Бастакы күн сэттэ мэтээл!

 

Бурятия киин куоратыгар саҕаламмыт көҥүл тустууга эр дьоҥҥо Дальнай Восток федеральнай уокуругун чемпионатын бастакы кыайыылаахтара быһаарылыннылар. Ол курдук, бүгүн эр дьоҥҥо 57, 86, 125 кг ыйааһын киирсиилэрэ түмүктэннилэр.

Чемпионат үөрүүлээх аһыллыытыгар Саха Республикатын Спорка бэлэмнэнии киинин дириэктэрин бастакы солбуйааччы Михаил Пахомов уонна биһиги республикабыт көҥүл тустууга сүүмэрдэммит хамаандатын консультант-тренерэ, олимпийскай чемпион Хаджимурад Гацалов кыттыыны ыллылар, түһүлгэ тэрийээччилэрин, олохтоохтору эҕэрдэлээтилэр уонна ким күүстээх – кыайарыгар баҕардылар.

57 киилэҕэ Уйгулаан Иванов (тренерэ Иван Дмитриев) ситиһиилээхтик туһунна. Кини бастаан Мягмар Далаевы (Бурятия) 4:0, салгыы күрэхтэһиигэ бэйэтин дьоно Дмитрий Илларионовы 5:1 уонна финалга Федор Постниковы 2:1 ахсааннарынан кыайталаата.

Бу ыйааһыҥҥа киһи эрэ барыта эрэммит дьоно, бырааттыы Петр уонна Алексей Копыловтар табыллыбатылар. Петр бастакы эргииргэ Егор Вензельгэ ыраастык хотторон кэбистэ. Оттон Алексей бурят Жаргал Баяндуевы 10:0 кыайан баран, салгыы эргииргэ Дьулустаан Федотовка 4:8 хотторон кэбистэ.

Онон бастакы ыйааһыҥҥа бириистээх миэстэни наар бэйэбит уолаттарбыт ыллылар.

Атын ыйааһыннарга, Никита Софронов (86 кг) уонна Никита Хабаров (125 кг) төһө да бастаабатахтарын иһин, үчүгэй тустуулары көрдөрдүлэр. Манна даҕатан эттэххэ, хас ыйааһын ахсын үс бириистээх миэстэҕэ киирбиттэр – Россия чемпионатыгар кыттар быраабы ыллылар.

Аны сарсын бырагыраама быһыытынан – 61, 65, 92, 97 кг ыйааһыннаахтар көбүөргэ күөн көрсүөхтэрэ.

Чемпионат бастакы күнүн түмүгэ:

57 кг 1. Уйгулаан Иванов, 2. Федор Постников, 3. Егор Вензель, Дмитрий Илларионов (бары – Саха сирэ).

86 кг 1. Алексей Сабидаев (Бурятия), 2. Никита Софронов, 3. Алексей Ефимов (иккиэн – Саха сирэ), Виктор Будаев (Забайкальскай кыраай).

125 кг 1. Балдан Цыжипов, 2. Батор Доржиев (иккиэн – Бурятия), 2. Никита Хабаров (Саха сирэ).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *