“Аланнар”: тустууктарбыт астыннарбатылар


Хотугу Осетияҕа ыытылла турар көҥүл тустууга “Аланнар” норуоттар икки ардыларынааҕы турнирга кимнээх бастакы миэстэ иһин тусталлара билиннэ. Балаһыанньа быһыытынан, Россия хамаандатыттан бастаабыттар тохсунньуга Иван Ярыгин Гран-при турнирыгар кыттар быраабы ылаллар.

Хомойуох иһин, биһиги бөҕөстөрбүт мөлтөхтүк туһуннулар, билиҥҥи туругунан Ярыгин турнирыгар биир да киһибит киирбэтэ. Аны иккис түһүмэх Д.Г. Миндиашвили аатынан Красноярскайдааҕы Тустуу академиятын бирииһигэр ыытыллыаҕа. Онно бастаабыттар эрэ Ярыгин турнирыгар киллэриллэллэр. Ити турнир эмиэ тохсунньуга Ярыгин турнирын иннинэ аҕай буолара былааннанар.

Онон финалларга тустуохтара:

57 кг Хуреш Оол Дондук Оол (Тыва) – Абасгаджи Магомедов (Дагестан)

61 кг Рамазан Ферзалиев (Дагестан) – Бека Ломтадзе (Грузия)

65 кг Курбан Шираев (Дагестан) – Муслим Сайдулаев (Чечня)

70 кг Давид Баев (Хотугу Осетия) – Магомед Курбаналиев (Дагестан)

74 кг Тимур Бижоев (КБР) – Автандил Кенчадзе (Грузия)

79 кг Гаджи Набиев (Дагестан) – Ацамаз Санакоев (Хотугу Осетия)

86 кг Владислав Валиев (Хотугу Осетия) – Шариф Биякаев (Дагестан)

92 кг Анзор Уришев (КБР) – Магомед Курбанов (Дагестан)

97 кг Владислав Байцаев (Хотугу Осетия) – Шамиль Мусаев (Дагестан)

125 кг Гено Петриашвили (Грузия) – Джабер Садекзаде (Иран).

Биһиги бөҕөстөрбүтүттэн Ньургун Александров (61 кг) уонна Виктор Рассадин (65 кг) финалга тахсыбыт тустууктарга хотторбуттарын быһыытынан, “уоскутар” бөлөххө киирсэр быраабы ыллылар. Ол курдук, Александров – Россия чемпиона Идрисовтыын (Дагестан) киирсиэҕэ. Оттон Рассадин бастаан Середаны (Беларусь) кытта тустуоҕа. Онно кыайдаҕына Начын Кууларга тахсыаҕа.

Хас биирдии киһи бэйэтэ туспа санаалаах, ону боппоккун. Ол эрээри, уопсай дьыала туһугар тустуубут тула сомоҕолоһуу суоҕун тухары – ситиһии суох буолуо. Ол ыалдьааччылартан эмиэ тутулуктаах. Ону умнумаҥ!

Турнир бырагыраамата

Ахсынньы 8 күнэ, субуота

16:00-01.00 — бары ыйааһыннарга барыллааһын уонна финалга тахсар иһин хапсыһыылар.

Ахсынньы 9 күнэ, баскыһыанньа

17:00-23:00 — «уоскутар” бөлөх тустуулара, үһүс миэстэ иһин киирсиилэр.
23:00-23:30 — турниры үөрүүлээхтик аһыы.
23:30-01:30 — финаллар уонна кыайыылаахтары наҕараадалааһын.

PS: Бырагыраамаҕа Саха сирин бириэмэтэ ыйылынна.

Тустууну быһа биэриигэ манна көрүөххүтүн сөп:

Ковер А – https://youtu.be/mu2Ep6_3Qa8
Ковер В – https://youtu.be/ohOy9ClUoko
Ковер С – https://youtu.be/2cURtgbW618

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *