Ат сүүрдүүтэ – Манчаары оонньууларын биир сүрүн көрүҥүнэн буолуо

 

Сэтинньи 13 күнүгэр “Саха” национальнай көрдөрөр-иһитиннэрэр хампаанньа “Тэтим” радионан быһа биэриитигэр Саха Республикатын физическэй култуураҕа уонна спорка миниистирэ Иннокентий Юрьевич Григорьев кыттыыны ылбыта.

Быһа биэриигэ: “Биһиэхэ, сахаларга ат сүүрдүүтэ улахан оруолу ылар. Манан сибээстээн эһиил Горнайга ыытыллыахтаах “Манчаары оонньуулара” спорт национальнай көрүҥнэригэр спартакиадаҕа ат сүүрдүүтэ хайдах буолуой?”, — диэн ыйытыы киирбитэ.

Онно Иннокентий Григорьев: “Ат сүүрдүүтэ – Манчаары оонньууларын программатын биир сүрүн көрүҥүнэн буолар. Горнайдар манна бэлэмнэнэн, ипподромнарын бары ирдэбиллэргэ эппиэттиир гына саҥардан, тупсаран оҥордулар. Сүүрдүү биэс дистанцияҕа ыытыллыаҕа. Билиҥҥитэ оонньууга ат сүүрдүүтүн балаһыанньата бүтэһиктээхтик бигэргэнэ илик. Манна даҕатан эттэххэ, билигин Ат оонньуулара диэн саҥа федерация тэриллэн эрэрин иһитиннэрэбин. Ат спорда диэн бу аҥардас сүүрдүү эрэ буолбатах…”, — диэн хоруйдаабыта.

Барыллааһын бырагыраама быһыытынан, 2400 миэтэрэ дистанцияҕа соҕурууттан аҕалыллыбыт ыраас хааннаах сылгылар сүүрүөхтээхтэр. Ити курдук 1600, 3200 м дистанцияларга Саха сиригэр төрөөбүт ыраас хааннаах сылгылар илин-кэлин түсүһүөхтээхтэр. Оттон 3200 уонна 4800 м дистанцияларга саха сылгылара күөн көрсүөхтээхтэр.

Оонньууларга кыттар сылгылар Саха сирин ат спордугар федерациятынан бигэргэммит буолуохтаахтар. Сүүрүк аты уларсыкка (арендаҕа) ылыы көҥүллэммэт. Хамаандалар толору састааптаах буолуохтаахтар. Ол аата, бары дистанцияларга барытыгар кыттыахтаахтар.

Санатан эттэххэ, Горнайга ыытыллыахтаах Манчаары оонньууларын ат спордугар күрэхтэһиитин балаһыанньата билигин бигэргэтиигэ сылдьар.

Петр ПАВЛОВ.  

 

 

Добавить комментарий

Ваш адрес email не будет опубликован. Обязательные поля помечены *