Американецтар Олимпиадаҕа састааптара билиннэ, оттон биһиэнэ?

Көҥүл тустууга АХШ хамаандатын Олимпиадаҕа сүүмэрдиир күрэхтэһиитэ түмүктэннэ. Санатан эттэххэ, бу күҥҥэ диэри американецтар алта ыйааһынтан биэһигэр номнуо олимпийскай путёвкалаахтар.

АХШ көҥүл тустууга хамаандата – аан дойдуга биир күүстээҕинэн ааҕыллар. Ыйааһын аайы кэриэтэ тэҥ күүстээх тустууктар бааллар. Дьэ, ол иһин кинилэр туспа систиэмэнэн, олимпиецтары быһаарар күрэхтэһиини тэрийэн ыыттылар. Бастаан рейтинг быһыытынан күүстээхтэргэ туспа турнир ыытылынна. Ол күрэхтэһии кыайыылаахтара финалга тахсан кинилэи кэтэһэн олорор чулуулары кытта туһуннулар. Манна уратыта диэн, хапсыһыы икки кыайыыга диэри ыытыллар. Онуоха бу сырыыга киирсиилэр бары 2:0 ахсаанынан түмүктэннилэр.

Финаллар түмүктэрэ маннык буолла:

57 кг Томас Гилман – Виталий Оруджев 2:0 (5:4, +2:2)

65 кг Джордан Оливер – Джозеф Маккена 2:0 (3:0, 5:2)

74 кг Кайл Дэйк – Джордан Барроуз 2:0 (3:0, 3:2)

86 кг Дэвид Тейлор – Бо Никал 2:0 (4:0, 6:0)

97 кг Кайл Снайдер – Коллин Мур 2:0 (10:0, 5:1)

125 кг Гейбл Стивесон – Ник Гвяздовски 2:0 (10:0, 10:4).

Киһи эрэ барыта кэтэспит бөҕөһө Янни Диакомихалис (65 кг) – Оливерга хотторон, финалга киирбэтэ, оттон аан дойду икки төгүллээх чемпиона Джейден Кокс 97 киилэҕэ киирсэргэ оҥостон баран, күрэхтэһиигэ сатаан киирбэтэ. Ити курдук, биир күүстээх бөҕөс Спенсер Ли (57 кг) эчэйиилээх буолан тустубата.

Дьэ онон Томас Гилман, Кайл Дэйк, Дэвид Тейлор, Кайл Снайдер, Гейбл Стивесон – Токиотааҕы Олимпиадаҕа барар быраабы ыллылар. Хамаанда састааба күүстээх диэххэ сөп. Бары мэтээлгэ тиксэр кыахтаахтар дии саныыбын.

Оттон Джордан Оливер – ыам ыйын саҥатыгар Болгарияҕа ыытыллыахтаах аан дойдутааҕы квалификационнай турнирга кыттара былааннанар. Онон кинини олимпиец диир эрдэ.

Манна даҕатан эттэххэ, Россия көҥүл тустууга олимпийскай хамаандатын састааба официальнайдык этиллэ илик гынан баран, сэрэйдэххэ барыта быһаарыллан баран сылдьар диэххэ: 57 кг – Завур Угуев, 65 кг – Гаджимурад Рашидов, 74 кг – Заурбек Сидаков, 86 кг – Артур Найфонов, 97 кг – Абдулрашид Садулаев.

Билиҥҥитэ россияннар ыарахан ыйааһыҥҥа эрэ олимпийскай путёвкалара суох.

Петр ПАВЛОВ.     

 

Добавить комментарий

Ваш адрес email не будет опубликован. Обязательные поля помечены *