Александр Азаров: «Матрена Ноговицына уонна Николай Гермогенов бастыҥнар кэккэлэригэр»

 

Эстония киин куоратыгар Таллиҥҥа, сүүс харахтаах, атыннык эттэххэ, норуоттар икки ардыларынааҕы дуобакка дьахталларга уонна эр дьоҥҥо аан дойду чемпионата үгэннээн ыытылла турар. Эрдэ иһитиннэрбиппит курдук, бу чемпионакка Россия хамаандатын састаабыттан биһиги Матрена Ноговицынабыт уонна Николай Гермогеновпыт күрэхтэһэ сылдьаллар.

Чемпионат туһунан бу сырыыга Саха сирин дуобакка кылаабынай тренерэ, гроссмейстер Александр Азаров биһиги сайтпытыгар http://dzulurgan.ru анаан санаатын маннык үллэһиннэ:

Николай Гермогенов аан дойду чемпионатыгар финалга, 12 бастыҥнар ахсааннарыгар киирбитигэр биһиги олус үөрдүбүт. Дьиҥнээҕинэн эттэххэ, бу сүүс харахтаах дуобакка аан дойду чемпионатыгар финалга киирэн киирсии ханнык баҕарар спортсмеҥҥа – улахан чиэс-бочуот буолар.

Николай ханныгын да иһин опыттаах дуобатчыт. Кини, билэргит курдук, 2019 сыллаахха Кот Дивуарга аан дойдуга 20 бастыҥ спортсмен кыттыбытыгар 14-с миэстэни ылан, ууну-хаары ааспыта диэххэ сөп. Ити чемпионакка Россияттан алта дуобатчыт кыттыбыт эбит буоллаҕына, бу сырыыга үс эрэ дуобатчыт киирдэ: Александр Гетманскай, Александр Шварцман уонна биһиги Николай Гермогеновпыт.

Уолбут тус тренерэ – Саха Республикатын үтүөлээх тренерэ Василий Кононов. Кини улаатыытыгар, улахан күрэхтэһиилэргэ кыттыытыгар билигин Саахымат, дуобат киинин дириэктэринэн үлэлии сылдьар Алексей Юрьевич Бурнашев олус улахан оруоллааҕын санатабын.

Билигин, Николай Гермогенов бастакы түһүмэҕи ааста, финалга киирдэ. Бу чемпионакка классическай программаҕа Александр Георгиев уонна Алексей Чижов эрдэттэн аккаастанан, эдэрдэргэ суол аһыллыбыта. Манна даҕатан эттэххэ, саппааска сылдьыбыт Николай Гермогенов бу аан дойду чемпионатыгар кыттыытыгар улахан мэһэйдэри көрсө сырыттыбыт. Биир ыйы быһа туруорсан, киллэрдибит.

Муус устарга Россия чемпионатыгар кытта сырыттаҕына, хамаанда састаабыгар баар диэн эппиттэрэ. Ону биһиги суус харахтаах дуобакка улахан кирбиилэри ылаары дьулуспуппут, кэпсэтиилэри ыыппыппыт. Уопсайынан, үп-харчы көрүллэр, болҕомто ууруллар буоллаҕына, биһиги сүүс харахтаах дуобакка спортсменнарбытын бэлэмниэхпит, биһиэхэ Николай Гермогенов, Николай Гуляев курдук эдэр күүстээх дуобатчыттар аҕыйаҕа суохтар. Кыргыттарга, Матрена Ноговицынаҕа эдэрдэр Алена Большакова, Сандаара Апросимова, Тунаара Федорова, Аяника Кычкина уо.д.а. курдук күүстээх састаап баар.

Матрена Ноговицына билигин алта туур кэнниттэн лидердэр ортолоругар ситиһиилээхтик, үчүгэйдик кыттан иһэр. Онон киниэхэ уонна Николайга ыалдьабыт, саха дьонун быһыытынан сэмээр, улаханнык саҥарбакка, үчүгэй түмүктэри кэтэһэбит.

Түгэнинэн туһанан, Николай Гермогенов аан дойду чемпионатыгар киирэригэр көмөлөспүт биһиги Аҕа баһылыкпытыгар, дуобакка президеммит Яков Эдуардович Сидоровка, федерация бочуоттаах президенэ Владимир Ильич Птицыҥҥа, Спорка бэлэмнэнии киинин дириэктэрэ Михаил Дмитриевич Пахомовка махталбытын тиэрдэбит.          

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *