Александр Брызгалов: “Петр Федоров курдук спорт бэриниилээх ыалдьааччылара элбииллэригэр баҕарабын”

«Дьулурҕан» хаһыат сайтыгар ыытыллыбыт Евро-2020 куонкурус кыайыылааҕа Петр Федоровка уталыппакка, бүгүн, Бүтүн Россиятааҕы ГТО физкультурнай-спортивнай комплексын Саха сиринээҕи киинин салайааччыта, Н.Н. Тарскай аатынан республикатааҕы «Туймаада» стадион дириэктэрэ Александр Брызгалов эҕэрдэлээн туран, бириис быһыытынан – сыл устата кэлэн эрчиллэригэр босхо анал абонемент туттарда.

Александр Васильевич, бастатан туран, куонкурус тэриллиитигэр бириис олохтоон күүс-көмө, өйөбүл буолбуккар улаханнык махтанабыт! Билиҥҥи кэмҥэ ханнык да тэрээһиҥҥэ спонсоры, үбүлээччини булар наһаа ыарахан. Элбэх киһиттэн көрдөспүппүтүгэр, эн сөбүлэспиккиттэн сүрдээҕин үөрэбит.  

-Дьиҥэ бэйэм туспа санаалардаах этим. Бу, “Туймаадабыт” — киин стадион буоллаҕа дии, онон Евро-2020 кэмигэр тугу эмэ тэрийэн ыыппыт киһи диэн бүччүм санаалардаах этим. Холобур, футболга табаарыстыы көрсүһүү дуу, эбэтэр футболу таптааччылары мунньан, фан-зона эҥин… Ол гынан баран, бэйэҕит билэҕит, билигин ковид дьаҥа туран, барытын бобо олороллор. Ол иһин, футболга анаан куонкурус тэрийээри гынабыт диэбиккитин истээт, үөрүүнэн ылыммытым. Европа футболга чемпионата – улахан тэрээһин уонна бэйэм эмиэ футболу сөбүлүүбүн.

Финалга хайдах эрэ Англия кыайара буолуо диэн эрэнэ санаабытым. Ол эрээри, итальянецтар маладьыастар, пенальтинан кыайдылар. Кырдьык, үчүгэй чемпионат буолан ааста. Манчаары оонньууларыгар үлэлии да сырыттарбыт, түүннэри футболу көтүппэтибит диэххэ сөп.

Евро-2020 кэмигэр манна “Туймаада” футболлуур хонуутугар Дальнай Востоктааҕы уолаттар лигаларын оонньуута буолбута. Онно биһигиттэн “Арктика” хамаанда оонньуу сылдьар.

Биһиэхэ, Саха сиригэр даҕаны футбол бэриниилээх ыалдьааччылара элбэхтэр. Билигин да ити Санкт-Петербурга буолбут оонньууларга биһиги республикабытыттан көрөөччүлэр сырыттылар быһыылаах дии, телевизорга көрдөххө, Саха Республикатын былааҕа элэҥниир этэ.

Аны, былырыыҥҥы сыл түмүгүнэн, Саха сирэ – саамай элбэх футбол оонньуур киһилээх регионунан буолбуппут. Онно анаан тренер Анатолий Михайлович Самков анал номинация ылбыта, бүтүн Россия үрдүнэн биир үчүгэй тэрээһиннээх үлэлээх, футболу сайыннарар республика буоларбытынан. Ити биһиги биир улахан ситиһиибит буолар.

Манна, “Туймаадаҕа” киэһэ өртүгэр нэһилиэнньэни футбол оонньотууга бириэмэ былдьаһыга. Үчүгэйэ диэн, билиҥҥи ыарыы турбут кэмигэр стадиоммут сабыллыбакка, сарсыардааҥҥы сэрээккэттэн саҕалаан тигинэччи үлэлии турар. Эттэрин-хааннарын эрчийэр, чэгиэн-чэбдик буолууга талаһар дьон стадиоҥҥа кэлэн эрчиллиилэрэ элбээтэ. Аны сахалыы многоборьеҕа “Дыгын оонньуутун” финала буолбута. Аһаҕас халлааҥҥа, киэҥ-куоҥ, бары ирдэбиллэргэ эппиэттиир спортивнай объекка. Роскомнадзор туруорар ирдэбиллэрин барытын толоро олоробут. Ол курдук, санитарнай балаһыанньаны тутуһабыт, барытын сууйа-тарыы, ыстаран, дезинфекциялаан, кэлбит дьону бэрэбиэркэлээн…

“Туймаада” стадиоҥҥа сарсыарда 06:00-08:30 диэри киирэн дьарыктаныы босхо. Онтон 09:00 чаастан дьарыктарбыт саҕаланаллар. Эппитим курдук, дьону барытын справкаларын, хааннарын баттааһынын бэрэбиэркэлээн киллэрэбит. Бу күннэргэ күнүскү кэмҥэ «Арктика» футбольнай кулууп оҕолоро уонна республикатааҕы футбол оскуолатын иитиллээччилэрэ эрчиллэллэр. Киэһэ өртүгэр сүрүннээн футбольнай кулууптар графигынан уонна бигэргэммит былаанынан кэлэннэр оонньууллар.

Конкурус кыайыылааҕа Петр Федоровы эҕэрдэлиибин! Спорт бэриниилээх ыалдьааччыта эбит. Кини курдук чөл олохтоох спорт ыалдьааччылара элбии туралларыгар баҕарабын. Петрга, биһиги стадиоммутугар кэлэн үөрэ-көтө этин-хаанын эрчийэригэр диэн, биир сыллаах анал абонемент туттардыбыт.

«Дьулурҕантан»: Александр Брызгалов – көҥүл тустууга Российскай Федерация, хапсаҕайга Саха Республикатын спортарын маастара. Саха Республикатын спортивнай оонньууларын хапсаҕайга абсолютнай чемпиона (2003), Д.П. Коркин кэриэһигэр көҥүл тустууга норуоттар икки ардыларынааҕы турнир призера (2003), көҥүл тустууга Россия студеннарга чемпионатын иккис призера (2003), Н.Н. Тарскай бирииһигэр Саха сирин көҥүл тустууга чемпиона (2004), Василий Румянцев бирииһигэр хапсаҕайга республикатааҕы турнир ыйааһыныгар уонна абсолютнайга чемпиона (2005), Хаҥалас хапсаҕайа республикатааҕы турнир чемпиона (2005), Роман Цыпандин бирииһигэр республикатааҕы турнир хапсаҕайга чемпиона (2005), Саха Республикатын спортивнай оонньууларын көҥүл тустууга кыайыылааҕа (2006), Россия «Урожай» обществотын тустууга чемпиона (2006), бырааттыы Ноговицыннар бириистэригэр республикатааҕы турнир ыйааһыныгар уонна абсолютнайга чемпиона (2008)…     

Петр ПАВЛОВ.         

Добавить комментарий

Ваш адрес email не будет опубликован. Обязательные поля помечены *