Александр Волков – Федор Емельяненконы солбуйар кыахтаах

Арассыыйаттан быраабылата суох киирсиигэ биллэр-көстөр байыастартан биирдэстэрэ Александр Волков Алистар Оверимы кытта киирсээри, UFC октагонугар киирэн тураллар. Александр үрдүгэ 2 миэтэрэ 1 см, ыйааһына 120 кг. Бу UFC-га да, “Беллаторга” даҕаны, ыарахан ыйааһыҥҥа, чемпионнаан муҥутуур чыпчаалга тиийбит байыастартан саамай үрдүк уҥуохтаах байыас.

Арай, биир Стефа Струве диэн 2 миэтэрэ 13 см үрдүктээх «Голландский небоскреб» диэн хос ааттаах байыас баарын Саша дөйүппүтэ. Ити Небоскреб өссө билигин аатыра сылдьар Стипе Миочич диэн киһини техническэй нокаутунан дөйүтэн кыайбыт эбит. Волков “Беллаторга” эмиэ чемпионнаан турар. Кэнники UFC ыҥырыллан, Аан дойду ааттаахтарын кытта киирсибитэ. Дерик Льюис диэн оҕуһу туруору туппут курдук негры кытта киирсэн рауннары быһа эккирэтэ сылдьан баран, киирсии бүтэрэ биир эрэ мүнүүтэ хаалбытын кэннэ Саша бэйэтэ алҕас «мэник буулдьаҕа» табыллан, ытыллыбыт лөкөй курдук түспүтэ. Бука кыайарыгар эрэнэн харса суох киирэн хаптайбыта. Дьэ, абалаах хотторуу.

Дерик Льюис охсуһан кыайда да бэйэтин ыйааһыныгар холооно суохтук, клетка муостатыгар аллигатор курдук куймаҥалыыр, күөлэһийэр идэлээх. Нуучча байыаһын охторон баран үөрүүтүттэн, ол «хааннаах ритуалын» толорбута. Ол кэннэ Саша биллэ көммүт. Уолт Харрис диэн эмиэ сүүнэ негры фронт кигынан быарын быһа тэппитэ. Охсуллан, табыллан хотутутуллубатаҕын иһин, Волков уһун атаҕынан быарга тэппитигэр, ыарытыйан ынчыктаан саҥа таһаарбыта иһиллибитэ. Оҕунан ытыллыбыттыы тобуктуу түспүтэ. Онуоха Саша ыстанан тиийэн ситэрилээн эрдэҕинэ, рефери тохтоппута.

Бу билигин Волков Алистар Оверимы кытта киирсээри рефери этэрин кэтэһэн, утарыта көрсөн түсүһээри тураллар. Рефери хамаанда биэрээтин кытта киирсии саҕаланна. Оверим 40 саастаах, Волков 32 сааһа. Оверим быыппастыгас былчыҥа сүүрэлии оонньоон, көрүҥэ да сүрэ бэрт. Ол да буоллар Волков төһө да арычча хатыҥырын иһин, төбө аҥарынан өндөс. Илиитэ уһун буолан ыраахтан табар. Алистар атакалаан баран устунан тутан ыла сатыыр. Кини Алексей Олейник диэн тыыннарын хаайан, тумнаран кыайталыыр байыаһы эмиэ итинник тутуһа сылдьан умсарыта тардыалаан, тобугунан тэбэн дөйүппүтэ. Волковы эмиэ итинник гыныан баҕарар да биирдэһэ илиитэ уһун буолан төттөрү анньыалаан баран охсуолуур. Ол гына сылдьан Волков муннуга тапта.

Бастакы раунд бүтэн сынньалаҥ буолла. Алистар уруккута буолбатах эбит. Дэлби аҕылаабыт. Эбиитин сааһыран иһэ хаһаланан бытаарбыт. Уота-күөһэ умуллубут көрүҥнээх. Иккис рауҥҥа Волков субуруччу охсуолаан, биирдэ үчүгэйдик чэчэгэйгэ таппытыгар, Алистар аттыы түстэ. Ол кэмҥэ Волков охсоору дугдуруҥнаан эрдэҕинэ, рефери тохтотон кэбистэ. Волков аатырбыт кикбоксеры, легенданы кыайан үрдүк ситиһиилэннэ.

Алистар бэйэтин кэмигэр аатыра сылдьыбыт киһи, күөгэйэр күнүгэр сылдьан Федор Емельяненконы кытта киирсээри дураһыйа сылдьыбыт. Интернетинэн үөхсүбүт эбит. «Федоры мин үс төгүл киирсиэххэ диэн ыҥыра сатаатым да буолуммат», — диэбит этэ. Федор кимниин киирсэрин бэйэтэ быһаарбат буоллаҕа. Мас көнө муҥутаан кинилэри кытта интернетинэн этиспэт.

Волков өссө да эдэр, билигин барыта киниэхэ иннигэр. Бу Алистары кытта киирсиэн иннигэр коронавируһунан ыалдьа сылдьыбыт эбит. Дьиэ кэргэнэ эмиэ ыалдьыбыттар.  Сашаҕа билигин киирсэригэр Стипе Миочич, Джон Джонс, Фрэнсис Нгнанну диэн аатырбыт бөҕөстөр, ыарахан таһаҕас буолаллара буолуо.

Фрэнсис Нгнанну диэн Камерунтан сылдьар сүүнэ улахан негр. Иннигэр түбэспити барытын тоҕута солуох дьүһүннээх киһи. Алистары саҥа киирэн иһэн аллараттан өрө баһан апперикотунан охсубутугар, төбөтө тулла сыспыта. Тоҥ балыгы тоһугураччы бырахпыттыы түспүтэ. Тыла суох барбытын, нэһиилэ тилиннэрбиттэрэ.

Волков Нгнаннуттан салларын кистээбэккэ этэр. Ол да буоллар «дьол хараҕа суох» диэн киирсиэн баҕарар.

Фрэнсис Нгнанну Африкаттан, Камерунтан кэлбит. Аҕалара кыра сырыттахтарына, олохтон туораан ийэлэрэ түөрт оҕону бэйэтэ ииппит. Фрэнсис дьадаҥы быстыаҥка олохтон салгыбыт. Дойдутугар аас-туор олоҕу барытын ааспыт. Үөс сиргэ Америка диэки кэлэн, дьол көрдөһүөн саныыр эбит. Ол баҕата туолбут. Бэйэтин күүһүн-уоҕун туһанан, быраабылата суох киирсиинэн дьарыктанан бэйэтин биллэрбит.

Харчынан дьонугар көмөлөһөр эбит. Быстар дьадаҥыттан соҕотохто байа түспүт.

Фрэнсис Алистары оҕо курдук тутан, кэбирэхтик дөйүппүтүгэр, Майк Тайсон сөхпүт этэ. Тайсон эрдэ Алистары өрө тутар эбит.

Александр Волков – Арассыыйаҕа ыарахан ыйааһыҥҥа Федор Емельяненконы солбуйар күүстээх курдук.

Виталий Минаков диэн бөҕөс эмиэ субуруччу кыайан, тахсан иһэн кэнники сүттэ. Дана Уайт кэнники тоҕо эрэ кинини кэнники ыҥырбат буолбут. Эмиэ туох эрэ моһол үөскэттэхтэрэ.

Арассыыйаттан ыарахан ыйааһыҥҥа Волковтаах, Минаков өссө да бэйэлэрин көрдөрүөхтэрэ.

Ородьумаан.

 

Добавить комментарий

Ваш адрес email не будет опубликован. Обязательные поля помечены *