Амма эдэр бөҕөстөрө Дагестаҥҥа

Николай Захаров-Сахаачча аатынан Амматааҕы оҕо спортивнай оскуолата Дагестан Республикатын Хасавюрт куоратыгар баар «Спартак» оҕо спортивнай оскуолатын кытта 2006 сыллаахтан бииргэ үлэлиир.

Үлэ бу көрүҥэ Амма улууһун дьаһалтатын, оҕо спортивнай оскуолатын, тустуу салалтата, тустуу сайдыытын туһугар үлэлиир тренердэр, урбаанньыттар, төрөппүттэр өйөбүллэринэн саҥаттан-саҥа таһымҥа тахсан иһэр.

Бу күннэргэ Хасавюрт куоракка «Спартак» оҕо спортивнай оскуолатын базатыгар Афанасий Адамов, Василий Максимов тренердээх Амма 26 эдэр бөҕөһө эрчиллэ тиийдэ. Онуоха сүрүн өйөбүлүнэн төрөппүттэр, Амма улууһун дьаһалтата (баһылык Н.А. Архипов), Амматааҕы оҕо спортивнай оскуолата (дириэктэр Д.П. Неустроев), Амма улууһун тустууга федерацията (сал. И.С. Климентов) буоллулар.

Кинилэр ортолоругар Дагестан дьарыга диэн тугун-хайдаҕын билбит, төрдүс-бэһис сылларын манна тиийэн дьарыктанар оҕолор бааллар. Оттон үгүстэрэ саҥа саҕалааччылар, 1-2 эрэ кылаас үөрэнээччилэрэ.

Маны сэргэ, Хасавюрка Дальнай Востоктааҕы Федеральнай уокурук быйылгы түһүлгэтигэр 18-гар диэри саастаах уолаттарга 45 кг үһүс миэстэлээх Андрей Мидловец, 110 кг иккис миэстэлээх Миша Нестерев биир дойдулаахтарын кытта анал бырагырааманан эрчиллэ сылдьаллар. Россияҕа бастыыр иһин биир эппиэтинэстээх түһүлгэҕэ бэлэмнэнэллэр. Мишалаах Андрей Дагестаҥҥа дьарык диэн тугун кыра саастарыттан эттэригэр-хааннарыгар иҥэриммит уолаттар.

Хасавюрты кытта үлэни саҕалаабыт киһибит Илья Анатольевич Солдатов буолар. Кини оҥорон хаалларбыт үлэтин салҕаан, Хасавюрты кытта олохтообут сибээһин чиҥэтэн, быйыл бэйэбит кэллибит. Илья Анатольевыһы кытта Дагестаҥҥа бииргэ сылдьан, элбэҕи иҥэриммиппит улаханнык көмөлөстө. «Спартак» оскуола салалтата, дириэктэр Мухтар Алиханович Джамалдинов тус бэйэтэ, доҕотторо Илья Анатольевич туһунан олус истиҥ өйдөбүллээхтэр. Тренер бу үлэтин умулларан кэбиспэккэ, салҕаан, саҥа суолу-ииһи тэлэн иһэрбитигэр баҕардылар. Оннубутун этэҥҥэ булан, эрчиллэ сылдьабыт. Күннээҕи дьарыкпыт сарсыарда сэрээккэттэн саҕаланар. Күҥҥэ үстэ дьарыктанабыт. Ас-үөл өттө үчүгэй. Быйыл оҕолорбут үгүстэрэ кыралар, аан бастакы сырыылара. Дьарык тэтимин көрөн соһуйаллар. Оҕолорбутун чаҕыппат курдук гына тутан-хабан илдьэ сылдьабыт. Биир ыйдааҕы дьарык биэрэрэ, үөрэтэрэ элбэх: атын омук оҕолоро тустууга хайдах сыһыаннаһалларын, кинилэр уратыларын көрөн, бэйэлэригэр туһалаах өттүн иҥэринэллэр, тустууну атын харахтарынан ылыналлар, — диэн иһитиннэрэр Хасавюрт куораттан Амматааҕы оҕо спортивнай оскуолатын тустууга тренерэ Афанасий Адамов.

Сардаана МАТВЕЕВА.

 

Добавить комментарий

Ваш адрес email не будет опубликован. Обязательные поля помечены *