Айсен Молуков: “Оһуобай! Наһаа үчүгэй бириис!”

“Дьулурҕан” куонкурса урут-уруккуттан бэйэтэ туспа үгэстээх. Ол быһыытынан, хайаан да кыайыылааҕы кытта сэһэргэһии, билиһиннэрии ыытыллар. Ол сиэринэн, куонкурус кыайыылааҕа Айсен Молуков туһунан билиһиннэрдэххэ, кини кэлэр ыйга 28 сааһын туолар, эдэр киһи. Айсен “Триумф” Спорка бэлэмнэнии киинин тренажернай саалатын инструктора. Мадьыны, спорт маастарыгар кандидат. Республика чемпионатын призера. Быйыл олунньуга, Чурапчы улууһун мас тардыһыыга чемпионатын 90 киилэҕэ кыайыылааҕа.

-“Спорт Якутии” хаһыат ыыппыт куонкурсугар төрдүс миэстэлэнним, — диир Айсен. – Бастаабыт киһи сэттэ очукуолаах. Оттон мин уонна өссө икки киһи – алталыы очукуолаахпыт. Бэйэм эппиэппин кинилэртэн арыый хойут ыытан кэбиспиппин. Оттон “Дьулурҕан” куонкурса хайдах эрэ миэхэ ордук чугас курдук. Балаһыанньата үчүгэй, туох да мөккүөр тахсыбат. Бэйэм сылыктааһыммар – Завур Угуев, Абасгаджи Магомедов, Гаджи Рашидов, Даурен Куруглиев, Алихан Жабраилов, Абдулрашид Садулаев чемпионнуулларын таайбыппын. Чемпионаты түүннэри кэтээн көрдүм. Ютуб-ханаалга Максим Тихонов уонна Эдуард Григорьев бииргэ төрөөбүт убайа тэрийбит трансляцияларын. Түгэнинэн туһанан, кинилэргэ махталбын тиэрдэбин.

Итиэннэ куонкуруска кыттыбыт дьоҥҥо барыларыгар махтанабын! Санааларын түһэрбэтиннэр. Мин эмиэ урут маннык тэрээһиннэргэ элбэхтэ кыттан хотторор этим. Оттон кэлин тустуу туһунан элбэҕи көрө, ааҕа сатыыбын. Онтукам көмөлөстө дии саныыбын.

Бу, Сослан Андиев туһунан бэртээхэй кинигэ эбит. Маннык, тустуу туһунан литератураны мунньабын. Куонкурсу тэрийбиккитигэр улаханнык махтанабын!

Манна сыһыары тутан эттэххэ, эдэр ыал Молуковтар – спортивнай дьиэ кэргэн. Светлана, Айсенныын холбоһуон иннинэ араспаанньатынан Артахинова этэ – мас-рестлиҥҥэ спорт маастара, дьахталлар тустууларыгар маастарга кандидат. Өстүбэһи, иллэрээ күн, Саха Республикатын физическэй култуураҕа уонна маассабай спорка управлениетын Ийэ күнүгэр анаан Инстаграмҥа ыыппыт куонкурсугар Светлана оҕотунаан үһүс бириистээх миэстэҕэ тахсыбыта. Онон Молуковтарга бу күннэргэ Байанай тосхойдо диэххэ сөп.

Ити курдук, биһиги ыытар үлэбитигэр көхтөөхтүк кыттаргытыгар ыҥырабыт. “Дьулурҕан” хаһыаты Ааҕыҥ, http://dzulurgan.ru сайтка тахсар суруйуулары көтүппэккэ Көтүтүмэҥ, Инстаграмҥа sakhasport_news аккауҥҥа Суруттарыҥ…

Аны, маннык куонкурсу көҥүл тустууга аан дойду чемпионатыгар тэрийиэхпит. Этэргэ дылы, эрдэттэн “тиискитин-уоскутун оҥосто” сылдьыҥ.

Петр ПАВЛОВ.

Ааптар хаартыскаҕа түһэриитэ.                

Добавить комментарий

Ваш адрес email не будет опубликован. Обязательные поля помечены *