Айаал Лазарев уонна Егор Дмитриев – Азия чемпионатыгар кыттыахтара

Индия киин куоратыгар Делигэ бу күннэргэ спортивнай тустууга Азия чемпионата ыытылла турар. Олунньу 22 күнүгэр аны көҥүл тустууга күрэхтэһии саҕаланар. Бу эппиэттээх күрэхтэһиигэ саха тустууга кыһатын иитиллээччилэриттэн Айаал Лазарев Кыргызстантан уонна Егор Дмитриев Филиппиныттан кытталлар.

Сайаапкаҕа көрдөххө, Егор Дмитриев 57 киилэҕэ тустарга соруктанар. Оттон бу ыйааһыҥҥа аан дойду экс-чемпиона Юки Такахаши (Япония), аан дойду чемпионатын призердара Рави Кумар (Индия), Нурислам Санаев (Казахстан), Тахти кубогын кыайыылааҕа Алиреза Сарлак (Иран) курдук күүстээхтэр кыттарга сайаапкаларын биэрбиттэр.

Кыргызстан чемпиона Айаал Лазарев (125 кг) ыйааһыныгар иранец Парвиз Хади, индус Сумит, кореец Конг Джин Нам, монгол Доржханд Худербулга курдук күүстээхтэр бааллар.

Онон ааспыт нэдиэлэҕэ Европа чемпионатыгар кыттыбыт уолаттарбытыгар курдук, аны бу өрөбүллэргэ Айааллаах Егорга күргүөмүнэн “ыалдьабыт”. Бу чемпионат кинилэргэ Азия Олимпиадаҕа сүүмэрдиир күрэхтэһиитин иннинэ бэйэлэрин тургутан көрөр түһүлгэнэн буолуоҕа.

Манна сыһыары тутан эттэххэ, Азия континенын Олимпиадаҕа сүүмэрдиир күрэхтэһиитэ Кытайга ыытыллыахтааҕа, короновируһунан сибээстээн Кыргызстаҥҥа көһөрүллүөх курдук. Ити күрэхтэһии кулун тутар 27-29 күннэригэр Бишкеккэ былааннанар.

Азия чемпионатын бырагыраамата (Саха сирин бириэмэтинэн)

Олунньу 22 күнэ, субуота

15:00-18:00 – Барыллааһын уонна финалга тахсар иһин хапсыһыылар (57, 65, 70, 79, 97 кг).

21:30-00:30 – Финаллар (57, 65, 70, 79, 97 кг).

Олунньу 23 күнэ, баскыһыанньа

15:00-18:00 – Барыллааһын уонна финалга тахсар иһин хапсыһыылар (61, 74, 86, 92, 125 кг).

21:30-00:30 – Финаллар (61, 74, 86, 92, 125 кг).

Онлайн-трансляция: https://unitedworldwrestling.org/eve…/asian-championships-13

“Дьулурҕан”.

 

Добавить комментарий

Ваш адрес email не будет опубликован. Обязательные поля помечены *