Бастаабыттар мэтээллэринэн, грамоталарынан, харчынан наҕараадаланнылар

Бу күннэргэ, Саха  Республикатын үөрэҕириигэ туйгуна, Уус Алдан улууһун 2-с Лөгөй нэһилиэгин бочуоттаах гражданина, тыыл уонна педагогическай үлэ бэтэрээнэ Анна Алексеевна Бурцева аатын үйэтитэн саахымакка уонна дуобакка биирдиилээн уонна хамаанданан бастыыр иһин ыытыллыбыт үбүлүөйдээх республиканскай онлайн-турнир түмүктэннэ.

Турнир балаһыанньатын быһыытынан саахымакка уонна дуобакка иккилии группаҕа арахсан оонньоотулар.

Бастакы группаҕа бары биир оскуолаттан тэриллибит хамаандалар кытыннылар, иккис группаҕа спортивнай оскуолалар, оройуон сүүмэрдэммит хамаандалара уонна хамаанда састаабыгар сатаан киирбэтэх оонньооччулартан түмүллүбүт хамаандалар оонньоотулар.

Барыта ситим нөҥүө 412 эдэр оонньооччу кыайыы иһин турууласта.

Саахымакка бастакы группаҕа оскуолалар икки ардыларыгар хамаандалар ортолоругар өрүүтүн республиканскай күрэхтэһиилэргэ бастыыр Дьокуускай куорат 2 нүөмэрдээх оскуолата 31,5 очколаах атыттары ырааҕынан сабырыйда. Хаҥалас улууһуттан Булгунньахтаах оскуолатын хамаандата 24,5 очколаах иккис миэстэни ылары ситистэ. Үһүс миэстэҕэ тилэх үктээн Бүлүү гимназията 23,5 очколаах үөрүүнү үллэһиннэ.

Иккис группаҕа республика спортивнай оскуолалара, улуус сүүмэрдэммит хамаандалара уонна хамаандаларга сатаан киирбэтэх оҕолору мунньан тэриллибит хамаандалар оонньоотулар.

Бу группаҕа эрэллээхтик, кыайыыттан-кыайыы доҕуһуоллаах Уус Алдан хамаандата 35 очколаах бастаата. Иккис миэстэни тус-туһунан оскуолалартан сүүмэрдэммит хамаанда (НПСОШ-2, ЯГНГ, Мүрүтээҕи СОШ-2) үөрэнээччилэрэ 26 очколаах ылла. Үһүс миэстэ кирбиитигэр үөһээ бүлүүлэр (23 очколаах) үктэннилэр.

Дуобат оонньуутугар бастакы группаҕа мэльдэхсилэр бастакы хамаандалара кыайыыны ситистэ (74 очко). Иккис миэстэни Амма-Наахаратын үөрэнээччилэрэ 66  очколанан ыллылар. Үһүс миэстэҕэ мэльдэхсилэр 58 очколаах иккис хамаандалара буолла. Уопсайынан, Мэҥэ Хаҥалас Мэлдьэхси оскуолатын оҕолоро үчүгэй бэлэмнээхтэрин көрдөрдүлэр.

Иккис группаҕа 71 очколаах Горнай спортивнай оскуолатын хамаандата тэбис-тэҥҥэ эрдинэн, биэтэк кыайыы кирбиитин инникинэн буллулар. Иккис миэстэни Нам спортивнай оскуолатын үһүс  хамаандата буолла, 52 очколаах. Үһүс миэстэ – Амма спортивнай оскуолатыгар тигистэ.

Күрэхтэһии ситим нөҥүө 7 туурдаах буолла.

Саахымат уонна дуобат программалара тус-туһунан уратылаахтар этэ. Күрэхтэһии буолуон иннинэ икки күн саҥа киирэн оонньооччуларга анаан эрчиллии-күрэхтэһиилэри тэрийбиппит. Үөрэнээччилэр ортолоругар республикабытыгар бу маннык киэҥ хабааннаах күрэхтэһии ситим нөҥүө аан бастаан тэрилиннэ. Саҥа оонньуур кыттааччылар кылгас бэриллибит бириэмэҕэ оонньууну  ыытан кэбиһимээри, ыксааннар оҥорор сыысхаллара ханна барыай? Баар бөҕө  буоллаҕа. Сорохторго оонньуу олордохторуна уоттара баран, күрэхтэһиилэрин тохтоттулар.

Биэс сүүс курдук сертификат ситим нөҥүө тарҕатыллан, кыттыбыт оҕолорго, хамаандалары тэрийсибит үлэһиттэргэ туттарыллыа. Группаларыгар кыайбыт хамаандаларга — кубоктар, хамаанда састаабыгар барыларыгар миэстэлэринэн мэтээллэр, грамоталар туттарыллыахтара.

Биирдиилээн группаларыгар дуоскаларынан кыайбыттарга – мэтээллэр, грамоталар уонна А.А. Бурцева оҕолорун, аймахтарын ааттарыттан бастаабыттарга — 1000, иккис миэстэлээхтэргэ — 500, үһүстэргэ — 300 солк. харчынан бириистэр туттарылыннылар.

Тулуна орто оскуолата икки бирииһи туруорар.

Биирдиилээн түмүккэ дуобакка бастаатылар (бастакы группаҕа): Сайдам Стручков (ДЮСШ-5, Дьокуускай), Аля Колодезникова (Горнай), Айсен Егоров (Хаҥалас), Юлия Никанорова (Нам), Виталий Заровняев (Горнай), Тунаара Федорова (Горнай).

Иккис группаҕа: Петр Тимофеев, Прокопий Говоров, Кирилл Алексеев (Мэҥэ Хаҥалас, Мэлдьэхси), Капитолина Оконешникова (Дьокуускай), Виолетта Сергеева, Юлия Устинова (Амма, Амма-Наахара).

Оттон саахымакка бастаатылар (бастакы группаҕа): Артур Васильев, Виктория Степанова, Никита Находкин (үһүөн — Дьокуускай 2 № оскуолата), Кристина Попова, Павел Бережных (иккиэн – Дьокуускай 21 № оскуолата), Кристина Ефремова (Хаҥалас, Булгунньахтаах).

Иккис группаҕа: Айаар Колесов, Айтал Тарскай, Денис Назаров (Уус Алдан), Сайаана Аргунова, Евдокия Избекова (холбоһуктаах хамаанда), Айталина Николаева (Үөһээ Бүлүү).

Күрэхтэһиини иилээн-саҕалаан ыыппыт тэрийээччилэргэ: “Юные якутяне” тэрилтэҕэ, Тулуна оскуолатын коллективыгар, 2-с Лөгөй нэһилиэгин салалтатыгар, Бурцева А.А. оҕолоругар,  аймахтарыгар Улахан Махтал! Оҕолорго үөрэхтэригэр, сөбүлүүр дьарыктарыгар ситиһиини! Толкуйдааҥ! Кыттыҥ! Кыайыҥ!

Гаврил ВИНОКУРОВ, күрэхтэһии кылаабынай судьуйата, ФМЖД международнай арбитра, республикатааҕы Дуобат-саахымат киинин инструктора.

 

Добавить комментарий

Ваш адрес email не будет опубликован. Обязательные поля помечены *