Бастакы оонньууларга республика чиэһин чысхааннар көмүскээтилэр

Республикатааҕы Медиа-кииҥҥэ Бүтүн Россиятааҕы любитель спортсменнар кыһыҥҥы оонньууларын кыттыылаахтара суруналыыстары кытта көрүстүлэр. Биллэрин курдук, бу дьыл олунньу 22-25 күннэригэр Удмуртияҕа Бүтүн Россиятааҕы бастакы любитель спортсменнар кыһыҥҥы оонньуулара ыытылынна.

Ижевскэйгэ, спортсменнар – кыһыҥҥы триатлоҥҥа, сноубордка, керлиҥҥэ уонна хайыһарынан сүүрүүгэ күрэхтэстилэр. Спорт атын көрүҥнэригэр күрэхтэһиилэр Москваҕа, Коломнаҕа, Чайковскайга ыытылыннылар. Бу саҥа сонун күрэхтэһии “Спорт – норма жизни” федеральнай бырайыак чэрчитинэн тэрилиннэ. Манна, Россия 48 регионуттан, ол иһигэр биһиги республикабытыттан 1000 любитель-спортсмен күөн көрүстэ.

Медиа-кииҥҥэ көрсүһүүнү М.К. Аммосов аатынан Хотугулуу Илиҥҥи федеральнай университет преподавателэ, физико-математическай наука кандидата Екатерина Семеновна Никитина иилээн-саҕалаан ыытта. Билэргит курдук, Екатерина Семеновна иллэҥ кэмигэр хайыһар спордунан үлүһүйэн дьарыктанар, спорт бу көрүҥүн сайыннарыы ахсаабат пропагандиһа, “Чысхаан” хайыһар спортивнай кулуубун салайар.

Бүтүн Россиятааҕы любитель спортсменнар оонньууларыгар балаһыанньа быһыытынан, 30-гар диэри саастаах, бу кэмҥэ диэри дойду уонна регион сүүмэрдэммит хамаандатыгар киирбэтэх спортсменнар кытталлар эбит. Ижевскэйдээҕи оонньуулары үөрүүлээхтик аһыыга Россия Физическэй култуураҕа уонна спорка миниистирин солбуйааччы Марина Томилина кыттыыны ылан, спортсменнары эҕэрдэлээтэ. Бу да түгэн, оонньуулар улахан суолталаахтарын, наадалаахтарын көрдөрөр. Санатан эттэххэ, Ижевскэй куорат – биллиилээх, аатырбыт хайыһардьаттар үүнэн, сайдан тахсыбыт куораттара. Онон хайыһар күрэхтэһиитэ сүрдээх үрдүк таһымнаахтык, тэрээһиннээхтик ыытыллыбыта ахтылынна.

Биһиги хайыһардьыттарбыт мантан, томороон тымныыттан сылаас Ижевскэйгэ тиийэн, климатическай ыарахаттары көрсөн, хамаанда салайааччыта иһитиннэрбитинэн, бэйэлэрин кыахтарын толору туһамматахтар. Барыта 44 регионтан, хайыһар спордун түөрт түһүмэҕин түмүгүнэн 14-с миэстэни ылбыттар. Дьиҥэ, бу үчүгэй көрдөрүү. Маны таһынан, бастакы оонньууларга чысхааннар кулуубунан күрэхтэһиигэ 17 хамаандаттан – ахсыс буолбуттар. Бу эмиэ куһаҕана суох көрдөрүү.

Ити курдук иһитиннэрэн туран, Екатерина Никитина, республикаҕа хайыһар спорда сайдыытыгар баар харгыстары билиһиннэрдэ. Ол курдук, республикабыт киин куоратыгар үчүгэй, хайыһар трассата суоҕун ыйда. Ижевскэйгэ Саха сирин чиэһин көмүскээбит 17 спортсмен бары бэйэлэрин үптэригэр-харчыларыгар баран кыттан кэлбиттэрин эттэ. Манна даҕатан эттэххэ, атын регионнар тустаах министиэристибэлэрин өйөбүллэринэн кыттыбыттар.

Екатерина Семеновна, Бүтүн Россиятааҕы любитель спортсменнар кыһыҥҥы оонньууларыгар бараары сылдьан СР Физическэй култуураҕа уонна спорка министиэристибэтигэр өйүүллэригэр, күүс-көмө буолалларыгар көрдөспүтүгэр – аккаас ылбытыттан хомойбутун биллэрдэ. Итиэннэ, республикаҕа любитель-спортсменнар ассоциацияларын тэрийэргэ уонна ону көҕүлүүргэ этиитэ болҕомтоҕо ылылла илигин санатта.

Ылан көрдөххө, быйыл любителлэр кыһыҥҥы көрүҥнэргэ күрэхтэспит эбит буоллахтарына, эһиил спорт сайыҥҥы көрүҥнэрин оонньуулара ыытыллар эбит. Онно биһиги республикабыт бэлэмнэнэр дуо, диэн ыйытыы үөскүүр.

Петр ПАВЛОВ.

Ааптар хаартыскаҕа түһэриитэ.  

Добавить комментарий

Ваш адрес email не будет опубликован. Обязательные поля помечены *