Айаал Лазаревы чиэстиэххэ-бочуоттуохха!

Сахалар киэн туттар боотурбутун өйүөҕүҥ, бүтүн Аан дойду Кубогар сахаларга мэтээл аҕалбытын үрдүктүк сыаналыахха! Айаалбыт, өр сылларга төрөөбүт дойдутун дьонун-сэргэтин үөрдэ, сүргэлэрин көтөҕө сылдьар. Кини үгүс киирсиилэригэр – аан дойду чулуу, муҥутуур кыахтаах бөҕөстөрүн кылбар кыайыыта, саха норуотун күүһүн, тулуурун, дьулуурун туоһулуур. Олимпиада, Аан дойду саамай ыарахан ыйааһыннаах бастыҥ бөҕөстөрүн элбэхтэ систээбитэ, төкүнүппүтэ, хам баттаабыта биһиэхэ сүрэхпитигэр баар. Айаал Лазарев – номоххо киирбит улуу бөҕөстөрбүт туйахтарын хатаран, сахалар кытаанах Айылҕабыт иитиэхтээбит билиҥҥи кэмҥэ бөҕө боотурбут буолар.

Билэрбит курдук бу ситиһии иннинэ кини – Олимпиада кыттыылааҕа, Азия 2015 сыллааҕы чемпиона, үс төгүлээх призера. Хайдахтаах даҕаны балыйыылар, уһун кэминэн оһор эчэйиилэр кэннилэриттэн санаатын саппаҕырдыбакка, тулуурун түмэн, күүһүн мунньунан, 34 сааһыгар Аан дойду Кубогар ситиһиилээхтик кытынна!

Маны ытыспытыгар ылынан, үрдүктүк туттахпытына сатанар. Кэнэҕэски кэлэр ыччакка үтүө холобур буола турарыгар анаан. Күннээх Кавказ омуктара кыайыыларын хайдах курдук бэлиэтииллэрин бэйэбит билэбит. Ыалларбыт буряттар уоланнара Балдан Цыжипов Европаҕа ыарахан ыйааһыҥҥа үһүс буолбутугар, киэҥ тэрээһиннээх эҕэрдэ оҥоһуллубута. Бурятия баһылыга норуот аатыттан чиэс-бочуот тылларынан, маныылаах бэлэҕинэн, киэн тутталларын көрдөрбүттэрэ.

Сахалар өбүгэттэн кэлбит улуу боотурдарбытын ытыктыыр сиэрбитинэн-майгыбытынан ыарахан ыйааһыҥҥа бас-көс бухатыырбыт Айаал Лазаревы бу ситиһиитинэн үрдүктүк тутуохха! Аныгылыы сиэринэн махталбытын, туһааннаах бэлэхпитин туттарыахха! Кэлэр Олимпиада иһин тустууларыгар, Олимпиадаҕа күүһүн-күдэҕин бэлэмнэнэригэр, кутун-сүрүн ииттинэригэр сөптөөх санаа көтөҕөр, сүрү бөҕөргөтөр сыһыаны көрдөрүөххэ!

Россия түөртүү төгүллээх чемпионнара буолбут боксер Василий Егоровы – мэҥэлэр, марафонец Сардаана Трофимованы – үөһээ бүлүүлэр чиэстээбиттэрэ-бочуоттаабыттара, бэлэх-туһах биэрбиттэрэ кэрэхсэбиллээх. Ити барыта аҥардас үөрүү-көтүү, уруй-айхал эрэ буолбатах, ити – спортсменнары инники кыайыыларга күөттээһин, кинилэр санааларын көтөҕүү итиэннэ спорду көҕүлээһин, эдэр көлүөнэ ыччаты иитии буоларын умнумуохха.

Итинник этэн туран, иллэрээ күн Сербия киин куоратыгар Белградка ыытыллан түмүктэммит көҥүл тустууга Аан дойдуга Кубогар биирдиилээн бастыыр иһин күрэхтэһии боруонса призера Айаал Лазаревы уонна кини тренердэрин чиэстиэххэ-бочуоттуохха диэн ыҥырабын!

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *