«Аланнар»: Көбүөргэ тоҕус тустуукпут тахсыаҕа

Бүгүн, сарсын, ахсынньы 8-9 күннэригэр Владикавказка көҥүл тустууга “Аланнар-2018» норуоттар икки ардыларынааҕы турнир ыытыллар. Турнирга 15 дойду бөҕөстөрө кытталлар: Россия, Казахстан, Узбекистан, Беларусь, Азербайджан, Молдова, Армения, Грузия, АХШ, Иран, Польша, Монголия, Индия, Словакия, Испания.

Бу улахан таһымнаах түһүлгэҕэ саха тустууга кыһатын иитиллээччилэриттэн 9 бөҕөс кыттар. Эрдэ эппиппит быһыытынан, “Аланнар” турнир кыайыылаахтара – Иван Ярыгин аатынан Гран-при турнирга киирэр быраабы ылаллар. Онон эппиэтинэстээх да, тыҥааһыннаах даҕаны күрэхтэһии.

Ыйааһыннарынан сэрэбиэй оҥоһулунна. Кылгастык бэйэбит бөҕөстөрбүт кыттыыларын туһунан сырдаттахха, 57 киилэҕэ 22 кыттааччыттан сахалар – иккиэлэр. Сэрэбиэй быһыытынан бастаан квалификацияҕа Арыйан Тютрин дагестанец Джабраил Гаирбековтыын, Петр Копылов – Амирхан Гуважаковтыын тусталлар.

Тютрин бастакы эргиири этэҥҥэ аастаҕына, иккискэ тута Тускаев-Садулаев хапсыһыыларын кыайыылааҕар тахсар. Оттон Копылов Гаджиев-Хадарцев кыайыылааҕар тахсыан сөп.

Кинилэр бөлөхтөрүгэр өссө Россия чемпионатын призердара Дондук Оол, Тускаев, Садулаев курдук күүстээхтэр бааллар. Онон дьэ, сытыы хапсыһыылар күүтэллэр. Санатан эттэххэ, Арыйан Тютрин быйыл Россия чемпионатыгар Тускаевы хоппута, Дондук Оолга сабырыйтарбыта. Бу сырыыга дьэ хайдах буолар?

Интэриэһинэйэ баар, бу иннинэ наар 61 киилэҕэ тустубут эдэрдэргэ аан дойду чемпиона дагестанец Абасгаджи Магомедов 57-ҕэ киирбит. Сэрэйдэххэ, бу эдэр, талааннаах тустуук үөһээ бөлөхтөн финалга тахсара буолуо. Атыттарга хайдах эбитэ буолла, оттон мин тус санаабар, үөһээ бөлөх састаап өттүнэн арыый мөлтөх буолбут.

61 кг ыйааһыҥҥа 20 бөҕөс баар. Манна биһигиттэн Эдуард Григорьев, Петр Павлов, Ньургун Александров тусталлар.

Бастаан сэрэбиэй быһыытынан, квалификацияҕа Павлов – Алиасхаб Бадрутдиновтыын (Дагестан), Григорьев – Александр Богомоевтыын (Бурятия) тусталлар. Манна иккиэн кыайыахтаахтар дии саныыбын. Богомоев Россия чемпионатыгар ыалдьан бырааһынан уһуллуоҕуттан, ханна да тустубакка сылдьар, эбиитин массыына саахалыгар түбэһэн, эрчиллиитэ ситэтэ суоҕа буолуо диэн тойоннуохха сөп.

Оттон Александров финал 8/1-гэр Европа чемпионатын хас да төгүллээх призера Бека Ломтадзелыын (Грузия) тустар. Бу, күүс-уох өттүнэн сайдыылаах, бырахсан тустар кутталлаах утарсааччы. Чэ, бээ, ким кыайарын көрүөхпүт. Куһаҕана диэн, син эмиэ 57-ҕэ курдук, уолаттарбыт биир бөлөххө түбэспиттэр. Итиэннэ, ырытан көрдөххө, хайдах эрэ быраабыла курдук, икки бастакы ыйааһыҥҥа иккис бөлөх састаап өттүнэн күүстээх буолбут. Туох да диэн, ити мэтээл үллэстиитигэр улаханнык дьайар. Бастакы бөлөхтөн орто баайыылаах бөҕөс боруонсаҕа тиксэригэр анаан оҥоһуллубут курдук.

Ол курдук, бу ыйааһын аллараа бөлөҕөр Григорьевы, Богомоевы, Ломтадзены тэҥэ аан дойду чемпионатыгар бэһис буолбут иранец Яхкеши, Россия чемпиона Идрисов, Абдурашидов курдук күүстээхтэр бааллар.

Ол оннугар үөһээ бөлөххө Артем Гебеков балаһыанньата тупсубут, эмиэ финалга тиийииһик. 57 киилэҕэ аан дойду чемпионатын икки төгүллээх боруонса призера Эрдэнэбат Бехбаяр (Монголия) бу сырыыга бэйэтин күүһүн иккис ыйааһыҥҥа холонор эбит.

65 киилэҕэ 32 кыттааччы сэрэбиэйи ааспыт. Биир саамай эрэнэр бөҕөспүт Виктор Рассадин бастакы эргииргэ Хаджи Мохаммад Али диэн быйылгыттан Бруней чиэһин көмүскүүр дагестанец Хажимурад Алиевы кытта тустуоҕа. Онно кыайдаҕына Шираев (РФ) – Середа (Беларусь) хотуулааҕар тахсар. Салгыы, уолбут бөлөҕөр Куулар, аан дойду эдэрдэргэ чемпиона Сайын Казырык, олимпийскай чемпион Хинчегашвили бааллар.

Дьэ, сытыы, тыҥааһыннаах киирсиилэри көрүөхпүт. Рассадин үчүгэйдик, сирэйэ-хараҕа уоттанан, кыдьыгыран туран тустарга санаммыт буоллаҕына, кыайталыаҕа дии саныыбын.

Беларусь чиэһин көмүскүүр Ньургун Скрябин бастаан олохтоох бөҕөс Заур Токаевы кытта тахсар. Уопуттаах киһи быһыытынан кыайыахтаах. Эрэнэбит.

Рассадиннаах Скрябин үөһээ бөлөххө киирбиттэр. Манна өссө Куулары, Хинчегашвилины тэҥэ өссө аан дойду экс-чемпиона Бекхан Гойгереев, бурят Баяр Цыренов курдуктар бааллар.

Бу ыйааһыҥҥа үһүс киһибит Дьулустан Булатов – дагестанец Абдулла Ахмедовы кытта тустар. Кини иккис бөлөххө Дудаев, Нухкадиев, Гогаев, Аджиев, Мусукаев курдук күүстээхтэри кытта баар. Онон, турнир састааба күүстээх диэххэ сөп. Эрдэттэн бу киһи кыайыа диэн этэр уустуктардаах, көбүөр көрдөрүө дииргэ тиийэбит уонна кылаабынайа, үчүгэй хапсыһыылартан дуоһуйууну ылыахпыт буоллаҕа.

70 киилэҕэ соҕотох кыттааччылаахпыт – Тимур Николаев сэрэбиэй быһыытынан бастакы эргииргэ Магомедмурад Дадаевтыын тустуоҕа. Онно кыайар түгэнигэр Гиниятуллин-Дышеков кыайыылааҕар тахсыан сөп. Бу ыйааһыҥҥа Николаевтан чугас – Магомед Курбаналиев, Леван Келехсашвили, Анзор Закуев, Разамбек Жамалов, иранец Мохаммад Юсефи курдук биллэр бөҕөстөр бааллар. Оттон үөһээ бөлөххө Давид Баев, Чермен Валиев, американец Джеймс Грин киирбиттэр.

Дьэ, чопчу сахалар кыттар ыйааһыннарын кылгастык уонна сэрэхтээх соҕустук ырыттахха итинник.

Бу иннинэ суруйбутум курдук, кыайыылаахтар уонна призердар сыаналаах бириистэринэн уонна харчынан бириэмийэнэн наҕараадаланыахтара. Турнир бириискэ фондата 100 тыһ. долларга тэҥнэһэр: 1-кы миэстэҕэ – 5000 $, 2-кэ – 2000 $, 3-кэ – 1000 $.

Санатан эттэххэ, былырыыҥҥы бастакы турнирга барыта 12 дойду бөҕөстөрө күөн көрсүбүттэрэ. Ыйааһыннарынан кыайыылаахтарынан буолбуттара: 57 кг – Азамат Тускаев (Хотугу Осетия), 61 кг – Исмаил Мусукаев (КБР), 65 кг – Ахмет Чакаев, 70 кг – Магомед Курбаналиев (иккиэн – Дагестан), 74 кг – Алан Засеев, 86 кг – Артур Найфонов, 97 кг – Владислав Байцаев (үһүөн – Хотугу Осетияттан), 125 кг – Билял Махов (Дагестан-КБР). Онно бастаабыттарга – 5, иккистээбиттэргэ – 2, үһүстээбиттэргэ – 1 тыһ. доллар харчынан бириистэр туттарыллыбыттара.

Дьэ, онон бүгүн-сарсын ыытыллар “Аланнар” норуоттар икки ардыларынааҕы турнир састааба олус күүстээҕин быһыытынан, бастакы эргииртэн саҕалаан финалга диэри хас биирдии хапсыһыылар тустууну таптааччылар сэҥээриилэрин ылыахтара. Этэргэ дылы, сүүстэ истибиттээҕэр биирдэ көрбүт ордук. Онон турниры көтүтүмэҥ, “Аланнар” турнир — тустуу эйгэтигэр улахан бэлиэ түгэн.

Турнир бырагыраамата

Ахсынньы 7 күнэ, бээтинсэ

22:00-23:00 – 57, 61, 65, 70, 74, 79, 86, 92, 97, 125 киилэҕэ кыттааччылар ыйааһыннаныылара.

Ахсынньы 8 күнэ, субуота

16:00-01.00 — бары ыйааһыннарга барыллааһын уонна финалга тахсар иһин хапсыһыылар.

Ахсынньы 9 күнэ, баскыһыанньа

17:00-23:00 — «уоскутар” бөлөх тустуулара, үһүс миэстэ иһин киирсиилэр.
23:00-23:30 — турниры үөрүүлээхтик аһыы.
23:30-01:30 — финаллар уонна кыайыылаахтары наҕараадалааһын.

PS: Бырагыраамаҕа Саха сирин бириэмэтэ ыйылынна.

Тустуун быһа биэриигэ манна көрүөххүтүн сөп:

Ковер А — https://youtu.be/mu2Ep6_3Qa8
Ковер В — https://youtu.be/ohOy9ClUoko
Ковер С — https://youtu.be/2cURtgbW618

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *