Арыйан Тютрин – турнир кыайыылааҕа

Кемерово куоракка көҥүл тустууга “Шахтерская слава” норуоттар икки ардыларынааҕы турнир түмүктэннэ. Эрдэ иһитиннэрбиппит курдук, бу түһүлгэҕэ саха тустууга кыһатын уон иитиллээччитэ күрэс былдьаста.

Биир дойдулаахтарбыт салгыы хайдах күрэхтэспиттэрин билиһиннэрдэххэ, 57 киилэҕэ “уоскутар” бөлөххө Алексей Копылов – серб Манчиһы 10:0, красноярец Н.Эркембаевы 6:3 ахсааннарынан кыайталаан баран, турнир боруонса мэтээлин ким ыларын быһаарсыыга бурят Жаргал Дамдиновка 3:3 ахсааҥҥа хотторуулааҕынан ааҕылынна. Манна даҕатан эттэххэ, Дамдинов эдэрдэргэ Россия күрэхтэһиитин кыайыылааҕа, аҕыйах сыллааҕыта Роман Дмитриев турнирыгар бастыы сылдьыбыт биллэр бөҕөс.

Оттон Уус Алдан ыччата Арыйан Тютрин (57 кг) бүтэһик быһаарыылаах хапсыһыыга бурят Тамир Гармаевы мин көрдөхпүнэ 9:6 ахсаанынан итэҕэтиилээхтик хотто. Манна Тютрин очукуонан баһыйтаран иһэн, иккис түһүмэххэ киирэн атахтаан баран “ныроктыыр” курдук тиэрэ көтөн 4 баалы сурунна. Салгыы тустууга бурят бөҕөһө атахха түспүтүн утар албастаан (обратнай) эмиэ 4 баалы ылла. Манна буряттар сөбүлэспэккэ кубик быраҕа сырыттылар да, судьуйалар ону ылымматылар, онон Арыйааҥҥа эбии биир баалы биэрдилэр. Уопсайынан, баһыйа тутта. Өссө бастакы түһүмэххэ биир түгэҥҥэ ныроктаары бэйэтэ ыксаан, аллараа баттата сырытта. Онон Арыйан Тютрин кылгас кэм иһигэр икки норуоттар икки ардыларынааҕы турнирга кыайыылааҕынан тахсан, бэйэтин ыалдьааччыларын үөртэ. Маннык буоллаҕына, кини өссө улахан үрдэлгэ чарапчыланар кыахтааҕын көрдөрдө. Түгэнинэн туһанан. Арыйаны уонна кини тренерэ Иван Дмитриеви бу ситиһиилэринэн эҕэрдэлиэҕиҥ!

61 киилэҕэ Ньургун Александров утарсааччыта Сальгадо (Эквадор) туста тахсыбакка, быһа кыайыыны ылан баран, үһүс миэстэни былдьаһыыга казах К.Амиртаевка 3:8 ахсаанынан сабырыйтаран, бэһис буолла. Оттон Николай Охлопков “уоскутар” бөлөххө утуу-субуу Евглевскайы (Кемерово), Якименконы (Красноярскай) 10:0 ахсаанынан хотон баран, боруонса иһин тустууга бурят Зунтоевы 11:6 кыайда.

70 киилэ финалыгар Тимур Николаев – Н.Хизриевка (Красноярскай) 1:3 ахсаанынан хотторон, иккис миэстэни ылла.

92 кг ыйааһыҥҥа Ньургун Сергин бастакы миэстэ иһин венгр Д.Тоту кытта тустуутугар тоҥолоҕун таһааран кэбиһэн, хоттордо.

Онон, Кемерово көбүөрүттэн саха тустууктара: Арыйан Тютрин – кыһыл көмүс, Тимур Николаев уонна Ньургун Сергин – үрүҥ көмүс уонна Николай Охлопков – боруонса мэтээллэри ылары ситиһэн, саха тустууга оскуолата билигин даҕаны күүстээҕин итэҕэттилэр. Манна даҕатан эттэххэ, хамаанданы СР үтүөлээх тренерэ, ССРС спордун маастара Егор Николаевич Старостин тренер быһыытынан салайан илдьэ сылдьыбытын, СР тустууга федерациятын толорооччу дириэктэрэ, норуоттар икки ардыларынааҕы категориялаах судьуйа Николай Николаев судьуйа быһыытынан үлэлээбитин уонна СР үтүөлээх тренерэ Николай Егорович Степанов турнир Бочуоттаах ыалдьытын быһыытынан сылдьыбытын билиһиннэрэр оруннаах.

Турнир түмүк көрдөрүүтэ:

57 кг: 1. Арыйан Тютрин (Саха сирэ), 2. Тамир Гармаев (Бурятия), 3. Занданбуд Занабазар (Монголия), 3. Жаргал Дамдинов (Бурятия), 5. Алексей Копылов (Саха сирэ).

61 кг: 1. Юлиан Гергенов (Иркутскай), 2. Галиб Алиев (Азербайджан), 3. Кайрат Амиртаев (Кемерово), 3. Николай Охлопков (Румыния), 5. Ньургун Александров (Саха сирэ).

65 кг: 1. Сирожиддин Хасанов (Узбекистан), 2. Начын Куулар (Красноярскай), 3. Чингис Котчин (Кемерово), 3. Алексей Боровицкай (Бурятия).

70 кг: 1. Надирбег Хизриев (Красноярскай), 2. Тимур Николаев (Саха сирэ), 3. Кирилл Корнеев (Кемерово), 3. Иван Филиппов (Красноярскай).

74 кг: 1. Муса Базиев (Чечня), 2. Арсалан Будажапов (Бурятия), 3. Александр Григорович (Беларусь), 3. Эртине Мортуй-Оол (Кемерово).

79 кг: 1. Али Шабанов (Беларусь), 2. Тажудин Акаев, 3. Магомед Рамазанов (иккиэн — Москва), 3. Мартин Обст (Германия).

86 кг: 1. Збигнев Барановски, 2. Себастьян Жезиржански (иккиэн – Польша), 3. Иван Костерин (Кемерово), 3. Ахмед Дударов (Германия).

92 кг: 1. Бендегуз Тот (Венгрия), 2. Ньургун Сергин (Саха сирэ), 3. Ламберт Харонов (Кемерово), 3. Илисхан Чилаев (Казахстан).

97 кг: 1. Нурмагомед Гаджиев (Азербайджан), 2. Игорь Овсянников (Красноярскай), 3. Дмитрий Кулиш (Кемерово), 3. Эрик Тиле (Германия).

125 кг: 1. Роберт Баран, 2. Камил Кациолек (иккиэн – Польша), 3. Остап Пасенок, 3. Павел Кривцов (иккиэн – Кемерово).

Добавить комментарий

Ваш адрес email не будет опубликован.