Бастыҥ спортсменнары норуот таларын ууратыахха!

“Дьулурҕан” хаһыат интернеккэ сайтыгар куораттан спорду таптааччы Константин Стручков “Сыл бастыҥ спортсменнарын быһаарыы туһунан” диэн суруйуутун сэҥээрэн аахтым. Итиэннэ спорду биир сэҥээрээччи, ырытааччы аатыттан бэйэм санаабын этиэхпин баҕардым.

Олох сөптөөх суруйуу. Автор Константин Константинович Стручков миигин үөрэппит учууталым. Ити темаҕа Саҥа дьыл иннинэ элбэх группаҕа бэйэм санаабын суруйбутум, сорохтор өйөөбүттэрэ, өһүргэнэр, утарар да дьон баара. Төһө да норуоту убаастаабытым иһин, спорт бастыҥнарын норуот быһаарара олох сыыһа дии саныыбын. Бастакытынан норуот үксэ спорду билбэт, спортсменнар ситиһиилэрин билбэттэр.

Иккиһинэн, куоластааһын спортсмен ситиһиитинэн буолбакка, оройуоннарынан, табаарыстарынан, аймахтарынан уо.д.а барар, Стручков суруйбутун курдук. Уонна куоластааһыҥҥа үксүн кэрэ аҥаардар кытталлар, кинилэр бэйэ-бэйэлэрин наһаа үчүгэйдик өйөһөллөр. Ол түмүгүн көрдүгүт дии, Саха сирин бастыҥ спортсменнарынан барыта кэрэ аҥаардар буоллулар, эр дьон суоҕун курдук. Атын регионнар күлбүт буолуохтаахтар.

Дуобакка Аан дойду классикаҕа чемпиона Андрей Федотов бэйэтин номинациятыгар бастыахтаах этэ диэн, элбэхтэ суруйбутум. Оттон Олимп көрүҥнэригэр Айаал Лазарев ситиһиитин намтатыы таҕыста диэн эмиэ мөккүһэн турабын. Дьиҥинэн бу темаҕа санаа элбэх этэ. Кэлэр сылларга бастыҥнары норуот таларын ууратыахха наада. Бу – Ил Дарханы, эбэтэр Ил Түмэн депутаттарын  талыы буолбатах. Онон сыл бастыҥ спортсменнарын – спорт журналистар, спорт салалтата кыттыылаах анал комиссия быһаарыахтаах дии саныыбын! Мин санаам  итинник.

Анатолий МУРУНОВ.

Таатта.

Добавить комментарий

Ваш адрес email не будет опубликован. Обязательные поля помечены *