Андрей Алексеев: “Оҕолорго хамаандабыт 10 мэтээли ылары ситистэ”

«Триумф» Спорка бэлэмнэнии киинигэр кикбоксинг К-1 көрүҥэр Россия улахан дьоҥҥо чемпионата ыытылла турар. Бүгүн – чемпионнары быһаарар бүтэһик күн. Оттон бэҕэһээ оҕолор Россия үрдүнэн бастыыр иһин күрэхтэһиилэрэ ыытыллан түмүктэммитэ.

Ол уонна чемпионат барыллааһын хаамыытын туһунан Саха сирин кикбоксиҥҥа сүүмэрдэммит хамаандатын кылаабынай тренерэ, СР үтүөлээх тренерэ Андрей Алексеевтан билиһиннэрэригэр көрдөстүбүт.

-Билиҥҥитэ эр дьоҥҥо икки уолбут чемпионнаата: Петр Васильев 51 уонна Тимофей Сивцев 57 киилэҕэ. Өссө даҕаны чемпионат салҕанар, Денис Андреев киэһэ гала-финалга киирсиэҕэ. Онон холкутаан, сымнаан биэрбэппит.

Тимофей Сивцев уонна бу чемпионакка эчэйиилээх буолан кыттыбатах Вадим Колтовской – 57 кг ыйааһыҥҥа Россияҕа лидер буоллулар. Онон аны күһүн аан дойду чемпионатын иннинэ иккиэннэрин Россия сүүмэрдэммит хамаандатын үөрэтэр-эрчийэр түмсүүтүгэр кытыннарыахпыт. Онно хайалара ордугун киириһиннэрэн көрөн талыахтара, тренердэр.

Аан дойду чемпионата ханна чопчу буолара билигин быһаарылла илик.

Петрдаах Тимофей, киирсии иннинэ бэриллибит тренер сорудаҕын барытын толордулар. Мааҕыын сарсыарда эрдэ кэлэн, киирсиилэр былааннарын оҥорбуппут. Петр олох чуолкайдык үлэлээтэ. Тимофей эмиэ үчүгэйдик кииристэ. Утарсааччыта – чечен уола эмиэ туран биэрбэт, кыайа сатыыр буоллаҕа. Ол гынан, киирсии тактиката хайдах оҥоһуллубутун курдук кииристилэр. Маладьыастар!

Оттон оҕолорбут бэҕэһээ киирсэн бүппүттэрэ. Биһиги хамаандабыт барыта уон мэтээли ылары ситистэ. Үс чемпионнаахпыт уоннааҕылар – иккис, үһүс призердар. Онон оҕолорго даҕаны куһаҕана суохтук кытынныбыт. Бу көрдөрүү – биһиги салгыы үлэлиирбитигэр стимул буолар. Оҕолор быйыл салгыы ханна да кыттыбаттар. Кинилэргэ Европа күрэхтэһиитэ эҥин буолбат, бу Россия эрэ ыытылынна.

Ол курдук, оҕолорго Надежда Павлова (44 кг), Дмитрий Квач (75 кг), Никита Квач (81 кг) — бастакы, Алина Плотникова (56 кг), Ирина Софронова (48 кг), Ксюша Кобелькова (56 кг), Ефросения Яковлева (65 кг), Дуолан Барашков (51 кг) — иккис, Харысхан Колтовской (42 кг), Вадим Кривошапкин (51 кг) — үһүс миэстэлэри ыллылар.

Аны киэһэ 17:00 чаастан гала-финаллар ыытыллыахтара. Онно 67 киилэҕэ Саха сирин сүүмэрдэммит хамаандатыттан Денис Андреев киирсиэҕэ. Боотурбутугар ситиһиини баҕарыахха!

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *