Алта боксербут бастакы кыайыыларын суруннулар

Дьокуускайга “Триумф” Спорка бэлэмнэнии киинигэр икки рингэнэн Россия боксаҕа XVII чемпионата үгэннээн ыытылла турар. Бэҕэһээ бастакы күн Василий Егоров (49 кг) уонна Роман Обутов (75 кг) кыайыыны ситиспиттэрин суруйан турабыт. Чемпионат иккис күнүн сарсыардааҥҥы чаһыгар 52 уонна 56 кг ыйааһыннарга киирсиилэр ыытылыннылар.

Онуоха 52 киилэҕэ 18 саастаах Талбан Егоров дагестанец Махач Юсуповы кыраһыабайдык кыайан, көрөөччүлэри үөртэ. Саха сирин уонна Новосибирскай уобалас ааттарыттан кыттар Горнайтан төрүттээх Россия икки төгүллээх призера Артур Ложников – Геннадий Черноградскайы аһара баһыйарын иһин, иккис рауҥҥа болдьоҕун иннинэ кыайыыны ситистэ. Ити курдук, Николай Григорьев – Бузург Авджамиловы (Москва) баһыйа тутта.

Оттон Дьулус Яковлев – Россия былырыыҥҥы чемпионатын үрүҥ көмүс призера Расул Салиевка (Дагестан) хотторон кэбистэ.

56 киилэҕэ уолаттарбыт хомоттулар. Ол курдук, Михаил Парников – Россия чемпиона Бахтовар Назировка (ХМАО), Игнат Сивцев – Дамир Хикматулиҥҥа (Тюмень), Айаал Степанов – Ахмед Абдуллаевка (Дагестан) хоттордулар. Оттон Денис Халдеев уонна Рашид Шахбанов (Дагестан) киирсиитин түмүгэр мөккүөр үөскээбитигэр, видеонан ырытан көрөн баран, кыайыылааҕынан Шахбановы аахтылар.

Чемпионат киэһээҥҥи чааһыгар 60 уонна 69 киилэлэргэ киирсиилэр буоллулар. Маныаха спорт маастара, динамовец Михаил Варламов дагестанец Магомед Тиновасовы кыайда. Комментатор эппитинэн, боксанан 13-c сылын дьарыктанар 25 саастаах Михаил Варламов бу 151-c кыайыыта. Маны тэҥэ кини 10 норуоттар икки ардыларынааҕы киирсиини ыыппытыттан – биэһигэр хоппут эбит.

Оттон Прокопий Яковлев – Европа эдэрдэргэ күрэхтэһиитин кыайыылааҕа, норуоттар икки ардыларынааҕы кылаастаах спорт маастара Шамиль Аскеровка (Москва), Айтал Дьяконов – Джамал Батрутдиновка (Санкт-Петербург) тэҥ киирсиигэ хоттордулар.

64 киилэҕэ 24 саастаах спорт маастара, Дальнай Восток Федеральнай уокурук икки төгүллээх чемпиона Петр Васильев – Авак Узляны (Москва) кытта киирсиитигэр омос көрдөххө, биһиги боксербут ордук курдук этэ да, судьуйа Узлян илиитин өрө көтөхтө. Көрөөччүлэр ортолоругар “Не справедливо!”, “Балыйдылар!” диэн тыллар иһилиннилэр.

Бу ыйааһыҥҥа иккис киһибит маастарга кандидат Алквиад Иванов – Магомед Хабриевка (Башкортостан) хоттордо.

Дьэ, онон бастакы киирсиилэр кэннилэриттэн Саха сирин хамаандатыттан Василий Егоров (49 кг), Роман Обутов (75 кг), Талбан Егоров, Артур Ложников, Николай Григорьев (52 кг), Михаил Варламов (56 кг) биирдии кыайыыны суруннулар.

Сарсын, алтынньы 15 күнүгэр бэнидиэнньиккэ – 49 киилэҕэ Василий Егоров – маастарга кандидат Рашид Гасановы (Тула), Петр Прокопьев – спорт маастара Володя Мнацакяны (Ногинскай), Ян Максимов – Николай Харанхоевы (Улан-Удэ), хамаанда капитана Борис Сидоров бэйэтин киһитэ Николай Матвеевы кытта киирсиэхтэрэ. Оттон 75 кг ыйааһыҥҥа Роман Обутов – Тамерлан Казиевтыын (Саратов) киирсиэҕэ.

Санатан эттэххэ, бырагыраама быһыытынан киирсиилэр 12:00-15:00 уонна 17:00-20:00 чаастарга ыытыллыахтара. Биир дойдулаахтарбытыгар, бэйэбит боксердарбытыгар ыалдьыаҕыҥ, кинилэргэ көх-нэм буолуоҕуҥ!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *