Артур Ложников сэттис кыттааччынан эбиллэн биэрдэ

Бүгүҥҥүттэн Ижевскэй куоракка боксаҕа Россия хамаанданан кубога саҕаланар. Эрдэ иһитиннэрбиппит курдук, атырдьах ыйын 30 күнүгэр бырагыраама быһыытынан кыттааччылары суруйуу, медицинскэй бэрэбиэркэлээһин, сэрэбиэй уонна ыйааһыннаныы буолар. Оттон сарсыҥҥыттан – киирсиилэр саҕаланаллар.

Бу иннинэ Россия кубогар алта боксербут кыттар диэн суруйбуппут (http://dzulurgan.ru). Кэлин биллибитинэн, кинилэргэ биир киһи эбилиннэ. Новосибирскайга олорор Горнай улууһуттан төрүттээх, норуоттар икки ардыларынааҕы кылаастаах спорт маастара, 25 саастаах Артур Ложников кыттар буолла. Кини Сибиир федеральнай уокуругун хамаандатыттан 52 киилэҕэ диэри киирсиэҕэ. Билэргит курдук, Артур – Россия чемпионатын икки төгүллээх призера.

Манна даҕатан эттэххэ, соторутааҕыта Новороссийскайга ыытыллыбыт Бүтүн Россиятааҕы турнирга иккис миэстэлэммит Петр Васильев (64 кг) Россия кубогар кыттыан сөптөөҕө. Кини Дальнай Восток федеральнай уокуругун былырыыҥҥы чемпиона. Билигин контракт быһыытынан Амурдааҕы Комсомольскайга сулууспалыы сылдьар.

Онон Ижевскэй рингэтигэр саха боксатын иитиллээччилэриттэн сэттэ боксер тахсыаҕа: Дальнай Восток Федеральнай уокуругун хамаандатыттан Николай Григорьев (52 кг), Михаил Варламов (57 кг), Москваттан – Борис Сидоров (49 кг), Назар Андреев (75 кг), Киин Федеральнай уокуругуттан Василий Егоров (52 кг), Южнай Федеральнай уокуруктан Михаил Прокопьев (49 кг) уонна Сибиир федеральнай уокуругуттан Артур Ложников (52 кг).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *