Аммаҕа 100 харахтаах дуобакка республика чемпионата түмүктэннэ

Амма улууһугар Саха Республикатын сүүс харахтаах дуобакка, Саха сирин бастакы маастара Игорь Андреевич Никифоров кэриэһигэр эр дьоҥҥо уонна дьахталларга республикаҕа бастыыр иһин чемпионат ыытыллан түмүктэннэ.

Чемпионакка Саха сирин чулуу дуобатчыттара бары кэриэтэ кыттыыны ыллылар. Ол курдук, эр дьоҥҥо барыта 26 дуобатчыт күрэхтэстэ. Түмүккэ Николай Гермогенов бастакы, Иван Токусаров иккис, Николай Гуляев үһүс миэстэлэргэ тахсан – анал мэтээллэринэн, грамоталарынан наҕараадаланнылар. Антон Пермяков, Гаврил Колесов уонна Женя Кардашевскай – алта күүстээхтэр ахсааннарыгар киирдилэр.

Оттон дьахталларга 23 дуобатчыт кыттыбытыттан, международнай гроссмейстер Матрена Ноговицына 14 очукуолаах эрэллээхтик бастаата, киниттэн биир очукуонан хаалан международнай маастар Ангелина Попова иккистээтэ, 12 очукуолаах маастарга кандидат Сандаара Апросимова үһүстээтэ.

Чемпионат кылаабынай судьуйата, Бүтүн Россиятааҕы категориялаах судьуйа Гаврил Петрович Винокуров:

Чемпионат оонньуута олус тыҥааһыннаах буолла. Эр дьон ортотугар 8 туур кэнниттэн Николай Гуляев очко аҥаарынан инники этэ. Кинини тилэх баттаһан Гермогенов, Токусаров, Пермяков чугас эккирэтэн испиттэрэ. Бүтэһик туурга Гуляев — Колесов оонньуулара тэҥнэһиинэн түмүктэммитэ, онтон атыттар утарылаһааччыларын кыайаннар, түөрт дуобатчыт биэтэккэ тэҥ очколаах таҕыстылар. Кыайыылааҕы компьютернай программа быһаарда.

Дьахталларга бэйэтин оонньуутун сөпкө туруоран, биир туур иннинэ кыайыыга кыаҕын, дьулуурун көрдөрөн эрэллээхтик Матрена Ноговицына бастаата. Иккис миэстэҕэ очко аҥаарынан аҕыйах очколаах, бүтэһик туурга кыайан Ангелина Попова тигистэ. Үһүс миэстэ иһин Дьокуускай куорат «Айыы кыһата» оскуола үөрэнээччитэ бүтэһик туурга норуоттар икки ардыларынааҕы маастар Наталия Шестакованы кыайан – Апросимова Сандаара бочуоттаах бирииһи ылары ситистэ.

Чемпионаты тэрийэн ыыппыттарын иһин Махталбытын тиэрдиэхпитин баҕарабыт – Амма улууһун баһылыгар Николай Архипович Архиповка, Ил Түмэн депутата Руслан Еремеевич Федотовка, Спорт министерствотыттан тэрийсиитигэр көмөлөспүт үлэһиттэргэ, Саха Республикатын дуобакка федерациятын президенэ Владимир Ильич Птицыҥҥа, Болугур нэһилиэгин баһылыга Степан Николаевич Кузьмиҥҥа”.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *