Арыйаан Тютрин уонна Ньургун Скрябин – Беларусь чемпионнара!

 

Минскэй куоракка Беларусь Республикатын көҥүл тустууга чемпионата ыытыллан түмүктэннэ. Саха сирин тустууга кыһатын иитиллээччилэрэ куруук буоларыныы, ситиһиилээхтик кытыннылар. Бу сырыыга үс бөҕөс тустан, үһүөн мэтээлгэ тигистилэр.

Ол курдук, быйылгыттан бу дойдуттан кыттарга суоттанар Арыйаан Тютрин (57 кг) бастакы холонуутугар кыайыы көтөллөннө. Бүтэһик быһаарыылаах хапсыһыыга кини Дмитрий Шамелоны 5:0 ахсаанынан итэҕэтиилээхтик хотто. Манна даҕатан эттэххэ, Арыйаан бу чемпионакка утарсааччыларыгар биир да баалы биэрбэтэ.

Минскэй көбүөрүгэр Арыйаан барыта түөрт утарсааччытын улаханнык илистибэккэ кыайталаата. Манна уолбут тустар таһыма кинилэртэн быдан үрдүк буолан, этэргэ дылы, улахан утарсыыны көрсүбэккэ бастаата. Аны киниэхэ Беларусь хамаандатын аатыттан аан дойду күрэхтэһиилэрин ааннара аһылыннылар диэххэ сөп.

65 кг Ньургун Скрябин үс утарсааччытын эмиэ бэрт холкутук кыайталаата. Финалга Анатолий Громыконы киирээт атахтаан түһэрэн баран, «крест» диэн албаска эргитэн, хапсыһыыны болдьоҕун иннинэ очукуонан ыраастык кыайда. Итиэннэ Беларусь Республикатын көҥүл тустууга икки төгүллээх чемпионунан буолла.

Орто Халыма ыччата Андрей Бекренев (65 кг) утарсааччытын Егор Удовиковы 7:0 ахсаанынан хотон, син эмиэ былырыыҥҥытын курдук, Беларусь чемпионатын боруонса призерунан буолла.

Түгэнинэн туһанан чемпионнары бэлэмнээбит тренердэри: Иван Дмитриеви уонна Гаврил Игнатьевы бу кыайыынан эҕэрдэлээн кэбиһиэххэ!

Бу ситиһиинэн бөҕөстөрбүт олимпийскай сылга уһун унньуктаах, сыралаах айаннарыгар, сыалларын-соруктарын толороллоругар баҕарыахха!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *