Айаал Лазарев – Азия чемпионатыгар

Казахстан урукку киин куоратыгар Алматыга Азия спортивнай тустууга чемпионата ыытылла турар. Көҥүл тустууктар чемпионаттара муус устар 17-18 күннэригэр буолар. Бу чемпионакка саха тустууга кыһатын иитиллээччитэ, былырыыҥҥы Аан дойду Кубогын биирдиилээн бастыыр иһин күрэхтэһиитин боруонса призера Айаал Лазарев кыттар. Балаһыанньа быһыытынан, күрэхтэһээччилэр биир күнүнэн быһаарсаллар. Ол аата, сарсыарда саҕалаан баран, киэһэ түмүктүүллэр.

Чемпионакка биһиги бухатыырбыт кыттар ыарахан ыйааһыныгар (125 кг) барыта 11 бөҕөс суруттарбыт. Кинилэр сэрэбиэйи аастылар. Ол курдук, Айаал чемпионаты финал чиэппэриттэн саҕалыыр. Кини боротокуолга сетка үөһэ өртуүэр түбэспит. Онно – төрдүөлэр. Бастаан кореец Кимы кытта тустар. Онно хайалара кыайбыта аныгыскы эргииргэ, ол аата, финал аҥаарыгар сэрэйдэххэ иранец Тахерины кытта киирсиэҕэ.

Аллараа бөлөххө – сэттиэлэр: Таджикистан, Япония, Узбекистан, Казахстан, Монголия, Индия, Туркменистан бөҕөстөрө.

Санатан эттэххэ, ааспыт нэдиэлэҕэ эмиэ Алматыга буолбут Азия континенын Олимпийскай оонньууларга сүүмэрдиир күрэхтэһиитигэр Айаал Лазарев бастаан монгол Лхагварел Мунхтурга хотторон баран, салгыы пакистанеһы уонна японеһы кыайан, үһүс бириистээх миэстэни ылбыта. Онон финалга тахсыбакка, олимпийскай путёвканы сатаан ылбатаҕа. Аны Айаалга ыам ыйын саҥатыгар Болгарияҕа буолар Олимпиадаҕа сүүмэрдиир бүтэһик күрэхтэһии баар.

Ол иннинэ кини ханнык-туох таһымҥа сылдьара Азия чемпионатыгар көстүөҕэ. Ханнык да түгэҥҥэ уолбутугар ситиһиини баҕарыахха!

Петр ПАВЛОВ.     

Добавить комментарий

Ваш адрес email не будет опубликован. Обязательные поля помечены *