Александр Романов кэриэһигэр дуобаттаатылар

Саха Республикатын дуобакка федерациятын президенинэн үлэлии сылдьыбыт Мэҥэ Хаҥалас улууһун Бочуоттаах гражданина, Саха сирин үтүөлээх тутааччыта Александр Афанасьевич Романов кэриэһигэр Дуобат-саахымат республикатааҕы киинигэр дуобакка күрэхтэһии ыытылынна.

“Дьулурҕан” сайтка анаан бу күрэхтэһии кылаабынай судьуйатынан үлэлээбит Дуобат-саахымат республикатааҕы киинин инструктора, Бүтүн Россиятааҕы категориялаах судьуйа Гаврил Петрович Винокуров маннык иһитиннэрдэ:

Бу күрэхтэһиигэ кыттыан баҕалаахтар элбэх этилэр. Ол эрээри, балаһыанньа быһыытынан, хааччахтааһын баара, оонньуур таһымнарынан улахан дуобатчыттар эрэ киллэрилиннилэр. Ол курдук, күрэхтэһиигэ 6 гроссмейстер, 5 международнай маастар, 21 спорт маастара кытынна. Эрдэлээн эттэххэ, маннык күүстээх састаапка 4-5 киһи ситиһиилээхтик оонньоон, маастарга кандидат нуорматын толордо.

Кыттааччылары икки бөлөххө арааран оонньоттубут. Бастакы бөлөххө эр дьон уонна уолаттар, иккискэ бэтэрээн-эр дьон, дьахталлар уонна кыргыттар оонньоотулар. Сүрүн бирииһи – Александр Афанасьевич Романов дьиэ кэргэнин убаһа сертификатын гроссмейстер Гаврил Колесов ылары ситистэ. Оттон Мэҥэ Хаҥалас улууһун дьаһалтата олохтообут анал бирииһинэн – 25 тыһ. харчынан сертификатынан гроссмейстер Александр Азаров бэлиэтэннэ. Маны тэҥэ Ил Түмэн депутаттара олохтообут бириистэрин бэтэрээннэргэ иккис миэстэни ылбыт Илья Васильев ылла. Оттон биллиилээх судьуйа Д.В. Сыромятников-Кэрэһиннээх анал бирииһинэн – дьахталларга бастаабыт Наталья Шестакова наҕараадаланна.

Күрэхтэһии үөрүүлээх аһыллыытыгар Ньургуйаана Азароваҕа, Уйгулаана Варламоваҕа, Архан Титовка, Руслан Колодезниковка – Россия спордун маастарын нуормалара иҥэриллибиттэрин туттарыы буолла.

Күрэхтэһии түмүк көрдөрүүтэ:

Эр дьоҥҥо: 1. Гаврил Колесов, 2. Николай Никаноров, 3. Василий Кычкин, 4. Николай Гуляев, 5. Иван Павлов, 6. Герман Стручков.

Уолаттарга: 1. Архан Титов (Чурапчы), 2. Анатолий Протодьяконов, 3. Айаал Бушуев.

Дьахталларга: 1. Наталья Шестакова, 2. Ньургуйаана Азарова, 3. Матрена Ноговицына (Чурапчы).

Кыргыттарга: 1. Ангелина Скрябина, 2. Тунаара Федорова, 3. Сандаара Апросимова.

Бэтэрээн-дьахталларга: 1. Анастасия Собакина (Чурапчы), 2. Мария Бырдыннырова (Дьокуускай), 3. Татьяна Андреева (Хаҥалас).

Бэтэрээн-эр дьоҥҥо: 1. Александр Азаров (Дьокуускай), 2. Илья Васильев, 3. Савва Аргунов (Мэҥэ Хаҥалас).

Добавить комментарий

Ваш адрес email не будет опубликован.