Алдан хайыһарын суолугар

Алдан куоракка Саха сирин хайыһарга федерациятын кубогын иккис түһүмэҕин быһыытынан “Күүстээхтэр күрэхтэһиилэрэ” диэн аһаҕас республикатааҕы күрэхтэһии ыытыллан түмүктэннэ. Күрэхтэһии иккис күнүгэр классическай ньыманан сүүрүү буолла. Хайыһар суолугар барыта 269 спортсмен таҕыста.

Ол иһигэр Алдаҥҥа үөрэтэр-эрчиллэр түмсүүгэ кэлбит Казахстан, Хабаровскай уонна Приморскай кыраайдар, Амурскай уобалас спортсменнара итиэннэ биллэн биллэн турар, биһиги республикабыт улуустарын хайыһардьыттара кыттыыны ыллылар.
2007-2008 сс. төрөөбүт уолаттар 2 км сүүрүүлэригэр Алдантан Глеб Ткачев иккис, Нерюнгриттан Вадим Кривоногов үһүс миэстэлэри ыллылар. Бу саастаах кыргыттарга Алдан оройуонун Аллараа Кураанаҕыттан төрүттээх Елена Николаева тэҥнээҕин булбата. Манна иккис-үһүс миэстэлэри Алдантан Кристина Сафронова уонна Анна Глотова ыллылар.

2005-2006 сс. төрөөбүт кыргыттар 2 км күрэхтэһиилэригэр Алдан спортсменката Нина Садовская иккис, Нерюнгриттан Софья Мутовкина үһүс бириэмэни көрдөрдүлэр. Уолаттарга Ленскэйтэн Никита Арбатскай дистанцияны үсүһүнэн түмүктээтэ.

2003-2004 сыллаахтар 5 км сүүрүүлэригэр Нерюнгриттан сылдьар Алданнааҕы спортивнай оскуола иитиллээччитэ Сергей Железняков үһүс миэстэлэннэ.

2001-2002 сс. төрөөбүт кыргыттар 3 км дистанцияҕа Алдан хайыһардьыта Светлана Пономаренко пьедестал үһүс үктэлигэр таҕыста.

1999-2000 сыллаахтар 10 км сүүрүүлэригэр Дьокуускайтан Роман Дерябов инники кэллэ. Бу саастаах кыргыттарга Анастасия Дубова (Алдан) кыайыы үөрүүтүн биллэ. Оттон дьахталларга уонна эр дьоҥҥо 5 уонна 10 км дистанцияларга Казахстан хайыһардьыттара тэҥнээхтэрин булбатылар.

Прасковья ПАВЛОВА, Алданнааҕы хайыһар спордугар республикатааҕы спортивнай оскуола специалиһа.

Добавить комментарий

Ваш адрес email не будет опубликован. Обязательные поля помечены *