Андрей Яковлев түһүлгэтигэр кимнээх кыайдылар?

«Дохсун» спортивнай комплекска көҥүл тустууга ССРС спордун маастара Андрей Яковлев бирииһигэр кини туста сылдьыбыт ыйааһыннарыгар республикатааҕы турнир ыытыллан түмүктэннэ. Көбүөргэ барыта 75 бөҕөс тахсан күөн көрүстэ. Бу сонун күрэхтэһии Андрей олоҕун орто омурҕаныгар ананан ыытылынна.

Кыайыылаахтарга харчынан ботуччу бириистэр туттарылыннылар. Ол курдук, бастаабыттар 20-лии, иккистээбиттэр 15-тии уонна үһүстээбиттэр 5-тии тыһы. солк. наҕараадаланнылар.

Оттон 65 киилэҕэ бастаабыт спорт маастара Семен Владимиров түһүлгэ бастыҥ бөҕөһүнэн ааттанан, спонсордар олохтообут анал бириистэрин хаһаайынынан буолла.

Биллиилээх бөҕөһү – көҥүл тустууга ССРС, хапсаҕайга СР спортарын маастара, СР бочуоттаах маастара, Уус Алдан улууһун Бочуоттаах гражданина Андрей Вячеславовиһы – “Сахаада-спорт” ассоциация президенэ А.Н.Ким-Кимэн, СР Спорка миниистирин бастакы солбуйааччы С.С. Чердонов, СР спортивнай тустууга федерациятын бастыкы вице-президенэ С.М. Березин, Уус Алдан улууһун баһылыга А.В. Федотов, СР Ис дьыалаҕа министиэристибэтиттэн А.В. Кутепов, Уус Алдан улууһун Дүпсүн нэһилиэгин баһылыга И.И. Соловьев, Республикатааҕы “Модун” спорт национальнай киинин дириэктэрэ Г.М. Мохначевскай, Чурапчытааҕы Спорка бэлэмнэнии киинин салайааччыта А.Н. Андреев уо.д.а. эҕэрдэлээтилэр, сыаналаах бэлэхтэри туттардылар.

Бу бэлиэ күн тустуук Андрей Яковлевы тустууга уһуйбут дьону, киэҥ биһирэбили ылбыт тренердэр Николай Романович Крыловы уонна Николай Николаевич Рожины эмиэ умнубакка чиэстээтилэр-бочуоттаатылар.

Андрей Яковлев бирииһигэр көҥүл тустуугу республикатааҕы турнир түмүгэ:

61 кг: 1. Виталий Эспек, 2. Айсен Винокуров, 3. Петр Копылов, Алексей Копылов.

65 кг: 1. Семен Владимиров, 2. Айтал Захаров, 3. Христофор Потапов, Дмитрий Аксенов.

70 кг: 1. Айсен Потапов, 2. Албан Аввакумов, 3. Владислав Ефимов, Петр Павлов.

74 кг: 1. Ньургустан Брощев, 2. Стив Попов, 3. Алексей Захаров, Никита Софронов.

Петр ПАВЛОВ.

PS: бу күннэргэ тустуук Андрей Яковлев туһунан dzulurgan.ru сайтка – “Көбүөргэ түспүт көмүс көлөһүн” уонна “Дьулурҕан” хаһыакка – “Бүргэһи хааһахха кистээбэккин диэн суруйуулары ааҕан билсиэххитин сөп.

Добавить комментарий

Ваш адрес email не будет опубликован. Обязательные поля помечены *