмэ спонсор буллахтарына тахсаллар. Тустуу баарын тухары – сайдыы баар. Онон ол ирдэбилгэ сөп түбэһиннэрэн, эдэрдэр син биир тахсан иһэллэр. Эдэр судьайалар бааллар, үлэлиэхтэрэ.

 

Добавить комментарий

Ваш адрес email не будет опубликован. Обязательные поля помечены *