Андрей Яковлев: «Быыстапка кэнниттэн дьиэбэр анал муннук оҥосторго сананным»


«Коркинныы олоруохха! Коркинныы айыахха!» республикатааҕы быыстапка кыттыылаахтарын билиһиннэриини салгыыбыт. Бу иннинэ “Дьулурҕан” сайтка Н.С. Захаров-Сахаачча балта Анна Семеновна Новгородова, коллекционер Юрий Щукин, Уус Алдан музейын үлэһитэ Альбина Афанасьева, спорт бэтэрээнэ Михаил Друзьянов, суруналыыс Владислав Коротов санааларын истибиппит. Аны бүгүн биһиги ыалдьыппыт, көҥүл тустууга Россия спордун норуоттар икки ардыларынааҕы кылаастаах маастара, СР хапсаҕайга маастара, Спорт бочуоттаах маастара Андрей Яковлев.
Андрей, бу быыстапкаҕа эн көҥүл тустууга ситиспит улахан сэдэх мэтээллэргин аҕалан туруорбуккун, көрөөччүлэр сүрдээҕин сэҥээрдилэр. Сэрэйдэххэ, дьиэҕэ таах сыттаҕа дии, ону дьон көрүүтүгэр таһаарбытын наһаа үчүгэй.

— Мин манна мэтээллэрбин уонна кубоктарбын аҕаллым. Мэтээллэрбиттэн бастатан туран, аан дойду кубогын кыайыылааҕын кыһыл көмүс мэтээлин аҕаллым, ити курдук Ярыгин турнирын үрүҥ көмүс мэтээлин, онно финалга Эльбрус Тедеевтиин тустан, эчэйиим мэһэйдээн иккис буолбутум. Итиэннэ Турцияҕа Яшар Догу мемориалыгар иккис миэстэни ылбыт мэтээлбин уонна Манчаары кыһыл көмүс мэтээлин…

Мэтээллэрим кыладыапкаҕа сыталлар. Онтукпун бу быыстапканы санааммын, көрдөрүүгэ туруордум. “Строительнай” рынок салайааччылара И.И. Данилов, А.И. Заболоцкай, А.В. Крылов сүрдээх үчүгэй быыстапка тэрийбиттэригэр махтанабын! Уопсайынан, мин эрэ буолуо дуо, урут тустубут, билигин умнуллан эрэр уолаттар бары наҕараадабытын аҕалан манна быыстапкаҕа көрдөрбүппүтүн дьон-сэргэ көрөн наһаа сэҥээрдилэр. Бириэмэтэ син ааһан эрдэҕэ дии, ону ахтан-санаан ыллылар. Бу барыта история. Оонньуута суох эттэхпинэ, 30 сааспар Россия көҥүл тустууга сүүмэрдэммит хамаандатыгар киирбитим уонна аан дойду кубогын хамаанданан кыайыылааҕа буолбутум. Уопсайынан, 10 сааспыттан тустуунан дьарыктаннаҕым дии, Уус Алдан Дүпсүнүгэр. Ол дьарыгым түмүгэ 30 сааспар тиийэн биирдэ биллибитэ дии саныыбын. Саха ньоҕой диэбит курдук, уһуннук киирсэммин, бэйэбин дакаастаабытым. Тренердэрбэр Николай Романович Крыловка, Николай Николаевич Рожиҥҥа, Павел Павлович Пинигиҥҥэ махтанабын, кинилэр миигин эрчийэн маннык көрдөрүүнү ситистэҕим дии.

Бу быыстапкаттан санаа ыламмын, бириистэрбин дьиэбэр көстүүлээх сиргэ туруорар санаа киирдэ. Бастакы грамотам миэнэ 1979 сыллааҕы баар, 11 саастаахпар ылбыт наҕараадам, онтукпун раамалаан, бэлиэ оҥостуохпун наада эбит. Киһи сааһыран истэҕин аайы уруккуну-хойуккуну санаан туох эмэ бэлиэ хаалларарга дьулуһар эбит. Аҕам Вячеслав Яковлев Уус Алдан оройуонун көҥүл тустууга уонна хапсаҕайга хас да төгүллээх чемпиона, Манчаары спартакиадатын призера. Онон хаартысканан альбом оҥостуохха диэн санааҕа кэлэн олоробун…

Петр ПАВЛОВ.

Добавить комментарий

Ваш адрес email не будет опубликован.