Александр Оконешников: «Саха сириттэн 23 бөҕөс кыттыаҕа»

Дьэ, Россия көҥүл тустууга чемпионата саҕаланара чугаһаата. Манан сибээстээн, Саха сирин көҥүл тустууга сүүмэрдэммит хамаандатын кылаабынай тренерэ Александр Оконешниковтан бэлэмнэнии хайдах барбытын, хас киһи кыттарын, ханнык сыал-сорук турарын туоһуластым.

Бэлэмнэнии этэҥҥэ ааста, манна куоракка анал сбор тэрийбиппит, — диир Александр Савельевич. – Ону таһынан Хотугу Осетияҕа алта уолбут эрчилиннэ. Оттон Виктор Рассадин Хасавюртка дьарыктанна. Туруктара үчүгэй диэххэ сөп, уолаттар настарыанньалаахтар. Билигин ыйааһын эрэ оҥоруута хаалла.

Саха сириттэн 19 киһи, ону таһынан Ураллааҕы федеральнай уокуруктан 1 уонна Киин федеральнай уокуруктан 3 уол, онон биһигиттэн уопсайа 23 бөҕөс кыттар. Өссө Красноярскайтан, саха тустууга кыһатын биир иитиллээччитэ, эдэрдэргэ Россия чемпионатын призёра Максим Толмачев кыттыаҕа.   

Сыал-сорук, уолаттар максимально, туох кыахтаахтарын толору арыйан көрдөрүөхтээхтэр. Хамаанда Улан-Удэҕэ кулун тутар 10 күнүгэр айанныыр.

Саха сирин хамаандата:

57 кг – Петр Константинов, Михаил Иванов, Уйгулаан Иванов, Федор Постников, Дмитрий Илларионов, Егор Вензель, Алексей Копылов.

61 кг – Дмитрий Аксенов, Семен Владимиров, Ньургун Александров, Яков Павлов, Георгий Кычкин.

65 кг – Константин Капрынов, Петр Павлов, Константин Ефимов.

70 кг – Виктор Рассадин, Николай Сивцев, Николай Захаров.

79 кг – Герман Устинов.

86 кг – Никита Софронов, Алексей Ефимов.

92 кг – Ньургун Сергин.

Уолаттарбытыгар ситиһиилээх кыттыыны баҕарабыт! “Саалаахтан самнымаҥ, охтоохтон охтумаҥ” диэн алгыыбыт. Хапсыһыы бүтэһик сөкүүндэтигэр диэри туох кыахтааххытынан, туохха үөрэммиккитинэн кимтэн да толлубакка хорсуннук киирсэргитигэр, этэргэ дылы, хас биирдии тустууга – бүтэһик киирсиигэ тахсар курдук сананан, күүскүтүн-кыаххытын харыстаабакка, кыайыыга дьулуурдахтык тустаргытыгар баҕарабыт!

Эһиги кэннигитигэр бүтүн Саха сирин норуота, элбэх ахсааннаах тустууну таптааччылар тураллар. Эрэнэбит! Ситиһиини баҕарабыт!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *