Айаал Лазарев тустууга бэриниилээҕин киһи хайҕыыр

Сэтинньи 7-8 күннэригэр Россия тэбэр сүрэҕэр – Москва куоракка көҥүл тустууга үгэскэ кубулуйбут норуоттар икки ардыларынааҕы турнир ыытылынна. Айаал Лазарев бу күрэхтэһиигэ эдэрдэргэ Европа күрэхтэһиитин призера Ислам Абуевы (Азербайджан) хотто уонна Россия чемпионатын үрүҥ көмүс призера Шамиль Шариповка хоттордо. Ол үрдүнэн, үчүгэй өйдөбүлү хаалларда дии саныыбын.

Билиҥҥи ыарахан кэмҥэ кини баҕа санаатынан эрчиллэн, чочуллан, тустар маастарыстыбатын тупсаран иһэрэ харахха быраҕылынна. Тустууктарга “көбүөрү чувствуйдааһын” диэн өйдөбүл баар. Ол тиийбэтэ, Айаалга. Ханныгын да иһин, олунньу ыйтан күрэхтэспэтэҕэ таайда. Эрчиллии диэн атын, оттон күрэхтэһии практиката диэн олох атын. Бу күрэхтэһии киниэхэ инники улахан түһүлгэлэргэ үктэл курдук көрүллүөхтээх. Итиэннэ дьарык ситимин сүтэрбэт инниттэн, кэмиттэн-кэмигэр күрэхтэһэн, улахан сыалыгар-соругар ох курдук оҥостон, кустук курдук куоһанан тиийиэхтээх.

Хорсуннук киирсэн хотторбут спортсмены ким да баалаабат. Кини кыайыы туһугар тугун барытын биэрэн кииристэ. Уонна хамсаныыта, албаһа элбээбит, син ноҕуруускалаах эрчиллиини баран, этэ-сиинэ модьураабыт, кииллийбит көрүҥнээх. Ити элбэх сыралаах үлэттэн үөскүүр.

Айаал Лазарев биһиги, сахалар ыарахан ыйааһыҥҥа киэн туттар тустуукпут. Кини бу сыллар усталарыгар төһө да улахан эчэйиини көрүстэр, онтукатын оһорунан тустууга төннөн кэлэ турарын, спорка бэриниилээҕин киһи хайгыыр. Итиэннэ улахан таһымнаах күрэхтэһиилэргэ эриэ-дэхси көрдөрүүлэнэн кэккэ сылларга биир дойдулаахтарын элбэхтэ үөрдүбүтэ, билигин даҕаны астыннарда.

Саха сиэринэн улаханнык саҥарбаппыт, кини бу кыттыыларынан Токиотааҕы Олимпиада диэки айаннаан иһэр. Ол айана ситиһиилээх буоларыгар, тренерэ Иван Николаевич Сивцевтиин былааннаабыттара туоларыгар баҕарыаҕыҥ!

Турнир түмүгэ маннык буолла:

57 кг: 1. Рамис Гамзатов (Россия), 2. Ислам Базарганов (Азербайджан), 3. Шабан Кызылташ (Турция).

65 кг: 1. Начын Куулар (Россия), 2. Дауд Ибрагимов (Азербайджан), 3. Хамза Аладжа (Турция), 4. Агустин Дестрибатс (Аргентина), 5. Мухамад Али Хаджи (Бахрейн).

74 кг: 1. Исраил Касумов (Россия), 2. Якуп Гор (Турция), 3. Гитиномагомед Гаджиев (Азербайджан), 4. Семен Терещенко (Россия).

86 кг: 1. Магомед Рамазанов (Россия), 2. Арсалан Будажапов (Кыргызстан), 3. Осман Нурмагомедов (Азербайджан).

97 кг: 1. Шамиль Зубаиров (Азербайджан), 2. Эрик Джиоев (Россия), 3. Магомедгаджи Нуров (Македония), 4. Ибрагим Сифтчи (Турция), 5. Асланбек Газзаев (Россия).

125 кг: 1. Шамиль Шарипов (Россия), 2. Айаал Лазарев (Кыргызстан), 3. Паша Экрем Карабулут (Турция), 4. Ислам Абуев (Азербайджан).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *