Арыйан Тютрин уонна Виктор Рассадин бастаатылар!


Күрэхтэһии үөрүүлээх аһыллыытыгар Саха Республикатын Аҕа баһылыгын эбээһинэһин толорооччу Айсен Николаев, Тустуу аан дойдутааҕы түмсүүтүн (UWW) бэрэстэбиитэлэ Ким Ик Джонг, Россия көҥүл тустууга сүүмэрдэммит хамаандатын кылаабынай тренерэ Дзамболат Тедеев, турнир кылаабынай судьуйата Владимир Секлецов бэйэлэрин эҕэрдэлэрин тиэртилэр.

Ол курдук, Россия Спорка министиэристибэтин бирикээһинэн Сурдлимпиада-2017 көҥүл тустууга чемпиона Василий Стрекловскайга “Россия спордун үтүөлээх маастара” аат иҥэрилиннэ. Ити курдук, улуу тренер Д.П. Коркин үбүлүөйдээх турнирынан сибээстээн Гаврил Яковлевка (Чурапчы) — “Гражданскай килбиэн” бэлиэтэ, оттон Дзамболат Тедеевкэ Саха сирэ Россияҕа холбоспута 385 сылынан үбүлүөйдээх бэлиэ туттарылыннылар.


Тустуу аан дойдутааҕы түмсүүтүн (UWW) бэрэстэбиитэлэ – Д.П. Коркин огдообото Александра Семеновнаҕа, Чурапчытааҕы музей дириэктэрэ Егор Васильевич Пудовка уонна Россия спортивнай тустууга федерациятын вице-президенэн үлэлии сылдьыбыт Михаил Ильич Эверстовка өйдөбүнньүк бэлэхтэри туттаран баран, бэйэтин эҕэрдэтин “Якутия Уруй! Айхал!” диэн этиинэн түмүктээн, сааланы толору мустубут дьон улахан кэрэхсэбиллэрин ылла. Санатан эттэххэ, быйылгы, улуу тренер Д.П. Коркин төрөөбүтэ 90 сылыгар аналлаах турнирга барыта 33 дойдуттан 251 бөҕөс күөн көрсөр, кинилэр ортолоругар 16 олимпиец баара, түһүлгэ таһымын үрдэтэр.

ССРС, РСФСР, Саха АССР үтүөлээх тренерэ Дмитрий Коркин аатынан көҥүл тустууга норуоттар икки ардыларынааҕы Гран-при турнир бастакы күнүн түмүгэ

57 кг (34 кыттааччы): 1. Арыйаан Тютрин (Россия, Саха сирэ), 2. Парвиз Ибрагимов (Азербайджан), 3. Димчик Ринчинов (Беларусь), 3. Тамир Гармаев (Россия, Бурятия), 5.Виталий Эспек (Россия, Саха сирэ), 5. Рикуто Араи (Япония).
65 кг (29 кыттааччы): 1. Виктор Рассадин (Россия, Саха сирэ), 2. Тумур-Очир Тулга (Монголия), 3. Даулет Ниязбеков (Казахстан), 3. Алексей Боровицкай (Россия, Бурятия), 5.Саятбек Окасов (Казахстан), 5. Баяр Цыренов (Россия, Бурятия).
74 кг (19 кыттааччы): 1. Никита Сучков (Россия, Красноярскай), 2. Франк Чамизо (Италия), 3. Исраил Касумов (Россия, Красноярскай), 3. Гаджимурад Омаров (Азербайджан), 5. Усманов (Россия, Дагестан), 5. Герман Устинов (Россия, Саха сирэ).
86 кг (16 кыттааччы): 1. Ахмад Базри (Иран), 2. Арсенали Мусалалиев (Россия, Дагестан), 3. Сослан Кцоев (Россия, Хотугу Осетия), 3. Уйтумен Оргодол (Монголия), 5. Александр Зеленков (Россия, Красноярскай), 5. Вилли Хейно (Финляндия).
97 кг (13 кыттааччы): 1. Нурмагомед Гаджиев (Азербайджан), 2. Батзул Улзисайхан (Монголия), 3. Игорь Овсянников, 3. Юрий Белоновскай (иккиэн – Россия, Красноярскай), 5. Хаджи Салех (Иран), 5. Эрик Джиоев (Россия, Красноярскай).

Петр ПАВЛОВ.

Добавить комментарий

Ваш адрес email не будет опубликован.