«Аланнар»: Хотторуу!

 

Владикавказка “Аланнар” көҥүл тустууга норуоттар икки ардыларынааҕы турнирга уолаттарбыт бастакы күн түмүгүнэн хайдах тустубуттарын иһитиннэрэн турабыт. Ону хатылыырга төрүөт суох. Бүгүн, “уоскутар” бөлөххө Ньургун Александровтан уонна Виктор Рассадинтан өссө тугу эмэ сэмээр кэтэспиппит даҕаны, мэлийии буолла.

Бастаан Виктор Рассадин белорус Середаны 8:5 ахсаанынан кыайда. Онтон тохтуу түһэн баран тувинец Начын Кууларга таҕыста. Манна даҕатан эттэххэ, Виктор кинини урут наар кыайар этэ. Оттон быйыл Одинцоваҕа Россия чемпионатыгар хотторбута. Бу да сырыыга күттүөннээх утарсыыны оҥорбото, 1:4 ахсаанынан хоттордо.

Биричиинэтэ? Кэнники кэмҥэ дьарыкка сыһыанын мөлтөппүтүгэр диэн малтаччы этиэххэ наада. Виктор талааннаах тустуук, ол эрээри, ол талаанын сатаан арыйбакка сылдьара хомолтолоох. Көрдөрүүтэ мөлтөөтө. Россия хамаандатын үөрэтэр-эрчийэр түмсүүтүгэр ыҥырыллыбат да буолла. Манна күттүөннээх хоруйу хамаанда тренердэрэ эрэ этэр кыахтаахтар.

Бу түһүлгэҕэ Рассадиннаах Куулар иккиэн 19 саастаах дагестанец Курбан Шираевка хотторбуттара. Санатан эттэххэ, бу бөҕөс 2015 сыллаахха Дьокуускайга ыытыллыбыт уолаттарга Россия чемпионатыгар 42 киилэҕэ Иван Оконешников кэнниттэн иккис миэстэни ылбыта. Шираев – “Аланнар” турнир арыйыытынан буолла диэххэ сөп.

Оттон иккис бөҕөспүт Ньургун Александров Россия быйылгы чемпиона Магомедрасул Идрисовка 1:5 ахсаанынан сабырыйтарда. Онон бүттүбүт. Этэргэ дылы, ытыспытын сотуннубут. Ярыгин турнира Тустуу аан дойдутааҕы түмсүүтүн (UWW) рейтиннээх турнира буолла, онон мантан инньэ дойду иһигэр хамаанданы сүүмэрдиир күрэхтэһиилэринэн “Аланнар” турнир уонна Россия чемпионата буолар. Онон тренерскэй састаапка сыал-сорук оннук туруохтаах.

Кырдьык, көрдөрүү быстар мөлтөх. Суһал быһаарыы эрэйиллэр. Манна даҕатан эттэххэ, “Аланнар” турнирга СР спортивнай тустууга бастакы вице-президенинэн талыллыбыт аан дойду икки төгүллээх чемпиона, Ил Түмэн депутата Виктор Лебедев бэйэтинэн тиийэн көрдө-иһиттэ, онон уталытыллыбат дьаһаллары ыларын күүтэбит.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *