Александр Оконешников: “Этэҥҥэ буоллаҕына, Россия чемпионатыгар уонча уолбут тустуоҕа”

Бэҕэһээ, алтынньы 1 күнүгэр Саха сирин көҥүл тустууга сүүмэрдэммит хамаандатыгар, “Таҥас” фирма спортивнай көстүүмнэрэ туттарыллар бэлиэ түгэнигэр Саха сирин көҥүл тустууга сүүмэрдэммит хамаандатын кылаабынай тренерэ Александр Оконешниковы көрсөн кэпсэтэ сырыттым, хамаанда бэлэмин, хайдах быһыылаахтык бэлэмнэнэ сылдьалларын туоһуласпыппын ааҕааччыларга билиһиннэрэбин.

-Александр Савельевич, дьэ, чемпионат иннинэ балаһыанньабыт хайдаҕын билиһиннэр эрэ.

-Чемпионаппыт көһөн-көһөн, бу алтынньы 16-18 күннэригэр Нарофоминскай куоракка ыытыллар буолла. Пандемиянан сибээстээн чемпионат ыытыллыытыгар уларыйыы бөҕө киирдэ. Холобура, ыйааһын ахсын 16-лыы эрэ киһи кыттар диэтилэр. Онно былырыыҥҥы Россия чемпионатыгар, аан дойду Кубогар, “Аланнар” уонна быйылгы Иван Ярыгин турнирдарга, Россия эдэрдэргэ күрэхтэһиитигэр бириистээх миэстэлэргэ киирбит бөҕөстөр тустар буоллулар. Ирдэбил итинник.

Маннык балаһыанньа биһиэхэ соччото суох. Ити усулуобуйанан, Саха сириттэн түөрт эрэ киһи кыттар бырааптаах. Ол да буоллар, билигин биһиги салалтабыт, федерациябыт уонна Спорка бэлэмнэнии киинин өттүттэн Россия спортивнай тустууга федерациятын кытта ыкса үлэ бара турар. Эбии үс-түөрт уолу кэпсэтэн кытыннарарга үлэ — Виктор Николаевич Лебедев, Леонид Николаевич Спиридонов, Петр Петрович Юмшанов таһымнарыгар ыытыллар. Уустук соҕус буолуо гынан баран, тиһэҕэр диэри туруорсан көрүөхпүт.

Билигин Роспотребнадзор ирдэбилин барытын тутуһаммыт, туһааннаах салалтабыт өйөөн, “Триумфка” сабыылаах эрчиллиигэ киирэммит, бары аналиһы туттараммыт, эдэрдэргэ уонна улахан дьоҥҥо сүүмэрдэммит хамаандаҕа киирэр отучча тустуугу мунньан бэлэмнэниини ыыта сылдьабыт. Уолаттар туруктарын эттэххэ, бу пандемия кэмигэр ким эрэ “удаленно” дьарыктаммыт буолан, урукку таһымнарыгар киирэ иликтэр да бааллара. Ол гынан баран, сбор кэмигэр күүскэ үлэлээммит, урукку чөллөрүгэр киирэн эрэллэр. Сүрүн састааптан түөрт-биэс уолу сааскыттан харахпыт далыгар илдьэ сылдьаммыт, дьарыгы син биир ыыта сылдьыбыппыт. Виктор Рассадин кыра эчэйиилээх, Россия чемпионатыгар диэри оһорунар ини диэн санаалаахпыт.

Онон барыта этэҥҥэ буоллаҕына, Нарофоминскайга буолар Россия чемпионатыгар уонча уолбут тустуохтаах.

Оруобуна, сайыҥҥы кэмҥэ хайдах быһыылаахтык үлэлээтигит диэн ыйытаары гыммытым.

-Сайыҥҥы кэмҥэ “Манньыаттаах” спортивнай базатыгар икки сезон эмиэ сабыылаах дьарыктары оҥорбуппут. Бастакы сезоҥҥа наар күүһү-уоҕу хачайдааһын буолбута. Оттон иккискэ эдэрдэр эбиллэн биэрэн, көбүөр уонна хачайданыы дьарыгын аҥаардаан ыыппыппыт. Билигин наар көбүөргэ үлэлиибит.

Тренердэр тустарынан эттэххэ, 57 киилэҕэ эппиэттээх киһинэн Осип Михайлов үлэлэһэ сылдьар, 61-гэ – Егор Пономарев, 65-кэ – Тимур Пестерев, 70-74 кг ыйааһыннарга – Станислав Захаров, үөһээ ыйааһыннарга Вадим Семеновы кытта Алексей Некрасов эти-хааны эрчийии тренердэрин быһыытынан үлэлэһэллэр. Техника уонна тактика өттүгэр эппиэттээх тренеринэн Герман Контоев үлэлии сылдьар.

Түгэнинэн туһанан, атын дойдулартан кыттар уолаттарбыт тустарынан ыйытыахпын баҕарабын.

-Белорустарбыт хата тохтоло суох дьарыктарын ыыта сылдьаллар. Македонияттан кыттар Владимир Егоров сайын биһигини кытта бииргэ эрчиллибитэ. Эдуард Григорьев Польшаҕа көппүтэ. Онно тиийэн докумуонун ситиһэн, сотору Украинаҕа ыытыллар турнирга тустуохтаах. Айаал Лазарев идэтийбит спортсмен быһыытынан сайыны быһа эрчилиннэ. Кини бу күннэргэ Кыргызстаҥҥа тиийэн, хамаандатын кытта эмиэ Украинаҕа кыттыахтаах. Салгыы тренерэ Иван Николаевич Сивцевтиин Хотугу Осетияҕа тиийэн эрчиллиэхтээхтэр.

Бүгүҥҥү тэрээһин туһунан тугу этиэххин сөбүй?

-“Таҥас” фирма салайааччыта Александр Яковлевич Максимовы кытта билсэммин, кэпсэтии түмүгэр кини үөрүүнэн сөбүлэһэн бу биһиэхэ, сүүмэрдэммит хамаанда уолаттарыгар наһаа үчүгэй спортивнай көстүүмү, чуо тустууктарга диэн фасоннаан оҥотторон туттарда. Онон Александр Яковлевиһы уонна уопсайынан, биирдиилэн бөҕөстөрбүтүгэр күүс-көмө буолар бары биһиэхэ көмөлөһөр, биһигини өйүүр тэрилтэлэргэ — спонсордарбытыгар хамаанда аатыттан махталбытын тиэрдэбит. Өссө таһаарыылаах үлэни, дьиэ-кэргэннэригэр дьолу-соргуну баҕарабыт! Инникитин даҕаны саха спордун өйүү сылдьалларыгар.

А.Я. Максимовы холобур оҥостон атын да кыахтаах тэрилтэлэр салайааччылара биһигини кытта инникитин бииргэ үлэлииллэригэр баҕарабын.

-Александр Савельевич, хоруйдарын иһин махтал! Чэпчэкитэ суох үлэҕитигэр ситиһиилэри баҕарабыт.

Сэһэргэстэ Петр ПАВЛОВ.

Ааптар хаартыскаҕа түһэриитэ.        

Добавить комментарий

Ваш адрес email не будет опубликован. Обязательные поля помечены *