Ат спордун федерацията бастыҥнары быһаарда

Саха Республикатын ат спордугар федерацията 2020 сыллааҕы түмүктэри таһаарда.

Сыл бастыҥ тренеринэн СР Аҕа баһылыгын кубогын уонна үс саастаах биэлэр сырсыыларын (ОКС) кыайыылааҕа В.А. Игнатьев (Мэҥэ Хаҥалас) ааттанан – грамотанан уонна анал кубогынан наҕараадаланна. Бу номинацияҕа иккис-үһүс миэстэлэри тренердэр Н.Н. Громов (Амма), Д.С. Осипов (Чурапчы) ыллылар. Кинилэр грамотанан бэлиэтэннилэр.

2020 сылга бастыҥ сүүрдээччитин аатын В.В. Петров (Мэҥэ Хаҥалас) ылла. Кини бу кыайыытыгар С.В. Тимофеевы (Амма) уонна А.А. Куличкины (Чурапчы) иккис-үһүс миэстэлэргэ үтүрүйдэ.

Маны тэҥэ үгэс быһыытынан саастарынан арааран бастыҥ сүүрүүк сылгылары быһаардылар. Ол курдук, Саха сиригэр төрөөбүт 4 саастаахтарга – Саха Республикатын Правительствотын бирииһин кыайыылааҕа Сандал (Нам) бастыҥынан ааҕылынна. Иккис миэстэни Марокко (Ньурба), үсүһү Сайбер Шот (Мэҥэ Хаҥалас) ыллылар.

2 саастаахтарга бастыҥнарынан Дрим Шот (Мэҥэ Хаҥалас), Нумизматик (Үөһээ Бүлүү), Арктика (Мэҥэ Хаҥалас) ааҕылыннылар.

Оттон 3 саастаахтарга – Дерби кыайыылааҕа Түмэн (Хаҥалас), Николь (Мэҥэ Хаҥалас), Губернатор (Чурапчы).

Тастан аҕалыллыллыбыт сылгыларга бастыҥынан Брокер Барс (Мэҥэ Хаҥалас) ааттанна. Иккис миэстэни Мэйзи Кинг (Амма) ылла. Үһүскэ Майн Кениг (Чурапчы) тигистэ.

Ити курдук, «Сыл спринтерэ» бириис – Суфражисткаҕа (Нам), «Сыл майлера» — Майг Кенигкэ (Чурапчы), «Сыл стайера» — Сандалга (Нам) ананнылар.

Номинацияларга бастыҥнар – өйдөбүнньүк кубоктарынан уонна грамоталарынан, оттон иккис-үһүс миэстэлээхтэр грамоталарынан наҕараадаланнылар.

2020 сыл бастыҥ үлэлээх федерациятынан – Мэҥэ Хаҥалас улууһун федерацията (председатель Валерий Кретович Исаков) ааттанна. Иккис миэстэни Чурапчы, үсүһү – Амма ыллылар.

Кыайыылаахтары барыларын эҕэрдэлиибит уонна үүммүт сылга өссө ситиһиилээхтик кытталларыгар баҕарабыт!

«Дьулурҕан».

 

Добавить комментарий

Ваш адрес email не будет опубликован. Обязательные поля помечены *