Арыйаан Тютрин АЛРОСА Кубогын иккис призера

Москваҕа АЛРОСА Кубогар көҥүл тустууга норуоттар икки ардыларынааҕы күрэхтэһии ыытыллан түмүктэннэ. Күрэхтэһиигэ – Россия, Иран, Азербайджан, Узбекистан уонна Грузия хамаандалара кытыннылар. Кинилэр сэрэбиэй быһыытынан хамаанданан сирэй көрсүү балаһыанньатынан күрэхтэстилэр. Манна даҕатан эттэххэ, кубок олимпийскай ыйааһыннарга ыытылынна.

Россия хамаандата маннык састаабынан кытынна: 57 кг – Хуреш-Оол Дондук-Оол, Арыйаан Тютрин, 65 кг – Начын Куулар, Даша Шарастепанов, 74 кг – Никита Сучков, Дэвид Бетанов, 86 кг – Славик Наниев, Хаби Хашпаков, 97 кг – Зайнула Курбанов, Расул Магомедов, 125 кг – Магомедгаджи Нурасулов, Мухамагази Магомедов.

Хамаандалар эргиир систиэмэтинэн сирэй көрүстүлэр. Онуоха россияннар бастаан узбектары 6:0, онтон грузиннары 5:1, салгыы ираннары кытта 3:3 тэҥнэстэ эрээри, хапсыһыы хаачыстыбатынан 10:14 ахсаанынан сабырыйтардылар. Бүтэһиккэ азербайджаннары 4:2 ахсаанынан хотон, түмүккэ хамаанданан Иран кэнниттэн иккис миэстэҕэ таҕыстылар. Үһүс бириистээх миэстэни Узбекистан хамаандата ылла.

Биллэн турар, саха тустууну таптааччылара – биир дойдулаахпыт, Россия хамаандатыгар аан бастаан ылыллан улахан таһымнаах күрэхтэһиигэ кыттыбыт дойду чемпионатын үс төгүллээх боруонса призера Арыйаан Тютрин хайдах тустубутун сэҥээрэр буолуохтаахтар.

Бастакы көрсүһүүгэ Россия чемпионатын үрүҥ көмүс призера Хуреш Оол Дондук Оол – узбек Шавкатовы кыайда. Иккис киирсиигэ, грузиннары утары биһиги бөҕөспүтүн таһаардылар. Арыйаан тренердэр эрэллэрин түһэн биэрбэтэ, эдэр утарсааччытын Гоги Дзигуаны партерга охтороот, уҥа-хаҥас “накат” диэн албаһы эҥкилэ суох оҥорон, хапсыһыыны болдьоҕун иннинэ очукуонан ыраастык кыайда, 10:0.

Үһүс киирсиигэ Дондук Оолу киириһиннэрэллэрэ буолуо дии санаабыппыт, Тютрины салгыы туһуннардылар. Надер Хаджаниа быйылгы сылга Ираҥҥа бэйэтин ыйыааһыныгар Реза Атри кэнниттэн иккис нүөмэрдээх бөҕөһүнэн ааҕыллар. Азия чемпионатыгар кыттан, бэһис буолбута. Кинини дьиҥинэ Арыйаан эрэллээхтик кыайда. Ити 10:7 ахсаан улаханы эппэт. Бастакы түһүмэххэ киирэн биһиги уолбут утарсааччытын дэлби ыган, этэргэ дылы, бастакы нүөмэринэн үлэлээн, өссө биир түгэҥҥэ киһитин кэннигэр эриллэн тахсан, кэдэрийэн быраҕан – 4 баалы ылла уонна 10:1 ахсаанынан хотон иһэн, очукуонан ыраастык кыайыах киһи уоскуйан хаалан, хапсыһыы бүтүүтэ хас да баалы биэртэлээтэ.
Онон уолбут Арыйаан Тютрин (тренерэ Иван Дмитриев) хамаандалары наҕараадалааһыҥҥа үрүҥ көмүс мэтээлинэн наҕараадаланна. Бу күрэхтэһиигэ биирдиилээн түмүгү таһаарбатылар. Ол да буоллар, күрэхтэһии боротокуолуттан ырытыы оҥорон, бастыҥнары быһаарыахха сөп.

Эһиги болҕомтоҕутугар 57 киилэ кыттыылаахтара уонна кинилэр тустуулара:

Гоги Дзигуа (Грузия) – 2:4, 0:10, 1:5, 5:2. 1 кыайыы — 3 хотторуу. 8 баалы сүүйдэ-21 сүүйтэрдэ. Түмүккэ алтыс миэстэ.

Надер Хаджаниа (Иран) – 4:2, 7:10, 0:13, 6:2. 2 кыайыы — 2 хотторуу, 17:27. Төрдүс миэстэ.

Хуреш Оол Дондук Оол (Россия) – 10:4, 2:0. 2 кыайыы — 0 хотторуу. 12:4. Иккис миэстэ.

Ислам Базарганов (Азербайджан) – 4:10, 0:7, 5:1, 2:6. 1 кыайыы — 3 хотторуу. 11:24. Бэһис миэстэ.

Махмуджон Шавкатов (Узбекистан) – 7:0, 13:0, 0:2, 2:5. 2 кыайыы — 2 хотторуу. 22:7. Үһүс миэстэ.

Арыйаан Тютрин (Россия) – 10:0, 10:7. 2 кыайыы — 0 хотторуу. 20:7. Бастакы миэстэ.

Манна иккилии кыайыылаах түөрт бөҕөс баар, кинилэртэн иккитэ – хотторуулаахтар. Оттон хотторуута суохтар – Тютрин уонна Дондук Оол. Тувинец икки тустуутун иккиэннэрин очукуонан кыайбыт эбит буоллаҕына (очукуонан кыайыыга 3 ыстырааптыыр баал ааҕыллар), Тютрин биирин очукуонан ыраастык (3,5 баал), биирин очукуонан хотон (3 баал), хаачыстыба өттүнэн баһыйан тахсар. Онон официальнайа суох ааҕыыга, биирдиилээн түмүккэ Арыйаан Тютрин АЛРОСА Кубогын кыайыылааҕынан буолла диэххэ сөп.

Быйылгы сылга киирэн баран кини эриэ-дэхси көрдөрүүлэннэ. Ол курдук, Улан-Удэҕэ Бурятия Президенин бирииһигэр норуоттар икки ардыларынааҕы турнирга – үһүс, Раменскайга Россия устудьуоннарга чемпионатыгар – бастакы, Чурапчыга Н.Н. Тарскай кэриэһигэр Саха сирин чемпионатыгар – бастакы, Одинцоваҕа буолбут Россия чемпионатыгар – үһүс, үтүөлээх тренер Д.П. Коркин уонна “Шахтерская слава” норуоттар икки ардыларынааҕы турнирдарга – бастакы, Казахстаҥҥа Д.Кунаев кэриэһигэр норуоттар икки ардыларынааҕы турнирга – үһүс уонна бу – АЛРОСА Кубогар хамаанданан иккис миэстэлэри ылла. Итинэн Арыйаан Тютрин 2018 сыл түмүгүнэн Саха Республикатын уон бастыҥ спортсменнарын ахсааннарыгар эрэллээхтик киирдэ диэххэ сөп.

Аны уолбут кэлэр нэдиэлэҕэ Хотугу Осетияҕа “Аланнар” норуоттар икки ардыларынааҕы турнирга тустуохтаах. Киниэхэ ситиһиини баҕарыаҕыҥ!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *