Алина Казымова – турнир кыайыылааҕа, Айаал Лазарев финалга таҕыста

                                           

Москваҕа көҥүл, гректии-римнии уонна кумахха тустууларга норуоттар икки ардыларынааҕы турнир бүгүн ыытыллыбыта иккис күнэ. Турнирга тоҕус дойду бөҕөстөрө кытталлар: Россия, Турция, Кыргызстан, Румыния, Македония, Аргентина, Узбекистан, Азербайджан, Бахрейн. Күрэхтэһии быйыл хамаанданан буолбакка, биирдиилээн бастыыр иһин олимпийскай ыйааһыннарга ыытыллар. Ол үрдүнэн пандемиянан сибээстээн, кыттааччы аҕыйах диэххэ сөп.

Бу күрэхтэһиигэ Саха сириттэн икки спортсмен кыттар. Балаҕан ыйыгар Казаньҥа ыытыллыбыт Россия дьахталларга чемпионатыгар 62 киилэҕэ иккис миэстэни ылбыт Алина Казымова – кумахха тустууга, оттон Кыргызстан аатын көмүскүүр опыттаах бөҕөс Айаал Лазарев – көҥүл тустууга.

Алина Казымова 60 кг ыйааһыннаахтарга күүһүн холосто. Манна үс эрэ кыттааччы баар буолан, хапсыһыылар эргиир систиэмэтинэн ыытылыннылар. Бастаан Александра Ниценко (Россия) – Дениза Фодоры (Румыния) хотто. Оттон иккис эргииргэ Алина Казымова румынканы 3:1 ахсаанынан хотто. Онон үһүс эргииргэ Ниценколаах Казымоваттан хайата кыайбыта бастакы миэстэни ылыахтааҕа.

Хапсыһыы наһаа тыҥааһыннаахтык барбыта. Ким да хотторуон баҕарбат, ол эрээри, туораттан көрдөххө, биһиги кыыспыт быдан көхтөөх, кыайыыга дьулуурдаах этэ. Киирсии бүтүөн аҕай иннинэ, олох финальнай свистогу кытта тэҥҥэ диэххэ сөп, Казымова утарсааччытын эргиир таһыгар анньан таһааран, кыайыы очукуотун сурунна. Хапсыһыы өскөтүн тэҥнэһиинэн бүппүтэ эбитэ буоллар, кыттааччылартан хайалара арыый чэпчэки ыйааһыннаах, ол кыайыылаах тахсарын туһунан комментатор санатан эппитэ. Оччотугар, мин көрдөхпүнэ, анараа кыыс кыайыан сөптөөҕө. Казымова уҥуоҕунан намыһах эрээри, быдан халыҥ көрүҥнээх этэ. Итиэннэ оттон ыйааһынын түһэринэн киирдэҕэ дии.

Онон кыл мүччү кыайыыны ситиһэн, Алина Казымова Москва Гран-притын кумахха түһүлгэтин кыайыылааҕынан буолла.

Оттон Айаал Лазарев ыйааһыныгар – 125 киилэҕэ кыттааччылар төрдүөлэр: Шамиль Шарипов (Россия), Ислам Айбуев (Азербайджан), Эмре Карабулут (Турция).

Бастаан сэрэбиэй быһыытынан Айаал Лазарев – Ислам Айбуев туһуннулар. Онуоха биһиги бухатыырбыт чочумча буолаат утарсааччытын умса быраҕан баран, тута “накат” диэн албаска хаста даҕаны эргитэн, хапсыһыыны болдьоҕун иннинэ очукуонан ыраастык кыайда.

Онтон Шамиль Шарипов – Эмре Карабулуту 4:2 ахсаанынан хотто. Онон бүгүн ыарахан ыйааһыҥҥа ким бастакы миэстэни ыларын быһаарсар хапсыһыыга Айаал Лазарев – Шамиль Шарипов көрсөллөр.

Шарипов сааһа 23-һэ, спорт маастара. Махачкала. Тренерэ – Шамиль Омаров. Ол аата, Абдулрашид Садулаевтыын бииргэ эрчиллэр, кини спарринг-партнера диэххэ сөп.  Шамиль – Нарофоминскайга буолан ааспыт Россия чемпионатыгар үчүгэй өйдөбүлү үөскэппитэ, чуут бастыы да сыспыта. Алан Хугаевтыын мөккүөрдээх хапсыһыыга сабырыйтарбыта. Ити чемпионакка кини Россия экс-чемпиона Мухамази Магомедовы (Красноярскай), Тамерлан Расуевы (Грознай), Россия чемпиона Анзор Хизриевы (Санкт-Петербург) кыайталаан финалга тахсыбыта. Онон эдэр талааннаах тустуук диэххэ сөп. Ол да буоллар, биһиги Айаалбыт кинини кыайар кыахтаах. Барытын көбүөр көрдөрүө.

Эр дьоҥҥо көҥүл тустууга финаллар:

57 кг: Рамиз Гамзатов (Россия) — Ислам Базарганов (Азербайждан)
65 кг: Дауд Ибрагимов (Азербайджан) — Начын Куулар (Россия)
74 кг: Исраил Касумов (Россия) — Якуб Гор (Турция)
97 кг: Эрик Джиоев (Россия) — Шамиль Зубаиров (Азербайджан)
125 кг: Айаал Лазарев (Кыргызстан) — Шамиль Шарипов (Россия).

Манна, 86 киилэҕэ Магомед Рамазанов (Россия) финальнай хапсыһыыта суох кыайыылааҕынан таҕыста. Иккис миэстэни Будажапов (Кыргызстан) – Нурмагомедов (Азербайджан) былдьаһыахтара. Хапсыһыылар биһиги бириэмэбитинэн киэһэ 21:00 чаастан саҕаланаллар. Быһа биэриини Россия спортивнай тустууга федерациятын wrestrus.ru сайтыгар көрүөххэ сөп.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *