Алексей Мостахов: “Маннык кинигэни саха ыччаттара оҥорон таһаарбыттара кэрэхсэбиллээх”

2016 сыллаахха, сэтинньи 3 күнүгэр Дьокуускай куорат дьаһалтатын улахан мунньахтыыр саалатыгар, көҥүл тустууга бары олимпийскай чемпионнары сиһилии билиһиннэрэр «Покорившие Олимп» кинигэ үһүстээн саҥардыллан, тупсарыллан, эбиллэн оҥоһуллан тахсыытын сүрэхтээһинэ ыытыллыбыта.

Саҥа кинигэни билиһиннэриигэ оччотооҕу республика киин куоратын баһылыга, Дьокуускай куорат спортивнай тустууга федерациятын бэрэссэдээтэлэ Айсен Николаев, 1976 сыллааҕы Монреаллааҕы Олимпиада чемпиона, норуот дьокутаата Павел Пинигин, «Покорившие Олимп» кинигэ ааптара, «Дьулурҕан» спортивнай хаһыат редактора Петр Павлов, кинигэни оҥорон таһаарааччы, спортивнай суруналыыс Родион Кривогорницын, спортсменнар, тренердэр, оҕо спортивнай оскуолатын иитиллээччилэрэ, спорт бэтэрээннэрэ кыттыыны ылбыттара.

Бу бэлиэ түгэҥҥэ биллэрин курдук элбэх эҕэрдэ тыллар, баҕа санаалар этиллибиттэрэ. Ону диктофоҥҥа хайдах суруллубутун булан, аан бастаан ааҕааччыларга хайдах баарынан бэйэбит сайтпытыгар http://dzulurgan.ru билиһиннэрэбит. Бу иннинэ олимпийскай чемпион Павел Пинигин, оччотооҕуга Олимпийскай эрэл училищетын дириэктэрин солбуйааччы, икки Олимпиада кыттыылааҕа Леонид Спиридонов санаалара бэчээттэммитэ.

Бу сырыыга Саха сирин хапсаҕайга федерациятын толорооччу дириэктэрэ Алексей Мостахов тугу эппитин билиһиннэрэбит:

-Маннык, аан дойдуга өссө тахса илик кинигэни саха ыччаттара оҥорон, бэлэмнээн таһаарбыттарыгар уонна саха тустуутун үбүлүөйдээх кэмигэр чахчы улахан бэлэҕи оҥорбуттарынан истиҥник махтанабыт!

Манна бүгүн эдэр тустууктар бааллар. Биһиги олимпийскай чемпиоммут Павел Пинигин эппитин курдук, чахчы дьулуурдаахтык дьарыктанан, туох баар өйгүтүн-санааҕытын түмэн, күүскэ турунуохтааххыт. Бу кинигэттэн киһи элбэҕи билэр. Үүнэр-сайдар киһи элбэҕи ааҕыахтаах, билэ-көрө сатыахтаах. Кинигэ бастакы страницатыгар албан аатырбыт Александр Иваницкай этиитэ – сүрдээх улахан суолталаах этии. Манна эбии мин этиэхпин баҕарабын, бүтүн государстволар кыайан оҥорботох кинигэлэрин бу биһиги ыччаттарбыт оҥорбуттара – улахан ситиһии, сүдү кыайыы.

Мин сөҕөбүн, саха ыччата спорт уонча көрүҥэр Россияны уонна Европаны ааһан, аан дойдуга улахан ситиһиилэрдээҕиттэн. Онон биһиги, сахалар, чахчы талааннаахпытын көрдөрөр. Аҥардас спорка эрэ буолбакка, сырдатыы, суруйуу үлэтигэр бу биһиги Петр Семеновичпыт улахан дьыаланы оҥордо, улахан кирбиини ситистэ. Онон кини үлэтэ үрдүктүк сыаналанарыгар баҕарабын. Тустуу алта уон сылын бэлиэтиир үөрүүлээх кэрэ-бэлиэ күнүгэр кэлбит тустуу бэтэрээннэрэ бу кинигэни ыллахтарына, сүрдээҕин астыныахтара, үөрүөхтэрэ дии саныыбын. Петр Семенович суруйар талаана өссө сайдан, мантан сиэттэрэн Саха сирин тустуутун алта уон биэс сыллаах үбүлүйүөгэр өрөспүүбүлүкэ чөмпүйүөннэрин тустарынан кинигэни бэлэмнээн таһаарарыгар баҕа санаабын этэбин.

Санатан эттэххэ, «Покорившие Олимп» ыйынньык-кинигэ, эбэтэр көҥүл тустууга олимпийскай чемпионнар тустарынан энциклопедия төрдүстээн — тупсарыллан, эбиллэн оҥоһулла сылдьар.

“Дьулурҕан”.

 

Добавить комментарий

Ваш адрес email не будет опубликован. Обязательные поля помечены *