Анастасия Васильева: “Саҥа саалабыт наһаа үчүгэй”

//Манчаары-2021

Бары билэргит курдук, быйыл сайын от ыйын 6-11 күннэригэр Горнай улууһун Бэрдьигэстээх сэлиэнньэтигэр спорт национальнай көрүҥнэригэр “Манчаары оонньуулара” XXI спартакиада ыытыллыаҕа. Бу улахан таһымнаах күрэхтэһии тэриллиитэ өссө 2017 сыллаахха Саха Республикатын Ил Дарханын дьаһалынан быһаарыллыбыта.

Горнай улууһа билигин хаһааҥҥытааҕар даҕаны сэргэхтик олорор. Тоҕо диэтэргит, аны сайын улуус киинигэр Бэрдьигэстээххэ спорт национальнай көрүҥнэригэр “Манчаары оонньуулара” спартакиада ыытыллаары турарынан, туох баар хамсааһын, үлэ-хамнас барыта онно туһуланар. Улуус экономиката да, тутуу, суол-иис, сибээс сайдыытыгар сүрдээх элбэх үлэ ыытылынна, ыытылла да турар. Дьокуускай – Бэрдьигэстээх суола биллэрдик тупсубут, урукку курдук буор суолунан буолбакка, билигин асфальт суолунан түргэнник сыыйылыннаран тиийэҕин.

“Саҥа саалабыт наһаа үчүгэй”

Манчаары оонньуутунан сибээстээн билиҥҥи кэмҥэ горнайдар биир киэн туттуулара – саҥа үлэҕэ киирэн дьэндэйэн тахсыбыт – Элбэх кыамталаах спортивнай саалалара (комплекстара) буолар.

“Үлэ күүһэ” хаһыат корреспондена Василий Тимофеев миигин батыһыннара сылдьан саҥа сааланы көрдөрдө. Саҥа – саҥа курдук, киирээккин кытта этэргэ дылы, кырааска сыта саба биэрэр. Саала ырааһа, киэҥэ, сырдыга киһи сүргэтин көтөҕөр. Күнүскү аһылык иннинэ буолан, киһи аҕыйах. Ол да буоллар, икки этээһинэн сууйа-сото, ыраастыы сылдьааччылар элбэхтэр.

Василийым спортивнай сааланы, тренердэр хосторун, боксердар саалаларын, тренажернайы, саунаны… биир-биир кэрийэ сылдьан көрдөрөр, кэпсиир. Кырдьык, улахан таһымнаах күрэхтэһиини төһө баҕарар тэрийэн ыытыахха сөп эбит, ону тэҥэ оттон саамай сүрүнэ – олохтоох нэһилиэнньэ доруобуйатын бөҕөргөтүүтүгэр, этин-хаанын сайыннарыыга бэртээхэй тутуу буолбут.

Арай, тренажернай сааланы өҥөйбүппүт, киһи бөҕө эрчиллэ, этэргэ дылы, тимири кытта өрө мөхсө сылдьар эбит. Онон, бачча кэлбиччэ билсэргэ сананан, эппиэттээх киһини ыйыталаһан булан, тренажернай саала инструктора Анастасия Алексеевна Васильеваттан кылгастык кэпсииригэр көрдөстүбүт.

-Биһиги бу спортивнай саалабыт сабыс-саҥа, соторутааҕыта аһыллан үлэҕэ киирдэ. Улахан, киэҥ-куоҥ, ол иһин бэйэлэрин доруобуйаларын, быһыыларын-таһааларын көрүнэр дьоннор кэлэн дьарыктанан аххан эрэллэр. Нэһилиэнньэҕэ анаан сарсыарда 08:30 чаастан киэһэ 20:00 чааска диэри саалаҕа босхо занятиелар буолаллар. Онтон салгыы киэһэ волейбол, футбол, баскетбол, бу тренажарнай саала, сүүрүү, мас тардыһыыта…

Тренажернайга биллэн турар, төлөбүрдээх, сүрүннээн киэһэ үлэ чааһын кэнниттэн эрдэттэн суруттаран баран кэлэ сатыыллар. Сылдьыан баҕалаахтар элбэхтэр.

Ковидтан сэрэхтээх буолуу туһунан эттэххэ, доруобуйаларынан хааччахтаах дьон киирбэттэр, ыспыраапка эбэһээт ирдиибит. Роспотребнадзор ирдэбилин барытын тутуһан туран үлэлиибит. Антисептик эҥин барыта баар, сааланы салгылатыы, дизенфекциялааһын күннэтэ оҥоһуллар.

Саҥа саалабыт наһаа үчүгэй. Киһи барыта маннык саалаламмыппытыттан үөрэр, астынар. Манан сибээстээн спорт бары көрүҥнэригэр оҕолор секцияларга сылдьыылара элбээтэ.

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *