Альбина Аргунова бирииһигэр турнир Тиит Арыыга ыытылынна

Кулун тутар 6-7 күннэригэр, Уус Алдан улууһун Тиит Арыы бөһүөлэгэр, нуучча дуобатыгар Саха сирин 10 төгүллээх чемпиона, Россия 3 төгүллээх призера, ССРС спордун маастара, Уус Алдан улууһун бочуоттаах олохтооҕо А.И. Аргунова бирииһигэр республикатааҕы турнир ыытыллан түмүктэннэ. Турнирга барыта 54 дуобатчыт кытынна.

Бу чемпионакка Альбина Иннокентьевнаны ааттаан-суоллаан Аан дойду 12 төгүллээх чемпиона, Россия хас да төгүллээх чемпиона, Европа  чемпиона, гроссмейстер Гаврил Колесов кыттыыны ылла. Турнир чэрчитинэр кини Уус Алдан улууһун бары дуобат оонньооччуларыгар, дуобаты таптааччыларга анаан маастар-кылаас уонна сеанс ыытта.

Турнир үөрүүлээх аһыллыытыгар Тиит Арыы нэһилиэгин баһылыга Андрей Васильевич Егоров киирии тылы эттэ. Салгыы эҕэрдэ тыллары Уус Алдан спорка уонна физическэй култуураҕа управлениетын начаалынньыга Константин Васильевич Давыдов, Уус Алдан дуобакка федерациятын салайааччыта Троев Алексей Яковлевич эттилэр. Оттон 22-с төгүлүн турниры баһылаан-көһүлээн ыыта сылдьар спорт маастара Альбина Иннокентьевна оонньуу кэлбит дуобатчыттарга эҕэрдэтин тиэртэ.

Турнир кылаабынай судьуйата – Норуоттар икки ардыларынааҕы ФМЖД арбитра, Бүтүн Россиятааҕы категориялаах судьуйа Винокуров Гаврил Петрович биһиги сайтпытыгар анаан иһитиннэрбитинэн, турнирга – аан дойду 12 төгүллээх чемпиона, Чурапчыттан Гаврил Колесов; аан дойду чемпиона, хамаанданан оонньууга аан дойду чемпионатын кыайыылааҕа, Кыыс Амматтан Андрей Федотов; аан дойдуга боруонса мэтээлин хаһаайына, хамаанданан оонньууга аан дойду чемпиона Тааттаттан Николай Гуляев; маастардар: Егорова Розалия, Прокопьев Василий (иккиэн – Намтан), Колодезников Руслан (Горнай), Пермяков Антон (Амма) кыттан киэргэттилэр.

Турнир түмүгүнэн дьахталларга Анна Шишигина (Мэҥэ Хаҥалас) бастаата, Евдокия Гоголева иккистээтэ, Клара Окоёмова (иккиэн Уус Алдан) үһүстээтэ.

Эр дьоҥҥо тыҥааһыннаах оонньуулар буоллулар. Түмүккэ гроссмейстердар Гаврил Колесов (Чурапчы), Николай Гуляев (Таатта) уонна маастар Василий Прокопьев (Нам) тэҥ очукуону ыллылар (14-түү). Онуоха коэффициент ааҕыытынан, миэстэлэри үллэстии ханнык бэрээдэгинэн суруллубуттарын курдук буолла.

Кыргыттарга: Эмма Софронова (Нам) бастакы, Никанорова Юлия иккис, Николаева Сайаана (иккиэн — Дьокуускай) үһүс миэстэлэри ыллылар. Уолаттарга үс бастакы миэстэни Игорь Пономарев (Дьокуускай), Егор Соловьев (Амма), Айтал Матвеев (Нам) үллэһиннилэр.

Бэтэрээн дьахталларга Розалия Егорова (Нам) кыайда, Зоя Алексеева, Мария Пестрякова (иккиэн — Уус Алдан) иккис-үһүс буоллулар. Оттон бэтэрээн эр дьоҥҥо бириистээх миэстэлэргэ туһааннааҕынан Петр Окоёмов (Дьокуускай), Егор Леонтьев (Нам), Иван Тарабукин (Мэҥэ Хаҥалас) таҕыстылар.

Сеанска Уус Алдан дуобакка федерациятын салайааччыта, “Мүрү саһарҕата” хаһыат кылаабынай редактора Троев Алексей Яковлевич, Намтан дуобат оонньуутугар спорт маастарыгар кандидат Эмма Софронова кыайыыны ситистилэр, ону таһынан аҕыс оонньооччу тэҥнэһиини сурунна.

Альбина Иннокентьевна бэйэтин анал бириистэрин Тиит Арыы, Танда бөһүөлэктэриттэн оонньообут дуобатчыттартан үчүгэй көрдөрүүлээх 2 оонньооччуга, алта группаҕа үчүгэй  көрдөрүүлээх Уус Алдантан оонньообут дуобатчыттарга туттарда.

Байаҕантай нэһилиэгин олохтоохторо оонньуу кэнниттэн киэһэ турнир бастакы күнүгэр Улуу Кыайыы 75 сылынан театрализованнай көрдөрүү оҥордулар.

Аны кулун тутар 11-15 күннэригэр Нуучча дуобатыгар эр дьоҥҥо уонна дьахталларга бастыыр иһин республика чемпионата буолар.

Петр ПАВЛОВ.

 

 

Добавить комментарий

Ваш адрес email не будет опубликован. Обязательные поля помечены *